1 Dzikoronika 12 - Bhibhiliya Nya Guage

Masotshwa ya Dhavhidhe

¹ Ava khavo va ngata ga Dhavhidhe, nari Zikalagi, gikhati a nga bani a gu thava Sawule, mwamana wa Khisi; va diri avo nya dzindrena va nga bani va mu phasa umo nya nyimbi.

² Va di somide malaho ni gu kodza gu rinya siwindri khu nyamudye ambari khu nyambade, ni gu khwandra siholoma. Va diri vandruye va Sawule, nya lihundzu la na Bhejami.

³ Muthangeli wawe, a diri Ayezeri, ni Jowasi, sanana sa Semaha, wa dhoropani ga Gibheya; Jeziyeli ni Peleti, sanana sa Azimaveti, ni Bheraka ni Jewu, nya Muanatoti;

⁴ Isimaya, nya Mugibhiyoni, moyo nya ndrena ni muthangeli wa avo nya magumararu dzindrena;

⁵ Jeremiya, Jahaziyeli, Jowanani ni Jozabadi, mugidherati;

⁶ Eluzayi, Jerimoti, Bheyaliya, Semariya, Sefatiya wa na Harufi;

⁷ Elikana, Isiya, Azareli, Jowezeri ni Jasobheyamo, Vakoreyita;

⁸ Jowela, Zebhadhiya, sanana sa Joramo, wa Gedhori.

⁹ Va na Gadhi, va dita dzi tshanganisa ni Dhavhidhe likhokholani la giwulani, va diri vama nya tshivba, dzindrena nya nyimbi, nya guphare matshari ni sitshangu; va diri ni dzikhovbe nya gufanane ni dzinghala, va tutuma gu fanana ni vamangulwe musigomoni;

¹⁰ avo va diri ava: Muthangeli wawe, a diri Ezeri; nya wuvili, a diri Obhadhiya; nya wuraru, a diri Eliyabhi;

¹¹ Nya wu na, a diri Misima; nya livbandre, a diri Jeremiya;

¹² nya livbandre, na moyo a diri Atayi; nya livbandre na vavili, a diri Eliyeli;

¹³ nya livbandre na wuraru, a diri Jowanani; Elizabhadhi, a diri nya livbandre na wu na;

¹⁴ nya likhumi, a diri Jeremiya; nya likhumi na moyo, a diri Makibanayi.

¹⁵ Khavo ava va nga bani vari va na Gadhi, avo va diri vathangeli nya dzinyimbi; uye nya dugwana wawe a di bhanya enga lizana (100) vama, aholu uye nya khongolo a di bhanya likhumi mazana (1.000) vama.

¹⁶ Khavo ava va tshatugidego tsongo wa Joridhani, khu ngima nya guhegule, avbo tsongo wu nga bani wu gugumugide wu bwelo khavbo wu goga khu mudzibambe, va tutumiswa vatshavbo va nga bani va gu vbanya mikovani, khu Khugadambo, ambari khu Pfoladambo.

¹⁷ Va na Bhejami ni va na Judha, vomo va ngata dzi tshanganisa ni Dhavhidhe, likhokholani.

¹⁸ Dhavhidhe, a di va khinga aya va embela, khuye: “Enu, mwa gu bani muri mwa guta avbo gwangu khu gurula ni guta nyi phasedzelani, monyo wangu wu na hungana nanu; aholu, a gu bani nari mwa gu vbweta gu nyi ningela ga valala vangu, Nungungulu wa vababe vathu, a na si wone ni gu lamula.”

¹⁹ Khavbo avbo, Amasayi, moyo nya vathangeli wa ava nya magumararu, a di beledwa khu Liphuvbo a ganela, khuye: “Ethu hi vathu vago, uwe Dhavhidhe, ethu hi womo gumogo nago, uwe mwamana wa Jese! Gurula, gurula gu na khale ni uwe! Ni gurula gu na khale ni vale va gu phasedzelago! Kholu Nungungulu wago, a ngu gu phasedzela.” Dhavhidhe a di va hakha, a va emisa gu khala vathangeli nya nyimbi.

²⁰ Vomo navo va na Manasi va ngaya dzi tshanganisa ni Dhavhidhe, gikhati a ngata ni Vafilisitiya, guta dwanisana ni Sawule, aholu uye kha nga phasedzela Vafilisitiya, kholu manganagana nya Vafilisitiya, ma di va laya ma va bweledza na va gukhavo: A na hi thava a hongola ga mufumeli waye Sawule, a logovedza mihungo yathu.

²¹ Avbo a nga bwelelago, a wuya Zikalagi, va na Manasi va diya dzi tshanganisa avbo gwaye a gu ava: Adhina, Jozabhadhi, Jedhiyayeli, Mikayeli, Jozabhadhi, Eliyu ni Ziletayi, vathangeli nya sikwata nya likhumi mazana (1.000) sa na Manasi.

²² Vathu vava va diri vaphasedzeli va Dhavhidhe, avbo a nga bani na gu dwana ni dzinyimbi nya vaphangi, kholu avo vatshavbo va diri vama nya tshivba na vari vathangeli nya dzinyimbi.

²³ Kholu khu gikhati gile, khu litshigu ni litshigu, gu di vboha ga Dhavhidhe masotshwa nya gute vata mu phasedzela, kala avbo gu nga khala libutho nya likhongolo, kha nga libutho la Nungungulu.

Dzindrena dzi dzudego ga Dhavhidhe dhoropani ga Hebroni

²⁴ Oyu khu tengo nya vama va ngatago ga Dhavhidhe dhoropani ga Hebroni, na va somide gasi guta mu dandrisa a khala mufumeli, vbawulangatunu ga Sawule, kha nga guruma ga Pfhumu Nungungulu.

²⁵ Va na Judha va nga bani pharide matshari ni sitshangu, tengo wawe wu diri; livbandre na limwedo magumi ni livbandre na mararu mazana (6.800) vama va dzi dongisedego guya nyimbitunu.

²⁶ Ga va na Simiyoni, gu diri ni tengo nya livbandre na mavili magumi mazana ni lizana (7.100) vama nya gusome matshari,

²⁷ va na Levhi; gu diri ni magumana na livbandre na limwedo mazana (4.600);

²⁸ Joyadha; a nga bani ari muthangeli nya nyumba ya Aroni, a diri ni magumararu na livbandre na mavili mazana (3.700) vama;

²⁹ Sadhoki; a nga bani ari lidzaha ni ndrena nya nyimbi, a di reside khu nyumbani ga babe waye, magumavili vathangeli nya dzindrena.

³⁰ Khu ga va na Bhejami; a gu vandruye va Sawule, gu dita magumararu mazana (3.000); kholu kala gikhati gyogyo, nya vangi vawe, va di bani va nga gu vega gitumbo gyawe ga Sawule.

³¹ Khu ga na Efrayimi; gu dzude tengo nya magumavili magumi ni livbandre na mararu mazana (20.800) vama nya dzindrena nya guthavisege vbakari nya dzinyumba dza vababe vawe.

³² Ga gipandre nya lihundzu la na Manasi, gu dzude tengo nya likhumi na livbandre na mararu magumi mazana (18.000), va nga hathedwago khu malina yawe, gasi guya pharisa ndronga nya wufumu Dhavhidhe.

³³ Khu ga va na Isakari; va nga bani vari ni guti dzinango gasi Israyeli a ti ginani nya guyele gu gira, gu dita tengo nya mazana mavili (200) vathangeli, ni vandriyaye vatshavbo nya gu rumwe khuye.

³⁴ Khu ga va na Zebhuloni; avo va kodzago gu soma matshari vaya nyimbitunu, va diri tengo nya livbandre magumi magumi mazana (50.000), va nga dzi ningela guya nyimbitunu khu monyo wawe watshavbo.

³⁵ Va na Nafitali, va diri likhumi mazana (1.000) dzindrena nya nyimbi, va ngatago ni tengo nya magumararu na livbandre na mavili magumi mazana (37.000), na va somide khu matshari ni sitshangu.

³⁶ Khu ga va na Dhani; gu dzude tengo nya magumavili na livbandre na mararu magumi ni livbandre na limwedo mazana (28.600) vama, nya gusome guya nyimbitunu.

³⁷ Khu ga va na Aseri; gu dzude tengo nya magumana magumi magumi mazana (40.000) vama va dongisedwego guya dwana.

³⁸ Khu khisikheyi nya tsongo wa Joridhani, gu diri ni va na Rubheni, ni va na Gadhi, ni gipandre gya na Manasi, va nga bani vari tengo nya lizana ni magumavili magumi mazana (120.000), na va somide khu yatshavbo mafumbu nya matshari.

³⁹ Tengo watshavbo yoyu nya vama nya nyimbi va di yiswa Hebroni, na va sasamedzedwe khu sikwata nya nyimbi, na va dzi emisede khu monyo wawe watshavbo guya emisa Dhavhidhe gu khala mufumeli wa Israyeli; ni va na Israyeli vatshavbo; ni mitshaledwa yatshavbo ya Israyeli, va di dzi emisede guya pharisa Dhavhidhe ndronga nya wufumu.

⁴⁰ Va diya khala gumogo ni Dhavhidhe matshigu mararu, va hodza ni gu sela naye, kholu vandriyaye va di mu dongisede satshavbo.

⁴¹ Vaakelane vaye navo, va nga bani vari vbafuvbi gwaye, gumogo ni va na Isakari, va na Zebhuloni, va na Nafitali va di mu resela guhodza na va vbagede khu vbadziburutunu, dzingameriya, dzikavalu ni dzimombe, na va dongisede wuguvbi ni mikwama nya dzikhindru, ni sitsatsa nya dziuvha, wadwa, mafura, dzimombe ni dzinvuta nya dzingi; kholu tigoni ga Israyeli, gu diromo gutsaka nya gukhongolo ngudzu.