1 Dzikoronika 21 - Bhibhiliya Nya Guage

Gilovela nya vathu

¹ Khavbo avbo, Sathane a di wugela va na Israyeli, a kutsedzela Dhavhidhe gu gira gilovela nya vathu va na Israyeli.

² Dhavhidhe a di embela Jowabhi ni vathangeli nya vathu, khuye: “Indrani mu ya gira gilovela ga vathu va na Israyeli, gukhugela Bherisebha kala Dhani, mu ta nyi tivisani gasi nyi wuti tengo wakone.”

³ Khavbo avbo, Jowabhi a di khuye: “Pfhumu Nungungulu, a na engedzele tengo nya vathu vava khu lizana dzinyondro; gasi olu uwe mufumeli ni mune wangu, gasi vatshavbo vava khandri sithumi sa pfhumu yangu, gani? Khu ginani u resago kharati nandru ga va na Israyeli?”

⁴ Khu guralo, Jowabhi a di padwa khu magana ya mufumeli; khavbo avbo Jowabhi a di dzundrulugela ni Israyeli watshavbo; khu hwane a wuya Jerusalema.

⁵ Jowabhi a di ta ningela ga Dhavhidhe, tengo nya gilovela nya vathu; tigoni ga Israyeli gu diri ni likhulukhulu ni lizana magumi mazana (1.100.000) vama nya guphare matshari; tigoni ga Judha va diri mazana mana ni livbandre na mavili magumi magumi mazana (470.000) vama nya guphare matshari.

⁶ Aholu, va na Levhi ni va na Bhejami kha va nga sayedwa vbakari gwawe, kholu gileleto gegi gya mufumeli kha gya nga tsakisa Jowabhi.

Dhavhidhe a ngu hatha tsayiso

⁷ Satshavbo silo sesi, kha sa nga tsakisa Nungungulu, khu guralo, Uye a di veta Israyeli.

⁸ Khavbo avbo, Dhavhidhe a di embela Nungungulu, khuye: “Nyi ghohide ngudzu khu gu gira silo nya nga esi; khu guralo, nyi ngu gu lomba U tsetselela guvivba ga githumi gyago, kholu nyi thumide silo nya wupumbu ngudzu.”

⁹ Pfhumu Nungungulu, a di ganela ga Gadhi mutuguli nya misihalo ya Dhavhidhe, khuye:

¹⁰ “Indra u ya embela Dhavhidhe, khuwe: Pfhumu Nungungulu a ngu ganela kharati, khuye: Nyi ngu gu ninga silo siraru; u hatha gimwegyo gyakone, gasi gu u gi gira.”

¹¹ Khavbo avbo, Gadhi a dita ga Dhavhidhe, ata mu embela, khuye: “Pfhumu Nungungulu a ngu ganela kharati, khuye: Hatha gimwegyo u gi vbwetago.

¹² Gani myaga miraru na guri ni ndzala, mwendro migima miraru na wu gu sasedwa khu valala vago, u paywa khu matshari yawe, mwendro matshigu mararu nya guthegedwe khu litshari la Pfhumu Nungungulu, a gu tungu nya gusonge, Ngilozi ya Pfhumu Nungungulu na yi gu mbembisa omu tigoni gwatshavbo gwa Israyeli. Alakanyela u nyi embela phindrulo nyi yelago gu ya ningela uye a nyi rumidego.”

¹³ Khavbo avbo, Dhavhidhe a di embela Gadhi, khuye: “Nyi tade khu wuvi nya wukhongolo ngudzu. Nyi na thegele eni mandzani ga Pfhumu Nungungulu, kholu wuhindzi waye wukhongolo ngudzu, aholu nyi si thegeli mandzani ga vathu.”

¹⁴ Khavbo avbo, Pfhumu Nungungulu a di rumela tungu tigoni ga Israyeli, vafa khu tungu yoyo, livbandre na mavili magumi magumi mazana (70.000) vathu va na Israyeli.

¹⁵ Nungungulu a di rumela ngilozi gu ya sasela Jerusalema, na yiri vbakari nya gu sasele, Pfhumu Nungungulu, a di dzi laya khu guvivba gule, a embela ngilozi, khuye: “Basi, olu dusa mandza yago.” Ngilozi ya Pfhumu Nungungulu yi diri vbafuvbi ni Orinani, Mujebhuzi.

¹⁶ Dhavhidhe na khuside maho, a di wona Ngilozi ya Pfhumu Nungungulu na yi emide vbakari ni vbakari ga mafuni ni ndzadzini, na yiri ni litshari mandzani, na yi khusedzide gasi gu sasela Jerusalema; khavbo avbo, Dhavhidhe gumogo ni madhota, na va ambade silendra, va di thega khu khovbe mafuni.

¹⁷ Dhavhidhe a di ganela ga Nungungulu, khuye: “Gasi khandri eni nyi nga leletisago vathu gu gira gilovela, gani? Eni kamwe kheni nyi ghohidego, kheni nyi giridego guvivba gwatshavbo gogu; aholu dzinvuta dzedzi ginani dzi ghohidego? Oh! Pfhumu ni Nungungulu wangu, gyandza gyago gi na thegele vbatshani gwangu ni nyumbani ga babe wangu, nasiri gu thegela ga vathu vago.”

Dhavhidhe a ngu gira giluvelo vbagithalatunu gya Orinani

¹⁸ Khavbo avbo, Ngilozi ya Pfhumu Nungungulu yi di embela Gadhi a rumela Dhavhidhe a gwele aya dongisela giluvelo gya Pfhumu Nungungulu vbagithalatunu gya Orinani, Mujebhuzi.

¹⁹ Khu guralo, Dhavhidhe, a di gwela mayelano khu magana ya Gadhi a nga ganelago khu guruma ga Pfhumu Nungungulu.

²⁰ Orinani na thendregedzide, a di wona Ngilozi; aya sihala uye gumogo ni sanana saye sa sina a nga bani ari naso. Khu gikhati gyogyo, Orinani a di gu vbula tirigu.

²¹ Gikhati Dhavhidhe a ngata ga Orinani, uye a di mu wona na gu duga khu vbagithalatunu, a noga mbeli ga Dhavhidhe a thega khu khovbe mafuni.

²² Dhavhidhe a di embela Orinani, khuye: “Nyi ninge wulanga wowu nya githala gyago nyi vbahela avbo giluvelo gya Pfhumu Nungungulu, gasi tungu wu vbindre ga vathu; u nyi embela gambe ni tengo nyi yelago gu livba.”

²³ Khavbo avbo, Orinani a di embela Dhavhidhe, khuye: “Mufumeli ni mune wangu, dzega wulanga wowu wu khale wago, gira avbo iso u si wonago nari sadi; nyi na gu ninga ni dzimombe gasi u gira khidzo phaselo nya guvbiswe, ni dzikareta u gira khidzo dzikhuni, ni tirigu nya gugire khiyo ningelo nya guhodze; nyi ngu gu ninga satshavbo.”

²⁴ Dhavhidhe a di engedza a ganela ni Orinani, khuye: “Ahihi; nya gu vbweta gu renga khu tengo u na wu ranago; kholu kha nyi vbweti gu dzega iso a gu sago nyi ningela Pfhumu Nungungulu, ambari gu ningela miphaso nya guvbiswe nyamba yipwa wuvi.”

²⁵ Dhavhidhe a di livba ga Orinani khu wulanga wule, tengo nya livbandre na limwedo mazana (600) dzikilu nya ndralama.

²⁶ A vbaha avbo giluvelo gya Pfhumu Nungungulu, a ningela avbo miningelo nya guvbiswe, niyo nya gubonge, a lombelela ga Pfhumu Nungungulu. Uye a di mu phindrula khu nilo vbagiluvelotunu nya miphaselo nya guvbiswe.

²⁷ Pfhumu Nungungulu a di laya Ngilozi yi bweledza litshari wulangani gwalo.

Wulanga nya Nyumba ya Nungungulu

²⁸ Dhavhidhe na wonide nya gukhuye, Pfhumu Nungungulu a mu ningide phindrulo, khu gikhati gya gimwegyo vbagithalatunu gya Orinani Mujebhuzi, a di gira vbale miphaso nya dzimhamba.

²⁹ Kholu, tshatsha wa Pfhumu Nungungulu, owu Mosi a nga wu vbahago giwulani, ni giluvelo nya dzimhamba nya guvbiswe, khu gikhati gyogyo si di bani si ngari gigomoni gya Gibheyoni.

³⁰ Dhavhidhe a di gu tandrega gu hongola iyoyo gu ya wudzisa Pfhumu Nungungulu, kholu a di bani na ngari ni hwanga khu kotani nya litshari la Ngilozi ya Pfhumu Nungungulu.