Valamuli 13 - Bhibhiliya Nya Guage

Guvelegwa gwa Samisoni

¹ Va na Israyeli va di engedza va gira silo nya guvivbe mahoni ga Pfhumu Nungungulu, Pfhumu a di va ningela mandzani ga Vafilisitiya gipimo nya magumana myaga.

² Mwama moyo nya gudugele dhoropani ga Zora, nya gupwani khu Manowa, nya lihundzu la Dhani, mwangadzi waye a diri gyumba, a di si velegi.

³ Ngilozi ya Pfhumu Nungungulu yi di wonega ga nyamayi yoyu, yi mu embela, khiyo: “Nyi ngu gu wona gukheni u gyumba gima u si gu khuri mimba; gasi olu u na khura mimba u velega gyanana nya gikhwathana.

⁴ Olu, dzi vegedze u si seli vbinyu mwendro gu sela wadwa nya guvave, ambari gu hodza gilo nya gunyenyeze.

⁵ Kholu wona nya gukhuwe, u na khura mimba u velega gyanana nya gikhwathana, igyo gima kha gi na vidwa ndzudzu khu gisingwana. Kholu, gyanana gegi gi na bani giri Munaziri, gi phasedwe Nungungulu gukhugela ndrani ga mayi waye, igyo gi na tshudzisa Israyeli mandzani ga Vafilisitiya.”

⁶ Khavbo avbo, nyamayi wule a diya embeledzela satshavbo mwama waye, khuye: Dzude muthu wa Nungungulu avbo gwangu, khovbe yaye a di fanana ni ngilozi nya guthavisege ya Nungungulu, kha nya mu wudzisa kheni a gu dugela hayi, ambari uye kha nyi embela lina laye.

⁷ Aholu uye a di nyi embela, khuye: “Nyi na khura mimba nyi velega gyanana nya gikhwathana; gasi olu, khuye nyi nga seli vbinyu ambari gu sela wadwa nya guvave, ambari guhodza gilo nya gunyenyeze, kholu gyanana gi na bani giri Munaziri, gi phasedwe Pfhumu Nungungulu, gukhugela ndrani ga mayi waye kala litshigu nya gufe gwaye.”

⁸ Khavbo avbo, Manowa a di lombelela khu tshivba ni tshivba ga Pfhumu Nungungulu a ganela, khuye: “Oh! Pfhumu yangu, nyi ngu lomba gukheni muthu wa Nungungulu, u mu rumedego, a nate gambe avbo gwathu, a ta hi hevbudza iso hi yelago gu gira khu gyanana gi na velegwago.”

⁹ Nungungulu a di yingisa lito la Manowa, khavbo avbo, Ngilozi ya Nungungulu yi di engedza yita gambe ga mwangadzi waye nari mahangeni, aholu mwama waye Manowa a diri mwalo.

¹⁰ Aholu, uye a di tutuma aya tshamusela mwama a mu embela, khuye: “Mwama wule a nga bani a nyi tede khu limbe litshigu, dzude gambe.”

¹¹ Khavbo avbo, Manowa, a di khuga a landra mwangadzi waye, aya vboha ga mwama wule a mu wudzisa, khuye: “Khuwe mwama wule u nga ganelago ni mwangadzi wangu, gani?” Uye a di hakha, khuye: “Kheni kamwe.”

¹² Khavbo avbo, Manowa a di mu wudzisa, khuye: “Magana yago ma gu tadzisega, khu mevbini mavbanyelo ni thumo hi yelago guvbanya khidzo ni gyanana?”

¹³ Ngilozi ya Pfhumu Nungungulu yi di hakha Manowa, khiyo: “Mwangadzi wago a na vegedze satshavbo nyi mu embedego.

¹⁴ A nga tshuki a hodza mihandro nya vhinya, a nga seli wadwa nya guvave, ambari guhodza gilo nya gunyenyeze. A na vegedze satshavbo nyi nga mu leletelago.”

¹⁵ Khavbo avbo, Manowa a di embela Ngilozi ya Pfhumu Nungungulu, khuye: “Ha gu lomba gukhethu u lindrele vbadugwana, hi gu dongisela giphongwana.”

¹⁶ Aholu Ngilozi ya Pfhumu Nungungulu yi di embela Manowa, khiyo: “Ambari wa gu nyi emisa, kha nyi na hodza guhodza gwago, gira phaso nya guvbiswe, u ningela Pfhumu Nungungulu.” Kholu Manowa a di si muti nya gukhuye, uye Ngilozi ya Pfhumu Nungungulu.

¹⁷ Khavbo avbo, Manowa a di wudzisa Ngilozi ya Pfhumu Nungungulu, khuye: “Lina lago khuwe mani, gasi hi kodze gu gu bonga ma gu tadzisega magana yago?”

¹⁸ Khavbo avbo, Ngilozi yi di mu hakha, khiyo: “Khu kotani nya ginani u nyi wudzisago lina langu? Lina langu li ngu samadzisa.”

¹⁹ Khavbo avbo, Manowa a di dzega giphongwana ni ningelo nya wuguvbi, a si vega vbatshani nya giwindri, a gira phaselo nya guvbiswe ga Pfhumu Nungungulu. Khu guralo, Ngilozi ya Pfhumu Nungungulu yi di gira gisamadziso, gi wonwa khu Manowa ni mwangadzi waye.

²⁰ Avbo malavbelavbe nya nilo nya giluvelo wu nga gwela guya ndzadzini, Ngilozi ya Pfhumu yi di gwela niyo na yiri niloni. Avbo Manowa ni mwangadzi waye va nga si wona, va di thega vbavbatshi khu dzikhovbe.

²¹ Kha nga ulo Ngilozi yi ngamba wonega gambe ga Manowa, ambari ga mwangadzi waye, khavbo avbo, Manowa a di tugula nya gukhuye Ngilozi ya Pfhumu Nungungulu.

²² Aholu Manowa, a di embela mwangadzi waye, khuye: “Khu lisine hi nafa, kholu hi wonide Nungungulu.”

²³ Mwangadzi waye a di mu hakha, khuye: “Nari gupwani Pfhumu Nungungulu a di vbwetide gu hi songa, gima na sa dzumela gu hakha khu mandzani gwathu phaso nya guvbiswe ni ningelo nya wuguvbi, ambari gu hi yeyedza silo sesi satshavbo ni gu hi tivisa silo nya nga esi khu gikhati gegi.”

²⁴ Nyamayi a di velega gyanana nya gikhwathana, a nga gi thangisago lina la Samisoni. Gyanana gi di dandra, Pfhumu Nungungulu a di gi kategisa.

²⁵ Liphuvbo la Pfhumu Nungungulu li phede gu thuma gwaye avbo a nga bani na gu manega Mahangeni ga Mahani-Dhani, vbakari ga Zora ni Esitaholi.