Valamuli 10 - Bhibhiliya Nya Guage

Tola ni Jayiri, valamuli va na Israyeli

¹ Hwane ga Abhimeleki, gu dugelede mwama moyo wa na Isakari a nga vbweta guta tshudzisa Israyeli nya gupwani khu Tola, mwamana wa Puwa, tugulu wa Dhodho. Uye a di gu vbanya dhoropani ga Samiri, gigomoni gya Efrayimi.

² Uye a di khala mulamuli wa va na Israyeli gipimo nya magumavili na miraru myaga; khu hwane a difa, a dzingwa dhoropani ga Samiri.

³ Khu hwane gwaye a di dugelela Jayiri, wa na Gileyadhi, uye a di lamula va na Israyeli gipimo nya magumavili na mivili myaga.

⁴ Uye a diri ni magumararu sanana si nga bani si gu khilela magumararu dziburu, na vari ni magumararu madhoropa va nga bani va ma rana khu lina la Havoti-Jayiri kala na muhuno; va guromo tigoni ga Gileyadhi.

⁵ Jayiri a difa a dzingwa dhoropani ga Kamomi.

Wugumbi nya guthumele Vafilisitiya ni va na Amoni

⁶ Khavbo avbo, va na Israyeli va di engedza gu gira ugo gu vivbidego mahoni ga Pfhumu Nungungulu ni gu khozela Vabhahali, ni Asitaroti, vanungungulu va Siriya, vanungungulu va Sidhoni, vanungungulu va Mowabhi, vanungungulu va sanana sa Amoni ni vanungungulu va Vafilisitiya. Kha nga olu va digidego Pfhumu Nungungulu va si mu khozeli,

⁷ khu guralo, likhulo la Pfhumu Nungungulu li di khondrela va na Israyeli, a va rengisa mandzani ga Vafilisitiya ni mandzani ga sanana sa Amoni.

⁸ Khu mwaga wule kamwe, va di va hembulula ni gu va tshanisa; va vbedza likhumi na livbandre na miraru myaga na va gu tshanisa va na Israyeli vatshavbo va nga bani na va khade khu Khugadambo nya tsongo wa Joridhani, tigoni ga Vaamori, li manegago tigoni ga Gileyadhi.

⁹ Ni va na Amoni navo va di tshatuga tsongo wa Joridhani, gasi guya dwana ni va na Judha, ni va na Bhejami, ni nyumba ya Efrayimi; va na Israyeli va di manega gutshanisekani nya gukhongolo ngudzu.

¹⁰ Khavbo avbo, va na Israyeli va di lila ga Pfhumu Nungungulu va ganela, khavo: “Hi gu ghohede uwe, kholu hi digide Nungungulu wathu, hi khozela Vabhahali.”

¹¹ Aholu Pfhumu Nungungulu a di embela va na Israyeli, khuye: “Ina gikhati mu nga lila avbo gwangu, Eni kha nya mi vbulugisa mandzani ga Vagipiti, ga Vaamori, ga sanana sa Amoni, ga Vafilisitiya,

¹² ga va Sidhoni ni ga va na Amoni va nga bani va mu tshanisa, nyi mi tshudzisani mandzani gwawe, gani?

¹³ Aholu enu mu di nyi digani, mu ya khozela vambe vanungungulu; khu guralo, kha nyi na mi tshudzisani gambe.

¹⁴ Lilani ga vanungungulu mu va hathidego; va na mi vbulugise ga litshigu nya sigaradzo sanu.”

¹⁵ Aholu va na Israyeli va di embela Pfhumu Nungungulu, khavo: “Hi ghohide; hi gire esi u si wonago nari sadi, aholu hi ngu gu lomba gukhethu, hi tshudzise muhuno.”

¹⁶ Khavbo avbo, va di khungumulela vanungungulu nyamba phasa gilo va nga bani varomo vbakari gwawe, va khozela Pfhumu Nungungulu; uye a di vbisega ngudzu khu kotani ya Israyeli.

¹⁷ Va na Amoni va di rambana, vaya tshangana Gileyadhi, va na Israyeli va di tshangana vaya zumba Misipa.

¹⁸ Vathu ni vathangeli va Gileyadhi va di ganedzisana khu gyawe, khavo: “Khu mani a na phelago khuye guya dwana ni va na Amoni? Uyoyo khuye a na khalago muthangeli wa vavbanyi vatshavbo va Gileyadhi.”