Valamuli 4 - Bhibhiliya Nya Guage

Guthumela Jabhimi mufumeli wa Khanani

¹ Hwane nya gufe gwa Ewudhi, va na Israyeli va di engedza gu gira ugo guvivbidego mahoni ga Pfhumu Nungungulu.

² Pfhumu Nungungulu a di va ningela mandzani ga Jabhimi, mufumeli wa Khanani, a nga bani na gu fuma dhoropani ga Hazori. Sisera a diri ndruna yaye nya nyimbi, uye a di gu vbanyela tigoni ga Haroseti-Hagoyimi.

³ Va na Israyeli, va di lila ga Pfhumu Nungungulu, kholu Jabhimi a diri ni livbandre na mana mazana (900) dzikareta nya dzisimbi, a di tshanisa khu dzitshikhwi va na Israyeli ndrani nya magumavili myaga.

⁴ Khu gikhati gyogyo, Dhebhora, nyamayi nya muprofeti, ngadza Lapidoti, a di lamulela va na Israyeli.

⁵ A di khade vbavbatshi nya simbo nya ngindru wa Dhebhora, vbakari ni vbakari ga Rama ni Bheteli, sigomoni sa Efrayimi; va na Israyeli va di gu gwela gwaye gasi guya lamudwa khuye.

⁶ Dhebhora a di rumela guya rana Bharaki, mwamana wa Abhinowamu, a nga bani na gu khala Kadesi wa na Nafitali, a mu embela, khuye: “Ina Pfhumu Nungungulu wa Israyeli, kha leletela a ganela, khuye: Dzega vathu u hongole navo gigomoni gya Tabhori, gumogo ni likhumi magumi mazana (10.000) vama nya sanana sa Nafitali ni sa Zebhuloni, gani?

⁷ Nyi na pfhadza Sisera, ndruna nya nyimbi ya Jabhimi, a ta dwana nago vbafuvbi ni tsongo wa Kisomi, ambari ulo uye a gu na ni dzikareta nya nyimbi ni masotshwa nya mwandra, nyi na mu ningela mandzani gwago.”

⁸ Bharaki a di mu hakha, khuye: “Nyi naya wa gu dzumela gukhuwe hi hongole gumogo nago; aholu wamba hongola neni, eni neni kha nyi naya.”

⁹ Dhebhora a di hakha, khuye: “Khidzo, nyi na hongola nago; aholu khu na mana wuzundzo lipfhumbani gwago, kholu, Pfhumu Nungungulu a na ningela Sisera mandzani ga nyamayana.” Khavbo avbo, Dhebhora a di khuga ni Bharaki a hongola Kedhesi.

¹⁰ Khavbo avbo, Bharaki a di tombanisa va na Zebhuloni ni va na Nafitali dhoropani ga Kedhesi, a di gwela ni likhumi magumi mazana (10.000) vama, Dhebhora a di hongola nuye naye.

¹¹ Hebheri, nya Mukini, a nga bani a dzi pambude ni va na gyawe gumogo ni va na Hobhabhi, sade wa Mosi, a di tsitside tshatsha waye vbafuvbi ni ngure wa Zahananimi, vbafuvbi ni Kedhesi.

¹² Avbo va nga tivisago Sisera gukhavo Bharaki, mwamana wa Abhinowamu, gwede gigomoni gya Tabhori,

¹³ Sisera a di tombanisa dzikareta dzaye dzatshavbo nya sikete, nya livbandre na mana mazana (900), ni masotshwa yaye yatshavbo a nga bani nari nawo, gukhugela Haroseti-Hagoyimi, kala tsongoni wa Kisomi.

¹⁴ Khavbo avbo, Dhebhora a di embela Bharaki, khuye: “Khuga, kholu muhuno, khilo litshigu Pfhumu Nungungulu a ningedego Sisera mandzani gwago. Ina, Pfhumu Nungungulu thangide mbeli gwago!” Khu guralo, Bharaki, a di relela khu gigomoni gya Tabhori, na gu landrwa khu likhumi magumi mazana (10.000) masotshwa.

¹⁵ Pfhumu Nungungulu a di pala Sisera ni dzikareta dzaye, gumogo ni masotshwa yaye yatshavbo mbeli ga Bharaki; Sisera a di ndraga khu karetani a thava, a tutuma khu mawundru.

¹⁶ Aholu Bharaki, a di lundra dzikareta ni masotshwa kala Haroseti-Hagoyimi; masotshwa yatshavbo ya Sisera ma di songwa khu matshari, nyamba vbuluga ni moyo basi.

Jayeli a ngu songa Sisera

¹⁷ Khu guralo, Sisera a di tutuma khu mawundru a thavela tshatshani ga Jayeli, mwangadzi wa Hebheri, Mukheni; kholu gu diromo gurula vbakari ga Jabhimi, mufumeli wa Hazori, ni nyumba ya Hebheri, Mukheni.

¹⁸ Jayeli a di duga a khinga Sisera, a mu embela, khuye: “Bela, mune wangu, bela tshatshani gwangu u nga thavi.” Uye a di bela tshatshani gwaye, a di mu fenengedza khu vholwe.

¹⁹ Khavbo avbo, Sisera a di mu embela, khuye: “Nya gu lomba mati madugwana nyi sela, kholu, nyi ngupwa lidora.” Uye a di tula gigasi nya mahwe a mu ninga a sela, a mu fenengedza gambe.

²⁰ Uye a di engedza gambe a mu embela, khuye: “Ema vbamwanyatunu nya tshatsha; a gu vbindra muthu a gu wudzisa khuye womo muthu avba, gani? Mu hakhe, khuwe: Ahihi.”

²¹ Khavbo avbo, Jayeli, mwangadzi wa Hebheri, a di dusa simbo nya tshatsha a rola gikhokhotho, a mu vandramela na lade ligovbe nya likhongolo, aya mu paya vbagiwombotunu, a khokhotha khu gikhokhotho kala simbo wu vbondza vbavbatshi, afa.

²² Avbo Bharaki, a nga bani na guta khu gulundra Sisera, Jayeli a di duga a mu khinga a mu embela, khuye: “Delu eno nyita gu yeyedza mwama u mu vbwetago.” Uye a di hongola naye aya mana Sisera na lade khu gufa, na payidwe khu simbo vbagiwombotunu.

²³ Khu guralo, Nungungulu, khu litshigu lolo, a di ningela Jabhimi, mufumeli wa Khanani, mandzani ga va na Israyeli.

²⁴ Va na Israyeli va di simama gu dwana ni Jabhimi, mufumeli wa Khanani, kala va mu mbembisa.