Varoma 8 - Bhibhiliya Nya Guage

Guvbanya khu Liphuvbo la Nungungulu

¹ Aholu, olu wu mwalo gambe nandru ga vale va tshanganisidwego ni Jesu Kristo.

² Kholu nayo nya Liphuvbo nya guvbanye li ningago guvbanya khu gu hi tshanganisa ni Jesu Kristo wu nyi tshude ga nayo nya gighoho ni ga tshivba nya gufe.

³ Nungungulu kodzide gu gira iso Nayo wu nga si tandrega khu gu vbungudwa tshivba khu tumbunugo nya wuthu. Uye konide gighoho ndrani nya tumbunugo nya muthu, khu gu hi rumela Mwanaye, a dzudego khu tumbunugo nya idzosaye ni tumbunugo nya muthu nya gighohi. Kharato Nungungulu pade gighoho.

⁴ Nungungulu giride esi gasi gululama nya Nayo gu tadzisega avbo gwathu, ethu hi si fumedwigo gambe khu gudogorela nya tumbunugo nya wuthu, aholu hi fumedwago khu Liphuvbo nya Guage.

⁵ Kholu, ava va vbanyago khu tumbunugo nya wuthu va gu dzi garadza khu gu landra esi si rumwago khu gudogolela nya tumbunugo. Aholu ava va vbanyago khu Liphuvbo nya Guage va gu garadzega khu gu landrisa esi Liphuvbo li lombago.

⁶ Gu dzi garadza khu gu landra gudogolela nya tumbunugo nya wuthu, gwa gu ninga gufa. Gasi gu dzi garadza khu gu landrisa esi Liphuvbo nya Guage li rumago, gwa gu ninga guvbanya ni gurula.

⁷ Gudogolela gwathu nya guvivbe nala wa Nungungulu, kholu kha gu yingeli Nayo wa Nungungulu, gambe kha gu dzi kodzi gu wu landrisa.

⁸ Ava va landrisago mavbanyelo nya tumbunugo wowo, gima kha va dzi kodzi gutsakisa Nungungulu.

⁹ Gasi enu, mwa gu bani muri ni Liphuvbo la Nungungulu khu lisine, kha mu nga gu fumwa gambe khu gudogorela nya tumbunugo nya wuthu, aholu mwa gu fumwa khu Liphuvbo nya Guage. Muthu a gu mwalo Liphuvbo la Kristo, khandri wa Kristo.

¹⁰ Liphuvbo la Kristo la gu bani li gu vbanya ndrani gwanu, givili gi fude ga gighoho, kholu Liphuvbo nya Guage li ngu mi ninga guvbanya khu gu mi tshanganisa wulongoni gwa Nungungulu.

¹¹ Mwa gu bani muri ni Liphuvbo la wule a nga wusago Kristo khu ga vafudego a mu wuyisa guvbanyani, uye a wusidego Kristo, a na wusa niso sivili sanu nya gufe khu tshivba nya Liphuvbo nya Guage li vbanyago ndrani gwanu.

¹² Khu kharato, vandruye, olu kha hi nga gu fumwa gambe khu tumbunugo nya wuthu, hi mwalo giguruvedzo nya gulandrise gudogolela gwaye.

¹³ Kholu mwa gu landrisela mavbanyelo nya gudogolele gogo, mwa gu bela khu ndzila yi mi yisago gufani. Aholu mwa gu songani mithumo nya wughohi khu tshivba nya Liphuvbo nya Guage, mu na vbanya.

¹⁴ Vatshavbo vale va vbanyago kha nga idzo li rumago khidzo Liphuvbo nya Guage, sanana sa Nungungulu.

¹⁵ Kholu, Liphuvbo mu hakhidego kha li mi giri dzikhumbi ni gu mi thela hwanga; aholu la gu mi gira sanana sa Nungungulu. Khilo li hi kutsago gu rana khethu: “Abbha! Baba wathu.”

¹⁶ Ilo Liphuvbo la limwedo la gu tshangana ni hefemulo wathu gasi li fakaza gukhilo hi sanana sa Nungungulu.

¹⁷ Ha gu bani hiri sanana, gu yeyedza gu pwani hi vahodzi gambe nya thomba; hi vahodzi nya thomba ya Nungungulu gumogo ni Kristo. Ha gu tshaniseka naye, hi na hengela gambe naye wudhumoni gwaye.

Hi ngu tumba wudhumo wutago

¹⁸ Nyi ngu tumba gukheni sitshaniso sa mafuni momu khandri gilo ha gu si pimanisa ni wudhumo wa Nungungulu a hi vegisedego.

¹⁹ Sivangwa satshavbo somo si khevisela, wutshigu ni mihani, na si gu lindrela gu wona litshigu Nungungulu a na gu dzi wonegisago ga sanana saye.

²⁰ Kholu sivangwa si fumedwe khu tshivba ya wule a si yisago gumbembani, nasiri khu gudzina gwa iso, aholu khu gugola gwa wule a nga si vanga,

²¹ na si gu lindrela gu khiso mwendro si na tshudwa wugumbini, ni gumbembani, gasi si guta hengela wudhumoni nya gutshulege nya sanana sa Nungungulu.

²² Hi ngu dziti nya gukhethu kala matshiguni ya muhuno, sivangwa satshavbo sa gu dilela ni gusaniseka gukhwatshi khu nyamayi a lumwago.

²³ Khandri sivangwa basi, ni ethu nethu hi phedego gu hakha siningwa nya Liphuvbo nya Guage. Ethu hi ngu saniseka ni gu virela gikhati hi na gu dzegiswago kha nga sanana sa Nungungulu, a gu ugo gutshulega gwathu.

²⁴ Kholu lisine, ethu olu hi vbanyisidwe khu gutumba. Gu tumba silo si wonegago, khandri gitumbo gya gilo. Hi na dzi kodza kharini gu lindrela esi hi si wonago?

²⁵ Aholu, ha gu tumba silo nyamba si wona, hi na si lindrela khu gutimisela.

²⁶ Khidzo nugo kharato, Liphuvbo nya Guage li ngu hi phasedzela ethu hi gu mwalo tshivba. Khu lisine, ethu kha hi kodzi gu lombelela kha nga edzi gu vbwetegago khidzo. Aholu, ilo labune Liphuvbo nya Guage khilo li hi lombelelago ga Nungungulu khu gudilela gule nya gumba dzi kodza gu tshamusedwa khu magana.

²⁷ Uye a wonago ndrani nya myonyo a ngu giti egi Liphuvbo li vbwetago gu lomba, kholu Liphuvbo la gu lombelela khu vale va lumbago Nungungulu, kha nga edzi Nungungulu a dzinago khidzo.

²⁸ Hi ngu dziti nya gukhethu Nungungulu vegedzede satshavbo gasi gu phasedzela vale va mu golago, avo va ranidwego khu guhaladza gwaye.

²⁹ Kholu, vale Nungungulu a nga bani a va hathide khu gale, a va vegisede gu va tshanganisa gumogo ni Mwanaye, gasi Mwanaye a khale matiwula vbakari nya vandruye nya gutale,

³⁰ a va a nga bani a va hathide khu gale. Avo a nga va ranago a va giride vathu nya gululame, a va ninga wuhigo nya guhengele wudhumoni gwaye.

Lihaladzo la Nungungulu li ngu liwugisa

³¹ Hi na khethu ginani khu silo sesi? Nungungulu a gu ema ni ethu, khu mani a na hi wugelago?

³² Uye a ngamba felela Mwamana waye, a nga mu ningela khu kotani yathu, ginani gi na mu tandregisago gu hi ninga satshavbo simbe silo gumogo ni Mwanaye?

³³ Khu mani a na gu thuledzago vale va hathidwego khu Nungungulu, olu uye Nungungulu a va giridego vathu nya gululame?

³⁴ Khu mani a na va ningago nandru? Khu Jesu Kristo, a gu uye a ngafago a wuga, a khadego khu nyamudye ga Nungungulu a lombelela khu ethu, gani?

³⁵ Khu mani a na gu hi hambanisago ni lihaladzo la Kristo? Khu gusaniseka, khu sigaradzo, khu guvengwa, khu ndzala, khu wusiwana, khu dzimhango, mwendro khu gufa, gani?

³⁶ Kha nga yi ganelago Milowo nya Guage, khiyo: “Khu kotani yago, hi ngu linga gu mana gufa litshigu latshavbo. Hi girwa nga dzinvuta dziyago gusongwatunu.”

³⁷ Aholu ga satshavbo sesi, ethu hi pade khu tshivba ya wule a nga hi haladzago.

³⁸ Khu lisine nyi ngu tumba ni gu tiya gukheni: Gani gufa, gani guvbanya; gani dzingilozi, mwendro dzimbe dzitshivba ni vafumeli nya maphuvbo; gani khu esi si hi dugelelago olu, gani khu esi si na hi dugelelago mindru ga litshigu;

³⁹ ambari dzitshivba dza vbatshani, mwendro edzi dza vbavbatshi nya mafu, mwendro gimbe givangwa. Gimwalo gilo, gambe mwalo muthu a na dzi kodzago gu hi hambanisa ni lihaladzo la Nungungulu hi yeyedzidwego khu Pfhumu yathu Jesu Kristo.