1 Dzikoronika 23 - Bhibhiliya Nya Guage

Mithumo ya na Levhi

¹ Avbo Dhavhidhe a nga bani a gumbide, nari ni matshigu nya mangi, a di emisa mwanaye Solomoni gu khala mufumeli wa na Israyeli.

² A di tombanisa yatshavbo manganagana ya Israyeli, gumogo ni vaphasi nya mhamba ni va na Levhi.

³ Gu di sayedwa Valevhi gukhugela avo va nga enedza magumararu myaga guya mbeli, gikhati va nga sayedwa khu moyo ni moyo, tengo wawe va diri magumararu na livbandre na mararu magumi mazana (38.000) vama.

⁴ Vbakari nya avo, gu diromo magumavili na mana magumi mazana (24.000) vama, gasi gu wonelela thumo nya Nyumba ya Pfhumu Nungungulu, ni livbandre na limwedo magumi mazana (6.000), va khala valovi ni valamuli nya mahungu.

⁵ Ni magumana mazana (4.000), va khala vawoneleli nya myanya, vambe magumana mazana (4.000), va rungudza Pfhumu Nungungulu khu siwombawomba, iso Dhavhidhe a nga bani a si giride gasi gu dhumisa khiso.

⁶ Dhavhidhe a di va kabanisa khu mitsawa, gukhedza khu dzinyumba dza na Levhi, a gu edzi: Gerisoni, Khowati ni Merari.

⁷ Sanana sa Gerisoni khesi: Ladhani ni Simaya.

⁸ Sanana sa Ladhani khesi: Muthangeli khu Jeyeli, Zetani ni Joyeli, vatshavbo va diri vararu.

⁹ Sanana sa Simaya khesi: Selomiti, Haziyeli ni Harani; vatshavbo va diri vararu. Ava va diri vathangeli va vavelegi va Ladhani.

¹⁰ Sanana sa Simaya khesi: Jahati, Ziza, Jewusi ni Bheriya; ava va vana, va diri sanana sa Simaya.

¹¹ Muthangeli wawe a diri Jahati, gu landrela Ziza; aholu Jewusi ni Bheriya kha va nga velega sanana nya singi; khu guralo, va di sayedwa gumogo ni nyumba ya vavelegi vawe va khala va ndranga mweyo.

¹² Sanana sa Khowati si diri esi: Aniramo, Isari Hebroni ni Uziyeli; satshavbo si diri sina.

¹³ Sanana sa Aniramo si diri esi: Aroni ni Mosi; Aroni a di hathwa gasi a thumela vbawulangatunu nya Guage ngudzu, uye gumogo ni sanana saye kala gupindruga, ni gu vbisa libani mbeli ga Pfhumu Nungungulu, gu mu thumela ni gu kategisa vathu khu lina laye kala gupindruga.

¹⁴ Gasi sanana sa Mosi, muthu wa Nungungulu, avo va di sayedwa lihundzuni la na Levhi.

¹⁵ Sanana sa Mosi khesi: Gerisoni ni Eliyezeri.

¹⁶ Mwamana wa Gerisoni khu Sebhuweli, a nga bani ari muthangeli.

¹⁷ Mwamana wa Eliyezeri khu: Reyabhiya, muthangeli; Eliyezeri kha nga velega gimbe gyanana, aholu sanana sa Reyabhiya si di pandregelana ngudzu.

¹⁸ Gyanana gya Isari a diri egi: Selomiti, muthangeli.

¹⁹ Sanana sa Hebroni si diri esi: Jeriya muthangeli, Amariya khuye nya wuvili, nya wuraru khu Jahaziyeli, nya wu na khu Jekameyama.

²⁰ Sanana sa Uziyeli khesi: Mika, muthangeli, nya wuvili khu Isiya.

²¹ Sanana sa Merari khesi: Mahali ni Musi. Sanana sa Mahali khesi: Eliyazari ni Khisi.

²² Eliyazari a difa nyamba velega sanana nya sikhwathana, aholu a di velega vanyamahegyane; iso si di dzegana ni vandriyawe, sanana sa Khisi.

²³ Sanana sa Musi khesi: Mali, Edheri ni Jerimoti; si diri siraru.

²⁴ Ava khavo a gu va na Levhi, mayelano ni linyumba la vanyehe vawe, kha nga idzo va sayedwego khidzo khu tengo nya malina, khu longoloko wa vathangeli vawe va nga bani va gira thumo nya guthumele Nyumbani ga Pfhumu Nungungulu, khu tanga nya gukhugele magumavili myaga guya mbeli.

²⁵ Kholu Dhavhidhe a di gu ganela, khuye: “Pfhumu Nungungulu wa na Israyeli a hefemudzide vathu vaye, a na khala Jerusalema, kala gupindruga.

²⁶ Khu guralo, va na Levhi kha va na rwala gambe tshatsha wa Nungungulu, ambari ni gimwegyo nya wukhozeli.”

²⁷ Kholu, kha nga guleletela nya guhegise ga Dhavhidhe, a di khuye, va na Levhi va na phela gu bela tengoni va gu bani va enedzide magumavili myaga guya mbeli.

²⁸ Kholu rwalo wawe va na Aroni khu gu thumela Nyumbani ga Pfhumu Nungungulu, gu sayisa nyumbani ni makhuvini gwaye, va agisa sombo satshavbo nya guage, ni yimbe mithumo ya Nyumbani ga Nungungulu,

²⁹ gu sayisa sibaba nya miphaselo, wuguvbi nya miningelo nya guhodze, sibaba nyambana mela, ni iso nya gugadzingwe niso nya guvawudwe, ni iso si patidwego ni mafura, ni satshavbo si pimwago khu mipimo yi vegidwego.

³⁰ Khu litshigu ni litshigu, dzimindrudzile ni silambosile, va fanede gu resa ga Pfhumu Nungungulu va mu bonga ni gu mu rungudza.

³¹ Va diri ni fanelo nya guningele miphaselo nya guvbiswe ga Pfhumu Nungungulu, khu dzisabhadho ni gumegani nya ngima, ni mitshangano yi tadego, kha nga giolovedzo gyawe, gasi va simama gu manega mbeli ga Pfhumu Nungungulu.

³² Va sayisa ni gu wonelela Tshatsha nya Tshangano, ni gu sayisa Wulanga nya Guage, ni gu phasa vandriyawe va na Aroni, thumoni wa Nyumbani gwa Pfhumu Nungungulu.