Varoma 14 - Bhibhiliya Nya Guage

Hi nga lamuli vathu vakwathu

¹ Wule a sa tiyago gukhodwani gwaye, mu hakheni gwadi, mu nga ganedzisani naye khu kotani nya mawonelo yaye.

² Vomo va alakanyago gukhavo va ngu dzi kodza gu hodza silo satshavbo, gasi vambe va sa tiyago gukhodwani gwawe, va gu hodza tongwe basi.

³ Oyu a hodzago satshavbo a nga nyenyi wule a digago gu hodza simbe silo. Wule a si hodzigo simbe silo, a nga hembululi oyu a hodzago satshavbo, kholu uye nuye a ngu godwa khu Nungungulu.

⁴ Khuwe mani uwe u tiyelago gu lamula githumi gya mumbe muthu? Mune wa igyo khuye a lamulago, gani gi ngu pala gani gi ngu padwa, isoso si na ni mune waye. Aholu a na pala kholu Pfhumu a na ni tshivba nya gu mu emise.

⁵ Vomo gambe vathu va pimisago gukhavo mambe matshigu makhongolo guvbindra mambe, ni vambe va gukhavo matshigu yatshavbo khidzosaye. Muthu ni muthu gu vbwetega a vbanya khu edzi a khodwago khidzo.

⁶ Oyu a gukhuye matshigu nya gukari makhongolo, a gu girela gu rungudza Pfhumu. Oyu a hodzago satshavbo a ngu rungudza Pfhumu, kholu a ngu bonga Nungungulu. Oyu a si hodzigo nuye a gu girela gu rungudza Pfhumu, a ngu mu bonga nuye.

⁷ Kholu mwalo muthu a dzi vbanyelago uye mune, kha nga gambe mwalo muthu a dzi felago uye mune.

⁸ Ha gu vbanya ha gu vbanyela Pfhumu, ha gufa gambe ha gufela Pfhumu. Kholu gani hi ngu vbanya, gani hi ngufa, ha gu lumba Pfhumu.

⁹ Kholu, Kristo fude, a wuga, a vbanya gasi gu khala Pfhumu nya va nya gufa ni va nya guvbanya.

¹⁰ A gu bani ari kharato, khu ginani uwe u lamulago ndriyago, mwendro khu ginani u mu nyenyago? Ethu hatshavbo hi na ema mbeli gwa Nungungulu gasi hi lamudwa khuye.

¹¹ Pfhumu a ngu ganela omu nya Milowo nya Guage, khuye: “Nyi ngu tiyisa gwanu kheni vathu vatshavbo va na khidzima mbeli gwangu. Vatshavbo va na fakaza vathuni khavo kheni Nungungulu.”

¹² Khu kharato, muthu ni muthu a naya dzi ganelela abune gwa Nungungulu.

Hi nga yisi muthu gighohoni

¹³ Khu kharato, hi nga lamuli vakhwathu. Hi na dzi garadze khu gumba gira ni gimwegyo gilo gi dzi kodzago gu tshunganedzisa vakhwathu va thega gighohoni.

¹⁴ Nyi ngu dziti ni gukhodwa gwadi khu ga Pfhumu Jesu gukheni, gimwalo gilo gi nyenyezidego khu tumbunugo nya igyo. Aholu muthu a gu pimisa gukhuye gilo nya gukari gi nyenyezide, a na gi wona mapimoni gwaye na gi nyenyezide furi.

¹⁵ Uwe wa gu khunguvanyisa ndriyago khu kota nya esi u hodzago, khu yeyedzi lihaladzo. Khu kota nya guhodze gwago u nga dzi giri givangelo nya gudzimedze muthu a fedwego khu Kristo.

¹⁶ Egi gi gu gyadi ga enu, gi nga khali gikhunguvanyiso ga vambe.

¹⁷ Kholu Mufumo wa Nungungulu, khandri mahungu nya guhodze ni gusela, aholu, mahungu nya gululame, nya gurule ni gunengela gutago khu Liphuvbo nya Guage.

¹⁸ Muthu a thumelago Kristo khu magirelo nya nga ayoyo, a ngu tsakisa Nungungulu, a wuya a zundzwa khu vathu.

¹⁹ Khu kharato, hongoleni hi dzi garadze khu gu vbweta silo sile si hi reselago gurula ni gu tiyiselana gukhodwani.

²⁰ U nga ghoheteli thumo wa Nungungulu khu kotani nya guhodze. Hi ngu dzi kodza gu hodza silo satshavbo, aholu guvivba khu gu hodza gilo gi dzi kodzago gu tshunganedzisa muthu kwanu a thega gighohoni.

²¹ Gwadi gumba hodza nyama, ni gumba sela wadwa, ni gumba gira gilo wa gu dziti gukhuwe gi na tshunganedzisa ndriyago a thega gighohoni.

²² Esi u khodwago monyoni gwago, si na tidwe basi khuwe mune ni Nungungulu. Kategide wule a ngamba dzi mbembisa abune khu kotani nya esi a si hathago.

²³ Aholu, muthu a hodzago na gu kanakana, a gu hodza, a na ni nandru khu esi a hodzago nyamba dziti gukhuye si loledzisidwe khu Nungungulu, a gu hodza, a na ni nandru; kholu kha landrisi esi a khodwago ga iso. Satshavbo esi a girago muthu na si gu hambana ni gukhodwa gwaye, gighoho.