1 Dzikoronika 19 - Bhibhiliya Nya Guage

Dhavhidhe a ngu pala va na Amoni ni Vaasiriya

¹ Khu hwane nya esi, a difa Nahasi, mufumeli wa na Amoni, a tshikedzwa wulangani gwaye khu mwanaye.

² Khavbo avbo, Dhavhidhe a di khuye: “Nyi na girela wuhindzi Hanuni, mwamana wa Nahasi, kholu babe waye a di nyi girede wuhindzi.” Khu guralo, Dhavhidhe a di rumela myango nya guye mu tangadzisa, khu gu fedwa khu babe waye. Khavbo avbo, sithumi sa Dhavhidhe si dita ga na Amoni, ga Hanuni, gasi guta mu tangadzisa.

³ Aholu manganagana ya va na Amoni ma di embela Hanuni khayo: “Ina wa gu alakanya gukhuwe Dhavhidhe, a gu rumela vatangadzisi khu kotani nya guninge githawo nyehe wago, gani? Khu dzi woni nya gukhuwe sithumi saye sa guta khedza gwadi litigo lago gasi va kodza gu li mbembisa, gani?”

⁴ Khavbo avbo, Hanuni, a di mola sithumi sa Dhavhidhe, a si vbalula ndzudzu, a si pferulela guambala khu vbakari ni vbakari kala vbamaragotunu a va bweledza nyamba ambala gilo.

⁵ Va nya gukari, va di ya embela Dhavhidhe khu mahungu ya vama vavili; khavbo avbo Dhavhidhe a di rumela vathu nya gu va khinge, kholu va diri ni dzitshoni nya dzikhongolo. Mufumeli a di rumela guya va embela, khuye: “Va na khale Jeriko, kala va dandrisa siledzu; khu hwane va na wuye.”

⁶ Va na Amoni na va wone nya gukhavo va vangide livengo ni Dhavhidhe, Hanuni ni va na Amoni, va di dzega likhumi mazana (1.000) dzitaleta nya parata, gasi gu lomba dzikareta ni vakhileli nya dzikavalu tigoni ga Mesopotamiya, ga Siriya wa Mahaka, ni ga Zobha.

⁷ Va diya lomba magumararu na mavili magumi mazana (32.000) nya dzikareta, mufumeli Mahaka, gumogo ni vathu vaye, va dita vata ghova mbeli ga Medhebha, va na Amoni navo, va dita khu madhoropani gwawe vata dzi patanisa va gira nyimbi.

⁸ Dhavhidhe na pwide isoso, a di rumela Jowabhi a va yela ni masotshwa yatshavbo nya dzindrena.

⁹ Va na Amoni va di duga va ya sasamela vbanyangwatunu nya lidhoropa na va somide, gasi vambe vafumeli va nga ta guta va phasedzela va dita vata ema khu hwindzwana.

¹⁰ Jowabhi na wonide nya gukhuye randredwe khu nyimbi, mbeli ni hwane, a dita hathela vatshavbo nya dzindrena va na Israyeli, a va rumela gu ya dwana ni Vaasiriya.

¹¹ Avo va nga tshalago a di va ningela ga ndriyaye Abhisayi, va ya fola va dwana ni va na Amoni.

¹² Jowabhi a di mu embela, khuye: “Vaasiriya, va gu bani vari ni tshivba nya gu nyi vbindre, uwe u nata u ta nyi phasedzela, aholu, va na Amoni va gu bani vari ni tshivba nya gu gu vbindre, eni nyi nata gu phasedzela.

¹³ Tiya longo hi dwana, hi dwanela va na gyathu, ni gu dwanela madhoropa ya Nungungulu wathu; Pfhumu Nungungulu a na gire iso si lulamidego mbeli gwaye.”

¹⁴ Khavbo avbo, Jowabhi gumogo ni vama a nga bani ari navo, va di thanga mbeli va dwana ni Vaasiriya; Vaasiriya va di padwa va tutuma mbeli gwaye.

¹⁵ Va na Amoni, na va wonide gukhavo Vaasiriya va tutumide, avo navo va di tutuma mbeli ga Abhisayi ndruye wa Jowabhi, va ya bela dhoropani; khavbo avbo Jowabhi a di bwelela Jerusalema.

¹⁶ Vaasiriya na va wone gukhavo va padwe khu va na Israyeli, va di rumela myango nya gu ya rane avo va nga bani va khade khisikheyi nya tsongo; Sofaki, muthangeli nya dzinyimbi dza Hadhadhezeri; a di thanga mbeli gwawe.

¹⁷ Dhavhidhe, na tivisidwe mahungu yaya, a di tshanganisa vatshavbo va na Israyeli, a tshatuga tsongo wa Joridhani, ata tshangana navo a soma matshari a phela gu dwana navo; Dhavhidhe na rumede gu va dwane ni Vaasiriya, avo va di dwana naye.

¹⁸ Aholu Vaasiriya va di tutuma mbeli ga va na Israyeli, Dhavhidhe a di songa vbakari ga Vaasiriya, livbandre na mavili magumi mazana (7.000) vama nya gukhilele dzikareta ni magumana magumi mazana (40.000) vama nya gugimbile khu migondro; a songa ni Sofaki, muthangeli nya nyimbi.

¹⁹ Avbo sithumi, sa Hadhadhezeri, si padwego khu va na Israyeli, va dita vata lomba gurula ga Dhavhidhe, va khoza gwaye; khavbo avbo Vaasiriya gima kha va nga dzumela gambe gu ya phasedzela va na Amoni.