Valamuli 12 - Bhibhiliya Nya Guage

Nyimbi ya va na Gileyadhi ni va na Efrayimi

¹ Gu di rambwa vama va na Efrayimi guya nyimbitunu; va bela khu phuvbo ga Wuronga, va embela Jefiti, khavo: “Khu ginani avbo u nga ya dwana ni va na Amoni u ngamba hi ramba hi hongola nago? Khu guralo, hi na vbisa nyumba yago gumogo nago.”

² Jefiti a di va phindrula, khuye: “Eni gumogo ni vathu vangu hi di gu zondrana ngudzu ni va na Amoni; Nyi mi ranideni, aholu enu kha mwa nyi vbulugisani mandzani ga na Amoni.

³ Avbo eni nyi wonidego gukheni kha mu nyi vbulugisi, nyi di dzumela gu ningela womi wangu nyi ya dwana ni va na Amoni, Pfhumu Nungungulu a di va ningela mandzani gwangu, enu gasi olu, khu ginani mutago muta nyi dwanisa?”

⁴ Khavbo avbo, Jefiti a di tombanisa vama vatshavbo va Gileyadhi aya dwana ni va na Efrayimi, va na Gileyadhi va di sasela va na Efrayimi; kholu va na Efrayimi va di embede va na Gileyadhi, khavo: “Enu va na Gileyadhi, mu valuveli va na Efrayimi ni ga va na Manasi.”

⁵ Va na Gileyadhi, va di lundra va na Efrayimi vaya sega dzindzila nya gutshatuge tsongo wa Joridhani. Avbo, moyo wa na Efrayimi a gu tutuma a ta, khuye: “Nya gu lomba guvbindra,” va na Gileyadhi va di mu wudzisa, khavo: “Uwe u wa na Efrayimi, gani?” A gu phindrula, khuye: “Ahihi,”

⁶ va di mu embela, khavo: “Ganela khuwe xibolete.” Aholu uye a di khuye sibolete, kholu va na Efrayimi va di si kodzi gutshamusela gwadi magana yaya; khavbo avbo, va di mu mola va mu pila ngolo tshatugo ga Joridhani; khu gikhati gyogyo, gu di songwa magumana na mavili magumi mazana (42.000) vama va na Efrayimi.

⁷ Jefiti a di lamula va na Israyeli livbandre na moyo myaga. Khavbo avbo, Jefiti nya Mugileyadhi, a difa, aya dzingwa dhoropani ga Gileyadhi.

Ibisani, Elomi ni Abhidhomi, valamuli va na Israyeli

⁸ Khu hwane ga Jefiti, khade mulamuli wa Israyeli, Ibisani wa Bhetlehema.

⁹ Ibisani a diri ni magumararu sanana nya sikhwathana, ni magumararu sagadzyana; a di dzumedzisa sanana saye nya vanyamahegyane va dzegwa khu mambe mafumbo, ni sanana saye nya sikhwathana, si dzega vanyamahegyane nya mambe mafumbo. Ibisani khade mulamuli wa na Israyeli ndrani nya livbandre na mivili myaga.

¹⁰ Khavbo avbo, Ibisani a difa a dzingwa dhoropani ga Bhetlehema.

¹¹ Khu hwane gwaye khade mulamuli wa na Israyeli Elomi, Muzebhuloni, uye a lamude va na Israyeli ndrani nya likhumi myaga.

¹² Elomi wa na Zebhuloni a difa, aya dzingwa Ayijalomi, tigoni ga Zebhuloni,

¹³ khu hwane ga Elomi, gu dugelede Abhidhomi, mwamana wa Hileli, wa na Piratoni.

¹⁴ Abhidhomi a diri ni magumana sanana, ni magumararu situgulwana, si nga bani si gu gimbila na si khilede dziburu nya livbandre na mavili magumi; uye a di khala mulamuli wa Israyeli ndrani nya livbandre na miraru myaga.

¹⁵ Khavbo avbo, Abhidhomi, mwamana wa Hileli, a difa, aya dzingwa Piratomi, tigoni ga Efrayimi, gigomoni gya Vaamaleki.