1 Dzikoronika 26 - Bhibhiliya Nya Guage

Vawoneleli nya myanya

¹ Gasi khu vawoneleli nya myanya, va di kabanisidwe khu mitsawa; a diri Meselemiya, mwamana wa Kore, nya sanana sa Asafi.

² Sanana sa Meselemiya, si diri esi: Matiwula a diri Zakariya, nya wuvili a diri Jedhiyayeli, nya wuraru Zebhadhiya, nya wu na Jatiniyeli,

³ nya livbandre, Elamo, nya livbandre na moyo, Jowanani, nya livbandre na wuvili, Eliyowenayi.

⁴ Sanana sa Obhedhi-Edhomi si diri esi: Matiwula khu Simaya, nya wuvi Jozabhadhi, nya wuraru, Jowane, nya wu na, Sakari, nya livbandre Nataniyeli,

⁵ nya livbandre na moyo, Amiyeli, nya livbandre na wuvili, Isakari, nya livbandre na wuraru, Pewuletayi; kholu Nungungulu a di mu kategiside.

⁶ Mwamana waye Simaya, a nuye a di velegide sanana si nga fumelago nyumbani ga babe wawe; kholu va diri sanana nya dzindrena.

⁷ Sanana sa Simaya si diri esi: Otini, Rafayeli, Obhedhi, Elizabhadhi gumogo ni vandriyawe, vama nya dzindrena va diri Eliyu ni Semakiya.

⁸ Ava vatshavbo va diri sanana sa Obhedhi-Edhomi; avo gumogo ni sanana sawe, ni vandriyawe, va diri vama nya dzindrena nya tshivba thumoni gwawe, va diri livbandre na limwedo magumi na vavili.

⁹ Sanana sa Meselemiya ni vandruye nya dzindrena, va diri likhumi na livbandre na vararu.

¹⁰ Ga Hosa wa va na Merari, sanana saye si diri esi: Siniri, a diri muthangeli ambari a nga bani nasiri matiwula, a diri muthangeli kholu babe waye a di mu dandrisa,

¹¹ nya wuvili a diri Hilikiya, nya wuraru Tebhaliya, nya wu na Zakariya; vatshavbo sanana ni vandruye va Hosa, va diri likhumi na vararu.

¹² Yatshavbo mitsawa yeyi nya vawoneleli nya dzinyangwa, gumogo ni vathangeli nya dzinyumba dzawe, va di rwegidwe thumo nya guthumele Nyumbani gwa Pfhumu Nungungulu, gumogo ni vandriyawe.

¹³ Va di hathwa khu solo khu nyangwa ni nyangwa, gasi guti siguruvedzo nya vathu nya vadugwana ambari avo nya vakhongolo, mayelano khu dzindranga dzawe.

¹⁴ Nyangwa ya Khugadambo, solo yi di thegela ga Selemiya; gasi mwanaye Zakariya, a nga bani ari muthu nya ndruda ni mapimo, solo yi di mu thegela gasi a manege khu phuvbo ga Wuronga.

¹⁵ Khu phuvbo ga Marandzi, yi di thegela Obhedhi-Edhomi, sanana saye, si hathwa gu sayisa nyumba nya dzithomba;

¹⁶ Supimi ni Hosa, va di hathwa gu khala khu phuvbo ga Pfoladambo ni mwanya wu thudwago gupwani Saleketi, vbafuvbi ni ndzila nya gugwele, yi thononago ni mumbe muwoneleli.

¹⁷ Khu Khugadambo, gu diromo livbandre na moyo va na Levhi; khu Wuronga, va manega vana khu litshigu; khu Marandzi, vana khu litshigu, gasi nyumbani nya dzithomba, gu di manega vathu vavili khu phuvbo mwedo; khu limbe liphuvbo, vavili khu litshigu ni litshigu.

¹⁸ Khu likupakupa la Pfoladambo, gu di manega vathu vana, ndzilani vavili, likupakupani vavili.

¹⁹ Khiyo eyi mitsawa nya vawoneleli ya vbanyangwatunu, nya sanana sa Kore ni sanana sa Merari.

Vasayisi nya dzithomba

²⁰ Vbakari ga va na Levhi, va nga bani va rwegidwe thumo nya gusayise dzithomba dza Nyumbani ga Nungungulu ni dzithomba nya silo nya guage, va diri ava:

²¹ Va na Ladhani, nya linyumba la Gerisoni, va lumbago va na Ladhani, ni vathangeli nya dzinyumba dza Gerisoni, a diri Jeyeli;

²² sanana sa Jeyeli si diri esi: Zetani ni ndriyaye Joyeli; ava va di rwegidwe thumo nya gusayise dzithomba dza Nyumbani gwa Pfhumu Nungungulu.

²³ Vbakari ga va na Aniramo, ni va na Isari, ni va na Hebroni, ni va na Uziya;

²⁴ Sebhuweli, mwamana wa Gerisoni, mwamana wa Mosi, a diri muthangeli wa vasayisi nya dzithomba.

²⁵ Vandriyaye avo va dugidego ga Eliyezeri, va diri Reyabhiya ni mwanaye Josiya, Josiya nuye ni mwanaye Joramo, Joramo ni mwanaye Zikiri, Zikiri ni mwanaye Selomiti.

²⁶ Selomiti yoyu gumogo ni vandriyaye, va di rwegidwe rwalo nya gusayise dzithomba dzatshavbo ni sombo nya guage, esi mufumeli Dhavhidhe gumogo ni vathangeli nya dzinyumba, ni vathangeli nya sikwata nya likhumi mazana (1.000), niso nya lizana (100) ni vathangeli nya dzinyimbi;

²⁷ nya iso si phangidwego nyimbitunu si nga vegwago gasi gu sayisa khiso Nyumba ya Pfhumu Nungungulu;

²⁸ gumogo gambe ni satshavbo iso si ningedwego khu mwama nya liwoni Samuweli, ni Sawule, mwamana wa Khisi, ni Abhineri, mwamana wa Neri, ni Jowabhi, mwamana wa Zeruya, ni satshavbo nya miningelo yi ningedwego khu vathu vatshavbo, si diri mandzani ga Selomiti, gumogo ni vandriyaye.

Vathangeli ni valamuli

²⁹ Vbakari ga va na Isari, Khenani gumogo ni sanana saye, va di rwegidwe mithumo nya gulove satshavbo sa vbavbandze ga na Israyeli, gu khala vathangeli ni valamuli nya mahungu.

³⁰ Vbakari ga va na Hebroni, a di hathwa Hasabhiya ni vandriyaye, ni likhumi na livbandre na mavili mazana (1.700) vama nya dzindrena, avo va di rwade rwalo nya guthumele Israyeli, khu khisikheyi ga Joridhani, phuvbo ga Pfoladambo, va thumela Pfhumu Nungungulu ni thumo wa mufumeli nya litigo.

³¹ Vbakari ga va na Hebroni muthangeli a diri Jeriya. Gasi khu mahungu nya longoloko wa na Hebroni gumogo ni dzindranga dzawe, wu di khedzisedwa gwadi khu mwaga nya magumana nya gufume ga Dhavhidhe, va mana ndrani nya linyangwa lawe, vama nya dzindrena tigoni ga Jazeri wa Gileyadhi.

³² Mufumeli Dhavhidhe a di hatha Jeriya ni vandriyaye nya dzindrena, tengo wawe wu nga bani ari magumavili na livbandre na mavili mazana (2.700), vathangeli nya dzinyumba; a va emisa vbakari ga va na Rubheni, va na Gadhi ni ga gipandre nya lihundzu la na Manasi, gu gira mithumo yatshavbo ya Nungungulu ni yatshavbo mithumo ya mufumeli.