Varoma 13 - Bhibhiliya Nya Guage

Guyingela vathangeli

¹ Muthu ni muthu gu vbwetega a yingela vathangeli va vegidwego khu nayo, wu mwalo mufumo wu ngamba vegwa khu Nungungulu, kholu wufumu watshavbo wa guta khu ga Nungungulu.

² Oyu a yeyisago vathangeli a ngu yeyisa nayo wu vegidwego khu Nungungulu. Gasi ava va yeyisago nayo va na mana tsayiso wawe.

³ Vathangeli kha va theli hwanga vale va vbanyago khu gululama, aholu vale va girago guvivba. Ina khu dzini gu thava vathangeli, gani? Vbanya khu gululama, va na gu tsakela.

⁴ Kholu fanelo yatshavbo nya guthangele vathu ya guta khu ga Nungungulu, gasi guthumela uwe. Aholu wa gu gira guvivba u na ni fanelo nya guthave, kholu vathangeli va na ni tshivba nya gutsayise. Muthangeli kha phari ndronga mahala. Wuthangeli wa gu thumela Nungungulu khu gu tsayisa vale va girago guvivba.

⁵ Guvbwetega gu yingela vathangeli, nasiri basi khu kota nya guthave gutsayiswa, aholu khu kota nya gulandrise edzi ma lombago khidzo mapimo yathu.

⁶ Khigyo gambe givangelo gi mi girago mu livba mikhupo, kholu vathangeli va vegidwe kha nga sithumi sa Nungungulu gasi gu lulamisa thumo yoyo.

⁷ Khavbo avbo, livbani muthu ni muthu esi a gu fanelo. Livbani mikhupo ni gikhaba ni mihengo ga vale mu gu ni fanelo nya gu va livbe; ningani githawo vale va gu ni fanelo nya guningwe githawo, mu gu rungudza wule a fanelago gu rungudzwa.

Lihaladzo litshina nya nayo

⁸ Mu nga khali ni mangava ga muthu. Mangava yanu ma na khale basi lihaladzo nya wundruye. Kholu oyu a haladzago muthu kwawe, a ngu tadzisa nayo.

⁹ Sileletelo nya nayo sari khiso: “U nga bhayi, u nga songi, u ngabi, u nga singedzi, u nga dogoleli savane.” Satshavbo sesi ni simbe gambe sa gu patwa sa gu khala nayo moyo basi wu gu khuwo: “Haladza muthu kwanu kha nga uwe mune.”

¹⁰ Lihaladzo kha li gireli guvivba muthu kwanu. Khavbo avbo, lihaladzo gutadzisega nya nayo.

¹¹ Hongoleni hi gire kharato ngudzungudzu olu hi gitigo, gikhati muni egi hi vbanyago ga igyo. Hi ngu dziti gukhethu khigyo egi gikhati nya gukhendzuge khu ligovbeni. Kholu guvbanyiswa gwathu gomo vbafuvbi ngudzu guvbindra gikhati hi nga hakhago khigyo gukhodwa.

¹² Wutshigu wu dandride, gugya gu vbohide. Hongoleni hi dige mithumo nya gidema, hi phara matshari hi dwana guwonegelani.

¹³ Hongoleni hi vbanye khu gululama nga vathu va vbanyago safani nya mihani; hi nga vbanyeni khu wukhondrobwa ni guleva; hi nga vbanyi wuphuphuluni ni mithumo nyamba yadi; hi nga vbanyeni khu gu dwana ni lidiwo.

¹⁴ Aholu ambalani Pfhumu Jesu Kristo, mu nga dzi digi mu gu sengwa khu gudogolela nya tumbunugo nya wuthu.