Valamuli 19 - Bhibhiliya Nya Guage

Mulevhi ni gufa ga gibhayi gyaye

¹ Khu gikhati gyogyo gu di bani gu si manegi mufumeli tigoni ga Israyeli. Gu giregide gu Mulevhi nya gukari, a nga bani a gu vbanya vbakari nya sigomo sa Efrayimi, a di dzi dzegela nyamayi nya gibhayi nya gudugele dhoropani ga Bhetlehema ga Judha.

² A di vbenyisana naye, nyamayi yoyu nya gibhayi a di bwelela gaya ga babe waye, Bhetlehema ga Judha, aya khala matshigu nya gukari nya gu enedze migima mina.

³ Mwama waye, a di khuga a mu landra gasi guya khongotelana naye a bwelela a wuya gaya gwaye; a di dzega githumi gyaye ni dziburu dzimbili, a hongola nadzo. Avbo a nga vbohago wugo gwaye, sade waye, a di tsaka, khu gu mu wona.

⁴ Babe wa mwangadzi waye, a di mu khadzisa a mu lomba gu a si bweleli, a di khala naye matshigu mararu, va hodza, va sela ni gulala vbale.

⁵ Khu litshigu nya wu na, na gu ngari dzimindru, Mulevhi a di wuga gasi gu dongisela guhongola; khavbo avbo, babe wa nyamayana a di embela mwane waye, khuye: “Tiyisa monyo wago khu gipandre nya gibaba, khu hwane mu na hongola.”

⁶ Khu wuvili wawe va di khala vbavbatshi va hodza ni gu sela; babe wa nyamahegyane a di ganela, khuye: “Nya gu gu lomba gukheni u lala gambe avba muhuno, gasi u nengedzisa monyo wago.”

⁷ Lidzaha lile li di khugide gasi gu hongola, aholu sade waye a gu babe wa mwangadzi waye, a di mu khongotela gu simama a khala ni gulala gambe litshigu lile.

⁸ Khu litshigu nya livbandre, mulevhi, a di vindrugela guwuga gasi a hongole, aholu babe wa mwangadzi waye, a di engedza a mu embela, khuye: “Nyi ngu gu lomba u phela khu gu hodza gasi u kodza gu mana tshivba.” Khu guralo, va di khala kala guhwani nya lidambo, na vari vatshavbo.

⁹ Avbo mwama wule a nga vbweta gu khuga, uye, gibhayi gyaye ni githumi gyaye, sade waye, a gu babe wa mwangadzi waye, a di mu embela, khuye: U ngu wona nya gukhuwe olu lidambo li relede, li hwide li ngu pfola, gu ngu khala wutshigu, khala u lala u tsakisa monyo wago, mindru ni mambagugya u na wuga u hongola gaya gwago.

¹⁰ Aholu mwama wule kha nga dzumela gulala vbale, uye a di khuga a hongola, aya vboha dhoropani ga Jebhusi, a gu Jerusalema, nari ni patwa nya dziburu na dziri ni sighwabhata, gumogo ni mwangadzi waye.

¹¹ Avbo va nga vboha vbafuvbi ni Jebhusi, lidambo li di gu pfola, githumi gi di embela mune waye, khigyo: “Nyi ngu gu lomba gu hi phawuga, hiya bela dhoropani momu nya Vajebhusi hiya lala umo, wutshigu wowu.”

¹² Mune waye a di mu hakha, khuye: “Ahihi. Hi nga ndreyi hi bela dhoropani nya valombo, li gu siri la va na Israyeli, aholu hongoleni hi simama gu gimbila kala hi vboha Gibheya.”

¹³ A di engedza a embela githumi gyaye, khuye: “Hongoleni kala hi vboha Gibheya mwendro Rama hi naya lala ga limwedo nya madhoropa yaya ya mavili.”

¹⁴ Khavbo avbo, va di simama guya mbeli ni liendro lawe, vaya pfoledwa khu lidambo dhoropani ga Gibheya, a gu lidhoropa la Bhejami.

¹⁵ Va di phawuga, gasi guya lala dhoropani ga Gibheya; avbo va nga belago va diya khala tandralani nya lidhoropa, kholu kha va nga mana muthu nya gu va hakhe ndrangani gwaye gasi vaya lala avbo.

¹⁶ Ni wutshigu wowo, a di vboha mwama moyo nya gugumbe na gudugela gigomoni gya Efrayimi na gu wuya khu mahangeni gwaye, uye a diri muluveli dhoropani ga Gibheya, kholu va mune nya wulanga wowu va diri va na Bhejami.

¹⁷ Avbo a nga khusa maho, a di wona muendri yoyu na khade tendrelani nya lidhoropa, gikhosane gile gi di mu wudzisa, khigyo: “Wa guta khu hayi, wa guya hayi?”

¹⁸ Uye a di mu hakha, khuye: Ethu ha guta khu Bhetlehema ga Judha, ha guya kovani nya gigomo gya Efrayimi, a gu umo nyi velegedwego umo, nyi di endride nyi ya Bhetlehema ga Judha, gasi olu nya gu hongola Nyumbani ga Pfhumu Nungungulu, nya gu hamuga muthu nya gu nyi hakhe ndrangani gwaye.

¹⁹ Hi na ni mwasi nya guhodzise dziburu ni gumbe guhodza nya idzo, hi na ni guhodza nya guhodze eni githumi gyago nya nyamayi ni lidzaha u li wonago ni sithumi sago, gimwalo hi keneledwago khigyo.

²⁰ Mwama wule nya muthu khongolo, a di khuye: “Gurula gu na khale ni uwe. Eni nyi na gu phasa khu satshavbo si gu kenelelago, olu nya gu gu lomba kheni u nga lali tendrelani.”

²¹ A di mu dzega a mu yisa gaya gwaye, aya mu ninga lihawo nya dziburu dzaye; va di hamba migondro, va hodza ni gu sela.

²² Na vari vbakari nya gutsake, gu dita vama nya mighewu ya dhoropani mule, nya sanana sa Bheliyali, va ta randrela nyumba ya gikhosane gile, va veta lidimba, va embela gikhosane gile nya mune ndranga, khavo: “Nga dusa vbavbandze muthu yoyo a bedego nyumbani gwago, gasi hi ta hagana khuye.”

²³ Mune ndranga a di duga a va embela, khuye: “Ahihi vandriyangu! Mu nga girini guvivba nya nga ugogo, kholu pfhumba yoyu khwa nyumbani gwangu, mu nga girini guvivba nya guralo.

²⁴ Kha mu yi woni eyi mbiri yangu nya likendzi ni gibhayi gyaye, va duseni vbavbandze mu gira khavo gu gola gwanu, aholu ga mwama yoyu mu nga girini guvivba nya nga ugogo.”

²⁵ Aholu vama vale kha va nga dzumela gu mu yingisa, khu guralo, mwama wule a di dusa gibhayi gyaye vbavbandze. Avo va di mu pfinya, va mu sagarela wutshigu watshavbo kala gugya, ni mambagugya, va di mu diga a hongola.

²⁶ Avbo gu nga dugago Wuronga, nyamayi wule a dita thega vbamwanyatunu nya nyumba ya mwama wule, avbo a nga bani na romo mune waye, a di khala vbale kala gugya.

²⁷ Ni dzimindru avbo mune waye a nga wugago, a di tula lidimba a duga gasi gu simama ni liendro laye, gibhayi gyaye na gu di labalaba vbamwanya nya nyumba, mandza yaye na mari vbanvunvuritunu nya lidimba.

²⁸ Uye a di mu embela, khuye: “Khuga hi hongole!” Aholu nyamayi kha nga mu hakha. Khavbo avbo, mwama wule a di khiledza gibhayi gyaye vbaburutunu gwaye a hongola gaya gwaye.

²⁹ Avbo a nga vbohago gaya gwaye, a di dzega ngala a vbadzulela givili gya gibhayi gyaye khu likhumi na sivili sipandre, a si rumela ga dzatshavbo dzinyumba dza na Israyeli.

³⁰ Vatshavbo va nga si wonago va di ganela, khavo: “Gukhugela litshigu va na Israyeli va nga dugago khu tigoni ga Egipito, gima si si giregi ambari gu si wona kala litshigu la muhuno. Mahungu yaya, guvbweta mu ma wona gwadi ni gu ningedzana khayo, mu ganela ginani gi yelago gu girwa.”