1 Dzikoronika 14 - Bhibhiliya Nya Guage

Dhavhidhe a ngu gira pwanano ni Hiramo

¹ Khavbo avbo, Hiramo, mufumeli wa Tiro, a di rumela myango ga Dhavhidhe, ni mapulango nya Sedhari, vavbahi ni vavati, gasi vaya mu vbahela nyumba.

² Khavbo avbo, Dhavhidhe, a di si pima gukhuye Pfhumu Nungungulu a mu emiside gu khala mufumeli wa Israyeli; kholu mufumo waye wu di khusedzwa ngudzu, khu gu godwa khu vathu vaye va na Israyeli.

Sanana sa Dhavhidhe a velegidego Jerusalema

³ Dhavhidhe a di engedza a dzega vambe vanyamayi Jerusalema, a velega gambe sanana nya sikhwathana ni vanyamahegyane.

⁴ Aya khu malina ya sanana si velegidwego khu Dhavhidhe dhoropani ga Jerusalema: Samuwa, Sobhabhi, Natani, Solomoni,

⁵ Ibhari, Elisuwa, Elipeleti,

⁶ Noga, Nefegi, Jafiya,

⁷ Elisama, Bheyeliyadha ni Elifeleti.

Dhavhidhe a ngu pala Vafilistiya

⁸ Avbo Vafilisitiya va nga pwago gupwani Dhavhidhe a todzidwe gu khala mufumeli wa Israyeli watshavbo, va di gwela vatshavbo gasi guta mola Dhavhidhe; Dhavhidhe na si pimide, a di duga a va khinga.

⁹ Aholu Vafilisitiya va dita mu randrela kovani wa Refayimi.

¹⁰ Khavbo avbo, Dhavhidhe a di wudzisa ga Nungungulu, khuye: “Ina nyi ngu dzi kodza guya dwana ni Vafilisitiya? U na va ningela mandzani gwangu, gani?” Pfhumu Nungungulu a di hakha, khuye: “Indra, kholu nyi na va ningela mandzani gwago.”

¹¹ Khavbo avbo, Dhavhidhe a di gwela gumogo ni masotshwa yaye, Bhahali-Perazimi, aya va sasela iyoyo; a ganela, khuye: “Nungungulu phalalegiside valala mbeli gwangu, kha nga mati ma gogiswago. Khu guralo, a di rana wulanga wule khuye Bhahali-Perazimi.”

¹² Va di tutuma va tshiya sithombe sa vanungungulu vawe, Dhavhidhe, a di rumela gu va si vbisa.

¹³ Vafilisitiya va di engedza gu wusa yimbe nyimbi kovani.

¹⁴ Dhavhidhe a di engedza a wudzisa Nungungulu; Nungungulu a mu embela, khuye: U nga va landri khu hwane, aholu va dzuwuluge uya mbeli gwawe, u naya va dhumela khu misimboni nya mimora.

¹⁵ Wa gupwa ligwaha nya sikingo nya vathu vbatshani nya mimora, khavbo u na phelago litunga, kholu Nungungulu a na bani a thangide mbeli gwago gu ya sasela Vafilisitiya ni dzinyimbi dzawe.

¹⁶ Dhavhidhe a di gira kha nga gugola ga Pfhumu Nungungulu, va di sasela dzinyimbi dza Vafilisitiya, gukhugela Gibheyoni kala Gezeri.

¹⁷ Khu guralo, lina la Dhavhidhe li di phalalega khu yatshavbo mayigo yale; Kholu Pfhumu Nungungulu a mu giride a ningwa githawo khu mayigo yatshavbo.