1 Dzikoronika 11 - Bhibhiliya Nya Guage

II MATIMO YA DHAVHIDHE Dhavhidhe a ngu todzwa mafura a khala mufumeli

¹ Khavbo avbo, vatshavbo va na Israyeli va di ya tshangana dhoropani ga Hebroni ga Dhavhidhe, va mu embela, khavo: “Wona nya gukhuwe ethu hi marambo yago ni nyama yago.

² Gale Sawule na ngari mufumeli khuwe u nga bani u thangela dzinyimbi dza Israyeli, gu bela ni gu duga. Pfhumu Nungungulu wago, a gu embede gambe, khuye: Uwe havisa vathu vangu va na Israyeli, u na khala muthangeli wa Israyeli!”

³ Khu guralo, madhota yatshavbo ya na Israyeli ma dita wonana ni mufumeli dhoropani ga Hebroni; ni Dhavhidhe a di gira navo gidzumeledzwano Hebroni, mbeli ga Pfhumu Nungungulu. Va di todza mafura Dhavhidhe gasi a khala mufumeli wa Israyeli kha nga guganela ga magana ya Pfhumu Nungungulu, a nga ma rumelago khavbo ga Samuweli.

Dhavhidhe a ngu wandra lidhoropa la Jerusalema

⁴ Dhavhidhe gumogo ni va na Israyeli vatshavbo, va di khuga va hongola Jerusalema gu nga bani gu ranwa pwani Jebhusi, kholu va di romo umo Vajebhusi, a gu avo nya guphele va vbahidego mule.

⁵ Vavbahi va Jebhusi va di embela Dhavhidhe, khavo: “Uwe gima khu na nga bela omu.” Aholu Dhavhidhe kodzide gu sasela likhokhola la Siyoni a li wandra; kala na muhuno la gu ranwa pwani Didhoropa la Dhavhidhe.

⁶ Kholu Dhavhidhe a di khuye: “Uye a na gu phelago khuye a songa Vajebhusi, a na khala muthangeli ni mugimbidzisi nya nyimbi.” Khu guralo, Jowabhi, mwamana wa Zeruya, a di phela khuye gu gwela, a gu dandriswa a khala muthangeli.

⁷ Dhavhidhe a di khala mulikhokholani momo, khidzo kharato li ranwago gupwani Didhoropa la Dhavhidhe.

⁸ A di vbaha lidhoropa khu maphuvbo yatshavbo gukhugela Milo, Jowabhi a vbedzisa umo gu nga bani gu tshade.

⁹ Dhavhidhe a di engedzelana gudandra khu tshivba, kholu Pfhumu Nungungulu nya Tshivba Yatshavbo a diri naye.

Dzindrena dza Dhavhidhe

¹⁰ Edzi khu dzindrena nya dzikhongolo dza Dhavhidhe, idzo dzi nga mu tiyisedza mufumoni gwaye, gumogo ni va na Israyeli vatshavbo, gasi va mu gira mufumeli, kha nga guganela ga Pfhumu Nungungulu mayelano ni va na Israyeli.

¹¹ Sasamedzo nya dzindrena dza Dhavhidhe khowu: Jasobheyamo, mwamana wa Hakimoni, muthangeli nya tsawa nya magumararu, uye a nga khusa litshari laye a dwana ni mazana mararu (300) vama, a va sasela khu gumogo.

¹² Khu hwane gwaye a landrela Eliyazari, mwamana wa Dhodho, Muawoyi, a diri moyo nya dzindrena dza dzitharu.

¹³ Khuye va nga bani vari gumogo ni Dhavhidhe, tigoni ga Pasi-Dhamimi, avbo va nga bani va tombanide avbo Vafilisitiya gasi guta dwana, avbo li nga bani li romo lithembwe li nga bani liri ni tirigu; va na Israyeli va di tutuma va thava Vafilisitiya.

¹⁴ Avo va di bela vbakari nya lithembwe lile, va dzi dwanela, va songa Vafilisitiya; Pfhumu Nungungulu a di va ninga gupala nya gukhongolo.

¹⁵ Dzindrena dzitharu nya dzile nya magumararu, dzi di relela dziya ga Dhavhidhe, phagoni nya giwindri gya Adhulamo; libutho la Vafilisitiya, li di zumbide khu kovani wa Refayimi.

¹⁶ Khu gikhati gyogyo, Dhavhidhe a diri likhokholani, gasi libutho la Vafilisitiya li di zumbide Bhetlehema.

¹⁷ Dhavhidhe a di ganela khu gu dogorela, khuye: “Nari pwani nya gu mana wa gu nyi ninga mati ya pusuni, yi guromo vbafuvbi ni mwanya wa Bhetlehema nyi sela!”

¹⁸ Khavbo avbo, dzindrena dza dzitharu dzi di khuga dzi tsemakanya khu vbakari nya mazumbo ya Vafilisitiya, dziya rega mati namboni wa nyangwani ga Bhetlehema, dzi ma resa ga Dhavhidhe; aholu Dhavhidhe kha dzumela gu sela, uye a di ma vbaladza ma khala mhamba nya gulombelele khiyo ga Pfhumu Nungungulu.

¹⁹ A di ganela, khuye: “Si na manege hwindzo gwangu, gu gira silo nya nga esi; ina eni nyi ngu yela gu sela novba wa vathu vava va nga dzega womi wawe va wu yisa mhangoni, gani?” Kholu va nyi resede mati yaya khu gu ningela womi wawe. Khidzo nyi ngamba dzumela khidzo gu sela. Khiso esi si nga girwago khu dzindrena dza dzitharu.

²⁰ Abhisayi nuye, ndruye wa Jowabhi, a diri khongolo nya dzindrena nya magumararu, kholu avbo a nga khusedza litshari laye a dwana ni mazana mararu (300) vama, a di va sasela khu gumogo; a diri ni lina vbakari ga avo va vararu.

²¹ Vbakari ga avo nya magumararu, khuye a nga bani a zundzega ngudzu va mu vega gu khala muthangeli wawe, a manega nari uye nya guhegule ga avo nya vararu.

²² Bhenaya nuye, mwamana wa Joyadha, nya gudugele Gabhizeyeli, a diri mwama nya ndrena a nga girago mithumo ya yikhongolo; a di songa dzindrena dzimbili dza Mowabhi, a relela gambe aya songa nghala yi nga bani yiri phalani khu litshigu gu nga bani na guri ni thondrwane.

²³ A di songa gambe mwama nya gulaphe nya Mugipiti, a nga bani nari ni pimo nya livbandre mikono; mwama yoyu a diri ni litshari mandzani gwaye nya gufanane ni gikari gya mulugi, aholu Bhenaya a di mu dhumela khu ndronga a wandra litshari a mu songa khilo.

²⁴ Silo sesi si giridwe khu Bhenaya, mwamana wa Joyadha, oyu a manidego nuye lina nya lisima vbakari nya dzindrena dza dzitharu.

²⁵ A di gu zundzega ngudzu guvbindra avo nya magumararu, aholu kha nga vboha ga ava nya vararu nya guhegule, Dhavhidhe a di mu emisa gu khala muthangeli nya vawoneleli vaye.

²⁶ Avo va nga bani vari dzindrena nya nyimbi khava: Asayeli ndruye wa Jowabhi; Elanani, mwamana wa Dhodho, wa Bhetlehema.

²⁷ Samoti, Muharori; Helesi, Mupeloni;

²⁸ Ira, mwamana wa Ikesi, Mutekoyi; Abhiyezeri, Muanatoti;

²⁹ Subhekayi, Muhusani; Itayi, Muatoti;

³⁰ Maharayi, Munetofati; Heledhi, mwamana wa Bhahana, Munetofati;

³¹ Itayi, mwamana wa Ribhayi, wa Gibheya, nya lihundzu la na Bhejami; Bhenaya, Mupiratoni;

³² Urayi, wa gitsongwanani gya Gahasi; Abhiyeli, Muarabhati;

³³ Azimaveti, Mubhaharumi; Eliyabha, Musahalibhoni;

³⁴ Bheni-Hasemi, Mugisoni; Jonatane, mwamana wa Sage, Muharati;

³⁵ Ayiamu, mwamana wa Sakari, Muharari; Elifali, mwamana wa Uri;

³⁶ Heferi, Mukirati; Ayiya, Mupeloni;

³⁷ Heziro, Mukarimeli; Nahari, mwamana wa Ezibayi;

³⁸ Joyele, ndruye wa Natani; Mibhari, mwamana wa Geri;

³⁹ Zeleki, Muamoni; Naharayi, Mubheroti; muphari nya matshari ya Jowabhi, mwamana wa Zeruya,

⁴⁰ Ira, Mutirita; Garebhi, Mutirita;

⁴¹ Uriya, Muhiti; Zebhadi, mwamana wa Alayi;

⁴² Adhina, mwamana wa Siza, Murubheni; muthangeli wa na Rubheni, a nga bani nari ni gikwata nya magumararu vama;

⁴³ Hanani, mwamana wa Mahaka; ni Josafati, Muteni;

⁴⁴ Uziya, Muasitarati; Sama ni Jeyeli, sanana sa Hotamo, Muaroweri;

⁴⁵ Jedhiyayeli, mwamana wa Seniri; ni ndriyaye Jowa, Mutisi;

⁴⁶ Eliyeli, Muavhi; Jeribhayi ni Josaviya, sanana sa Elinahamu; ni Etima, Mowabhita;

⁴⁷ Eliyeli, Obhedhi, Jahasiyeli, wa Zobha.