Valamuli 20 - Bhibhiliya Nya Guage

Nyimbi ya va na Israyeli ni va na Bhejami

¹ Khavbo avbo, vatshavbo va na Israyeli va di duga va pwanana khu monyo moyo mbeli ga Pfhumu Nungungulu, gukhugela Dhani kala Bherisebha, gumogo ni litigo la Gileyadhi, dhoropani ga Misipa.

² Gu di manega vathangeli vatshavbo nya mahundzu ya Israyeli, va manega tshanganoni wa vathu va Pfhumu Nungungulu; tengo wawe wu diri magumana magumi mazana (400.000) vama nya gugimbile khu mawundru na va somide matshari.

³ Va na Bhejami va dipwa nya gukhavo va na Israyeli va tombanide Misipa, va na Israyeli va di ganela, khavo: “Hi embeleni, wu giregide kharini wuvivbi wowu?”

⁴ Khavbo avbo, Mulevhi, mwama wa nyamayi a nga songwago, a di va hakha, khuye: Nyi di vboha ni gibhayi gyangu Gibheya, dhoropani ga Bhejami, gasi guya lala umo.

⁵ Ni vbawutshigutunu, vavbanyi va Gibheya, va di khuga va ta randrela nyumba nyi nga bani nyi romo va zama gu nyi songa, va di dzega mwangadzi wangu nya gibhayi, va mu sagarela kala afa.

⁶ Khu guralo, nyi di dzega gibhayi gyangu, nyi gi vbadzulela khu sipandre nyi si rumela tigoni gwatshavbo nya thomba ya Israyeli, kholu esi va na Bhejami va si giridego, givalo ni manyala nya guvivbe ga va na Israyeli.

⁷ Khu guralo, mwatshavbo enu va na Israyeli, ganelani ni gu dundrugisana khu mahungu yaya.

⁸ Khavbo avbo, vathu vatshavbo va di khuga va ema khu lito limwedo, khavo: “Mwalo ni moyo nya ethu a na bwelelago aya tshatshani gwaye ambari gu hongola gaya gwaye.

⁹ Aholu, iso hi na gu girago ga va Gibheya khesi: Hi naya khu gu sasuledza hi wona khu mani a na gu sasela lidhoropa la Gibheya.

¹⁰ Hi na hatha ga dzinyumba dzatshavbo dza na Israyeli, likhumi vama, vbale gu gu lizana, avbo nya likhumi mazana hi na hatha lizana, avbo nya likhumi magumi mazana (10.000) hi hatha likhumi mazana (1.000), avo va na gu dongiselago guhodza nya masotshwa gasi avbo avo va na vbohago dhoropani ga Gibheya ga Bhejami, va kodza gu dwana va phodza manyala ma nga girwago vbakari ga va Israyeli.”

¹¹ Khu guralo, va di tshangana vatshavbo vama va na Israyeli khu monyo moyo va sasela lidhoropa.

¹² Va na Israyeli va di rumela vathu vaya ga mahundzu yatshavbo ya na Bhejami, vaya, khavo: “Gasi khu ginani mu nga girani vbakari gwanu guvivba nya gunyenyeze nya nga ogu, na?

¹³ Olu hi ningeni vama vale nya mighewu nya sanana sa Bheliyali, va vbanyago Gibheya, gasi hi va songe, hi fuvisa wuvivbi vbakari ga va na Israyeli.” Aholu va na Bhejami kha va nga dzumela gu yingisa mahungu va nga embedwago khu vandriyawe va na Israyeli.

Litunga nya guhegule

¹⁴ Khavbo avbo, va na Bhejami va di duga khu madhoropani gwawe vaya tombana Gibheya, gasi guya dwana ni va na Israyeli.

¹⁵ Khu litshigu lolo, gu di sayedwa va na Bhejami nya gudugele madhoropani, gu duga tengo nya magumavili na livbandre na limwedo magumi mazana vama (26.000) avo nya gu kodze gu soma matshari, vbavbandze ga vavbanyi va Gibheya, gu di duga tengo nya livbandre na mavili mazana (700) vama nya dzindrena.

¹⁶ Vbakari nya masotshwa yaya yatshavbo, gu diri ni livbandre na mavili mazana (700) vama va nga hathwa nya dzindrena nya guthume khu nyambade, nya gukodze gu rinya siwindri, edzi nya gu ambari nari ndzudzu wunene, kha va wu hosi.

¹⁷ Va na Israyeli vbavbandze nya lihundzu la Bhejami, va di sayela vama vawe, va mana tengo nya mazana mana magumi (400.000) mazana nya gusome matshari vatshavbo nya gukodze gu dwana nyimbi.

¹⁸ Va na Israyeli va di khuga va gwela Bheteli, vaya wudzisa Nungungulu, khavo: “Khu mani wa vbakari gwathu, a na gu phelago khuye a gwela guya dwana ni va na Bhejami?” Pfhumu Nungungulu a di va embela, khuye: “Va na phele khu va na Judha.”

¹⁹ Va na Israyeli va di khuga na gungari dzimindru, vaya fola vbafuvbi ni Gibheya.

²⁰ Va na Israyeli va di duga guya dwana ni va na Bhejami, va na Israyeli va diya fola vbafuvbi ni lidhoropa la Gibheya.

²¹ Va na Bhejami va di duga khu dhoropani ga Gibheya, khu litshigu lolo va diya songa magumavili na mavili mazana (22.000) vama va na Israyeli.

²² Aholu va na Israyeli va di bwelela vaya vbweta tshivba, va di soma gambe va dongisela yimbe nyimbi wulanga va nga phelago khavbo gu dwana khu litshigu nya guhegule.

²³ Va na Israyeli, va di gwela vaya lila mbeli ga Pfhumu Nungungulu kala ni silambo, va wudzisa Pfhumu, khavo: “Hi bwelela hi ya dwana ni vandriyathu va na Bhejami, gani?” Pfhumu Nungungulu a di va embela, khuye: “Indrani mu ya dwana navo.”

²⁴ Khavbo avbo, va na Israyeli va diya gambe vbafuvbi ga va na Bhejami khu litshigu nya wuvili.

²⁵ Va na Bhejami navo va di duga khu Gibheya, khu litshigu nya wuvili va va khinga, va thesa gambe vbavbatshi likhumi na livbandre na mararu magumi mazana vama (18.000) vatshavbo nya gu bani va somide matshari.

²⁶ Khavbo avbo, vatshavbo va na Israyeli, ni vathu vatshavbo, va di gwela dhoropani ga Bheteli vaya lila, va di khala vbale mbeli ga Pfhumu Nungungulu, va hala litshigu latshavbo kalani silambo, va ningela miphaso nya guvbiswe ni miningelo nya gurule mbeli ga Pfhumu Nungungulu.

²⁷ Va na Israyeli va di wudzisa ga Pfhumu Nungungulu, kholu khu ga gikhati gyogyo ngasa nya gidzumeledzwano ya Nungungulu yi di gu khala Bheteli,

²⁸ gumogo ni Finiyasi, mwamana wa Eliyazari, tugulu wa Aroni, khuye a nga bani a yi sayisa khu matshigu yoyo. Va di wudzisa nyaluphye, khavo: “Ina hi ngu si kodza gu bwelela gambe hi ya dwana ni vandriyathu va na Bhejami mwendro hi si hongoli, gani?” Pfhumu Nungungulu a di mu hakha, khuye: “Indrani, kholu mindru nyi na va ningela mandzani gwanu.”

²⁹ Khavbo avbo, va na Israyeli va di dzi dongisela vaya varama na va randrede lidhoropa la Gibheya.

³⁰ Va na Israyeli va di yela va na Bhejami khu litshigu nya wuraru, vaya dwana navo gambe gu fanana ni dzimbe dzinyondro vbafuvbi ni Gibheya.

³¹ Va na Bhejami va di duga va khinga va na Israyeli, avbo va nga ndreyiswa va yiswa hwindzo ni lidhoropa, va phela gu songa vathu nya gukari va na Israyeli, kha nga idzo va nga bani va gira khu dzimbe dzinyondro, va songide tanga nya magumararu vathu va na Israyeli dzindzilani nya guye Bheteli, ni yimbe nya guye Gibheya khu likhabi.

³² Avbo va na Bhejami va nga bani va ganela, khavo: “Hi va pade kha nga dzimbe dzinyondro.” Aholu va na Israyeli va di embeledzelana, khavo: “Hongoleni hi thave hi duga dhoropani hi va ndrindrela hwindzo, mu dzindzilani.”

³³ Khavbo avbo, vatshavbo va na Israyeli va di duga khu malangani va nga bani va fode khumo, vaya fola khu Bhahali-Tamari, va na Israyeli va nga bani va varamide va di duga khu wulangani wule va nga bani na va romo, khu kovani wa Gibheya.

³⁴ Gu dita likhumi magumi mazana (10. 000) vama nya dzindrena nya guhathedwe tigoni gwatshavbo gwa Israyeli guta sasela Gibheya, nyimbi yi di dandra, aholu va na Bhejami va di si dziti nya gukhavo mhango yi diromo vbafuvbi gwawe.

³⁵ Pfhumu Nungungulu a di sasela va na Bhejami mbeli ga Israyeli, khu litshigu lolo, va na Israyeli va songide magumavili na livbandre magumi mazana ni lizana limwedo (25.100) vama va na Bhejami, vatshavbo nya gu some matshari.

³⁶ Va na Bhejami va di dzi wona nya gukhavo va padwe. Va na Israyeli va ningide wulanga va na Bhejami nya gututume, kholu va di gu tumba avo va nga bani va varamide khu Gibheya.

³⁷ Vale va nga bani va varamide, va di dzegela gu duga va bela dhoropani ga Gibheya khu giviti, va phalalega va songetela khu matshari vavbanyi vatshavbo va Gibheya.

³⁸ Va na Israyeli va di pwananide ni vale va nga bani na va gu varamela gukhavo va na gira giwonegiso nya lipfhi nya likhongolo nya wutshi khu dhoropani.

³⁹ Va na Israyeli va di tutuma va gira gu khwatshi va di padwa, khu guralo, va na Bhejami va di dwana va songa magumararu vathu va na Israyeli, va di pimisa gukhavo: “Hi va pade kha nga nyondro nya guhegule.”

⁴⁰ Khavbo avbo, lipfhi nya wutshi li di phela gu tuviga khu dhoropani, avbo va na Bhejami va nga thendregedza va khedza hwane gwawe, va di wona wutshi na wu gu tuviga khu dhoropani wu gwela damboni.

⁴¹ Khavbo avbo, va na Israyeli va di thendregedza va wuya, va na Bhejami va di hambanega mapimo, kholu va di gu wona mhango yi nga bani yi va dugela.

⁴² Va di thendregedza va tutuma mbeli ga na Israyeli, va thavela giwulani. Aholu nyimbi yi di va gama yi tutumisa ni vale va nga bani vari dhoropani va di songetedwa khu va na Israyeli.

⁴³ Va di randrela va na Bhejami, va va tutumisa va va mola nyamba garadza, va va songetela kala vbafuvbi ga Gibheya khu phuvbo ga Khugadambo.

⁴⁴ Gufude likhumi na livbandre na mararu magumi mazana (18.000) masotshwa ya na Bhejami, vatshavbo vava, nya vangi va diri dzindrena.

⁴⁵ Avbo va nga si wona, va di thavela giwulani giwindrini gya Rimoni. Mudzindzilani va di mana vambe nya avo livbandre magumi mazana (5.000) va va tutumisa khu vbafuvbi kala Gidhomi, va songa vbakari gwawe tanga nya magumavili (2.000) mazana.

⁴⁶ Khu litshigu lolo, va fude magumavili na livbandre magumi mazana (25.000) vama nya dzindrena dza na Bhejami, vale va nga bani va gu kodza gu dwana khu matshari.

⁴⁷ Aholu vambe nya livbandre na limwedo mazana, (600) va di tutuma va thavela giwulani, giwindrini ga Rimoni, vaya khala vbale gipimo nya migima mina.

⁴⁸ Va na Israyeli va di bwelela va yela va na Bhejami, vaya va sasela khu matshari, va songetela avo va nga bani va tshade dhoropani, va songa ni sifuyo ni satshavbo si nga bani si gu manega umomo, madhoropa yawe yatshavbo va di ma vbisa khu nilo.