1 Dzikoronika 22 - Bhibhiliya Nya Guage

Dhavhidhe a ngu dongisela gu vbaha Nyumba ya Nungungulu

¹ Dhavhidhe a di ganela, khuye: “Nyumba ya Pfhumu Nungungulu yi na manegela avba, gumogo ni giluvelo nya miphaselo nya guvbiswe ya na Israyeli.”

² Dhavhidhe a di leletisa gukhuye vatshavbo valuveli va nga bani varomo tigoni ga Israyeli va tshaniswe; vavbahi a va rwega thumo nya gudongisele siwindri nya guvbahe khiso Nyumba ya Nungungulu.

³ Dhavhidhe a di dongisela gambe simbi nya gutale gasi gu gira khidzo dzikhogo nya gu khokhotele malimba ni gu manyisa mapulango, gumogo ni sugu nya gutale ngudzu wu ngamba vegwa vbagikalotunu gasi wu tidwa tengo wawo,

⁴ ni mapulango nya sedhari nyambana tengo, kholu va na Sidhoni ni va na Tiro, va di gu resa khu wungi nya ayo.

⁵ Kholu Dhavhidhe a di gu ganela, khuye: “Gyanana gyangu Solomoni a ngari dugwana ni gu gambe, a ngari mwalo tshivba, narigu nyumba yi vbwetwago gu vbahedwa Pfhumu Nungungulu, gu vbwetega nari nyumba nya wumburi, nya gukhugege ni wudhumo tigoni gwatshavbo; khu guralo, nyi na yi dongisela.” Khavbo avbo, Dhavhidhe a di dongisela silo nya singi nya gutale nasi gufi.

Dhavhidhe a ngu rwega thumo Solomoni nya guvbahe Nyumba ya Nungungulu

⁶ Khavbo avbo, a di rana mwanaye Solomoni, a mu leleta gukhuye: “Vbahela nyumba Pfhumu Nungungulu wa Israyeli.”

⁷ Dhavhidhe a di embela mwanaye Solomoni, khuye: Mwanangu, nyi di suvide gu vbaha nyumba yi lumbago lina la Pfhumu Nungungulu wangu.

⁸ Aholu nyi di tedwa khu Lito la Pfhumu Nungungulu, li ta, khilo: Uwe u vbaladzide novba nya wungi, ni gu, u giride dzinyimbi nya dzikhongolo; khu na vbaha khu lina langu, kholu u vbaladzide novba nya wungi mafuni, na nyi si wona khu maho gwangu.

⁹ Wona, mwamana u na velegago, a na bani ari mwama nya gurule, kholu nyi na mu ninga guhefemula khu ga vatshavbo valala vaye va mu randredego; khu guralo, lina laye a na bani ari uye Solomoni; gurula ni gukhadzisega nyi na si ninga ga na Israyeli matshiguni gwaye.

¹⁰ Uye khuye a na gu vbahago nyumba khu Lina langu; uye a na khala gyanana gyangu, ni eni nyi na bani nyiri babe waye; mufumo waye nyi na wu tiyisa kala gupindruga vbakari ga na Israyeli.

¹¹ Gasi olu mwanangu, Pfhumu Nungungulu a na khale ni uwe, gasi u katega, u kodza gu vbaha Nyumba ya Pfhumu Nungungulu wago, kha nga idzo a gu tumbisidego khidzo.

¹² Pfhumu Nungungulu a na gu ninge guti ni mapimo, gasi a gu vega gu fumela va na Israyeli, u kodza gu landrisa Nayo wa Pfhumu Nungungulu wago.

¹³ Khavbo avbo, u na andra, wa gu landrisa ni gu sayisa milayo ni sileletelo, esi Pfhumu Nungungulu a si leletedego ga Mosi khu kotani ya Israyeli; tiya longo u nga tedwi khu hwanga u khala rerema.

¹⁴ Wona nya gukhuwe nyi dzi garadzide ngudzu, nyi dongisela iso nya Nyumba ya Pfhumu Nungungulu, lizana magumi mazana (100.000) dzitaleta nya ndralama, likhulukhulu limwedo (1.000.000) nya dzitaleta nya parata ni sugu ni simbi khu talo nya idzo, nya gu, kha dza vegwa vbagikalotunu gasi dzi tidwa tengo wawe; nyi dongisede gambe mapulango ni siwindri nya singi, uwe nuwe u ngu kodza gu engedzela.

¹⁵ Vbavbandze nya isoso, u na ni sithumi gambe nya singi, vavati nya siwindri, vavbahi, vavati nya mapulango ni vatshavbo avo va vidzidwego khu mithumo yatshavbo.

¹⁶ Ndralama, parata, sugu ni simbi nyamba sayedwa tengo somo mandzani gwago, phara thumo, Pfhumu Nungungulu a na khale ni uwe!

¹⁷ Dhavhidhe a di leletela yatshavbo manganagana ya na Israyeli, gu va phasedzela mwanaye Solomoni, a va embela, khuye:

¹⁸ “Ina Pfhumu Nungungulu wanu mwalo vbakari gwanu, gani? Kha mu ningani gurula khu maphuvbo yatshavbo, gani? Kholu a ningede mandzani gwangu vavbanyi va tigoni momu. Va ngu yela gufumwa khu Pfhumu Nungungulu gumogo ni vathu vaye.

¹⁹ Olu mu vbweteni Pfhumu Nungungulu wanu khu monyo watshavbo ni hefemulo wanu watshavbo; olu dzi ningeleni mu vbaha Nyumba nya Guage ya Pfhumu Nungungulu, gasi Ngasa nya Gidzumeledzwano gya Pfhumu Nungungulu ni sombo satshavbo nya Guage, si reswa nyumbani momu yi na gu vbahedwago lina la Pfhumu Nungungulu.”