1 Dzikoronika 17 - Bhibhiliya Nya Guage

Gidzumeledzwano gya Pfhumu Nungungulu ni Dhavhidhe

¹ Avbo Dhavhidhe a nga khadzisega gwadi nyumbani gwaye, a di embela Natani, khuye: “Nga wona, eni nya gu lala nyumbani nya guvbahwe gwadi khu mapulango nya sedhari, aholu Ngasa nya Gidzumeledzwano ya Pfhumu Nungungulu yi ngari tshatshani.”

² Khavbo avbo, Natani a di mu hakha, khuye: “Gira satshavbo si guromo monyoni gwago, kholu Nungungulu a na ni uwe.”

³ Aholu khu wutshigu wowo wa wumowo, Lito la Pfhumu Nungungulu li dita ga Natani, khilo:

⁴ Indra u ya embela githumi gyangu Dhavhidhe, khuwe: Pfhumu Nungungulu a ngu ganela kharati, khuye: Khandri uwe u na gu nyi vbahelago nyumba nya gukhale umo eni;

⁵ kholu gukhugela litshigu nyi nga dusa Israyeli khu Egipito kala na muhuno, gima kha nya khala nyumbani, aholu nyi di legalega khu tshatsha ni tshatsha, umo nya ndranga ni ndranga.

⁶ Malangani yatshavbo nyi gimbidego ni va na Israyeli, ina gyomo nya gukari nyi ganedego ni moyo nya valamuli vaye, nyi va rumidego gu havisa vathu vangu, kheni: Khu ginani mu si nyi vbaheligo nyumba nya sedhari, gani?

⁷ Olu u na embela kharati githumi gyangu Dhavhidhe, khuwe: Pfhumu Nungungulu nya Tshivba Yatshavbo, a ngu ganela kharati, khuye: Eni kamwe, nyi gu pharide nyi gu dusa guhavisani nya dzinvuta, gasi u fela gu khala muthangeli wa vathu vangu va na Israyeli.

⁸ Dzindzilani gwago gwatshavbo nyi gimbide nago, nyi mbembisa valala vago vatshavbo mbeli gwago, nyi gu ninga lina nya likhongolo nya gukhugege kha nga malina nya vathu va khusegidego mafuni.

⁹ Nyi dongisede wulanga vathu vangu va na Israyeli; nyi va emisa umomo gasi va dzi vbahela mitshatsha yawe, avo gima kha va na nga phalalegiswa ni gu tshaniswa gambe khu vathu nya guvivbedwe khu myonyo kha nga gale,

¹⁰ gukhugela litshigu nyi emisidego valamuli ga vathu vangu va Israyeli; nyi di thesa vbavbatshi vatshavbo valala vago, gambe nyi gu tumbiside gukheni Pfhumu Nungungulu a na gu vbahela nyumba.

¹¹ Gikhati ma na gu tadzisegago matshigu yago nya guhongole vbafuvbi ga vavelegi vago, nyi na khusedza monyo nya livelego lago, a na bani ari mwamana wago, nyi na tiyisa mufumo wago.

¹² Uye khuye a na gu nyi vbahelago nyumba; Eni nyi na tiyisa gikhalo gyaye nya wufumu kala gupindruga.

¹³ Eni kamwe nyi na khala babe waye, ni uye nuye a na khala gyanana gyangu; lihaladzo langu li na bani liri avbo gwaye; kha nga nyi li dusidego ga wule a nga phela khuye uwe nyi si gu emisi.

¹⁴ Gambe nyi na mu emisa nyumbani gwangu, nyi tiyisa wufumu waye, gikhalo gyaye nya wufumu gi na tiyiswa kala gupindruga.

¹⁵ Natani a di ya tshamusela Dhavhidhe magana yatshavbo yaya gumogo ni giwoniso gyakone.

Dhavhidhe a ngu bonga Nungungulu

¹⁶ Khavbo avbo, mufumeli Dhavhidhe a di bela Nyumbani ga Pfhumu Nungungulu aya ganela mbeli gwaye, khuye: Pfhumu Nungungulu, kheni mani eni, ginani iyo ndranga yangu nya gukala u nyi vbohisa avbo?

¹⁷ Ambari kharato, uwe Nungungulu, u si wonide nari sidugwana mahoni gwago; kholu, u ganede khu gale khu mahungu nya nyumba ya githumi gyago; gambe u nyi wonide kha nga khwatshi nyi moyo nya muthu a khusegidego, uwe Pfhumu Nungungulu.

¹⁸ Eni Dhavhidhe, nyi na ganela gambe kheni ginani khu mafundza yatshavbo yaya U nyi giredego eni githumi gyago? Kholu Uwe U ngu giti githumi gyago.

¹⁹ Uwe Pfhumu Nungungulu khu lihaladzo U godego khilo githumi gyago, ni gu gola nya monyo wago, U nyi girede wugulu watshavbo wowu gasi gu mu wonisa silo sesi nya sikhongolo.

²⁰ Pfhumu Nungungulu, mwalo a fananago ni Uwe, gambe mwalo mumbe nungungulu vbavbandze ga Uwe, kha nga hi sipwidego khu dzindzeve dzathu.

²¹ Khu levbini lifumbu li fananago ni vathu vago, va na Israyeli? Lifumbu la mafuni li gu ilo basi, a gu ilo U li dzegisidego tigoni ga Egipito, gasi guta khala vathu vago; vata gu girela lina lago li thavisega khu silo nya guthise vbakari nya mayigo khu gu tutumisa valala mbeli gwawe.

²² U emiside vathu vago va na Israyeli, gu khala vathu vago kala gupindruga, gasi Uwe Pfhumu Nungungulu U khala Nungungulu wawe.

²³ Gasi olu, Uwe Pfhumu Nungungulu lito U ganedego khu mahungu ya githumi gyago, mayelano ni livelego laye, si tiyise kala gupindruga; si na girege kha nga guganela gwago.

²⁴ Si tiyise, lina lago li na khusedzwe kala gupindruga, gu na ganedwa gupwani Pfhumu Nungungulu nya Tshivba Yatshavbo, khu Nungungulu wa na Israyeli, uye Nungungulu wa Israyeli; yi na tiyiswe ndranga ya Dhavhidhe, githumi gyago.

²⁵ Kholu, uwe kamwe Nungungulu wangu, u pwadzide dzindzeveni ga khumbi yago, gukhuwe U na mu vbahela nyumba, khavbo avbo, githumi gyago gi manide tshivba nya gute mbeli gwago gi ta gu girela nombelo yoyu.

²⁶ Olu uwe Pfhumu Nungungulu, uwe kamwe U Nungungulu u ningidego magana yaya nya yadi ga githumi gyago ni wuhindzi wowu.

²⁷ Gasi olu, nyi ngu lomba u kategisa nyumba ya githumi gyago, gasi yi simama mbeli gwago kala gupindruga, kholu Uwe Pfhumu Nungungulu U yi kategiside, gambe yi na simama gu kategiswa gikhati gyatshavbo.