Vakolosi 3 - Bhibhiliya Nya Guage

¹ Aholu mwa gu bani mu wugide gumogo ni Kristo garadzegani khu gu vbweta silo si guromo vbatshani, iyo a guromo Kristo a khadego nyamudye ga Nungungulu.

² Alakanyani silo sa vbatshani, nasiri silo sa mafuni momu,

³ kholu enu mu fude ni Kristo, guvbanya gwanu gu sihidwe gumogo ni Kristo ga Nungungulu.

⁴ Guvbanya gwanu nya lisine khu Kristo, gikhati uye a na dzi wonegisago, enu nenu mu na wonega gumogo naye mu na tade khu wudhumo.

Muthu muphya khu ga Kristo

⁵ Songani myonyoni gwanu gunavela gwatshavbo nya wuthu wa mafuni: Wubhayi, horo, wuphuphulu, mahingigedzo nya guvivbe ni ligungo a gu idzosaye ni gu khozela vanungungulu nya malipha.

⁶ Silo sesi khiso si wusago likhulo la Nungungulu ga vale nyamba yingela.

⁷ Khidzo mu nga bani mu gu gira nenu gale, mu na gu vbanya ndrani nya silo soso.

⁸ Olu gu vbwetega mu tshulega ga satshavbo soso, mu nyenya dzizanga, ni likhulo, ni ndrwadza, ni milembo, ni magana nya gunyenyeze ya kanani gwanu.

⁹ Mu nga liphelani khu gyanu. Enu mu tshude muthu wa gale ni mavbanyelo yaye,

¹⁰ mu ambade muthu muphya oyu a vbahwago nyaluphye khu guti gasi a fanana ni muwumbi waye.

¹¹ Gukhugela olu, gu mwalo gambe guhambana nya va nya mayigo ni Vajudha, va nya gu hana wugwera ni ava nyamba hana wugwera, va dhoropani ni va vbavbandze, khumbi ni muthu nya gutshulege. Kristo khuye satshavbo, gambe womo ga satshavbo.

¹² Enu mu vathu va Nungungulu, kholu uye a ngu mi haladza, gambe a mi hathide. Khu kharato, gu vbwetega muri ni monyo nya gupwele wusiwana, nya ndruda, nya gu dzi nogise, nya gurule ni gutimisela.

¹³ Phasedzanani mu tsetselelana khu gyanu, tsetselelanani kha nga Pfhumu a mi tsetseledego.

¹⁴ Vbatshani nya satshavbo vegani lihaladzo a gu ilo li tshanganisago silo satshavbo.

¹⁵ Myonyoni gwanu gu na fume gurula gwa Kristo, mu ranedwago ugo mu gu wumba givili gimwegyo. Khalani vathu va kodzago gubonga.

¹⁶ Mahungu ya Kristo ma na vbahe ndrani gwanu ma gu andra khu guti gwatshavbo hevbudzanani, mu ningana wusingalagadzi khu gyanu. Embelelani dzindzimo ni sizimba na mu gu bonga Nungungulu khu monyo wanu watshavbo.

¹⁷ Silo satshavbo mu na ganelago mwendro gu si thuma girani khu lina la Pfhumu yathu Jesu Kristo, mu bonga Nungungulu Babe khu uye.

Mavbanyelo ya pangoni

¹⁸ Vagadzi, yingelani vama vanu, kholu khiso si yelago ga vale va khodwago ga Pfhumu.

¹⁹ Enu vama, haladzani vagadzi vanu, mu nga va goroseli.

²⁰ Sanana, yingelani vavelegi vanu siloni gwatshavbo, kholu khiso si tsakisago Pfhumu.

²¹ Vavelegi mu nga gorosi sanana sanu, gasi si si vbeli tshivba.

²² Sithumi, yingelani siloni gwatshavbo vale mu va thumelago mafuni momu, nasiri basi gikhati va mi ghadhago, nga khwatshi mwa gu dwanela basi gu va tsakisa, aholu khu gutshulega nya myonyo yanu ni gu thava Pfhumu.

²³ Satshavbo mu girago girani khu monyo wanu watshavbo khwatshi mwa gu thumela Pfhumu nasiri vathu.

²⁴ Dzitini gukhenu Pfhumu a na mi tshatshazela a mi ninga guhodza thomba yaye. Enu mwa gu thumela Kristo a gu Pfhumu nya lisine.

²⁵ Aholu, oyu a girago guvivba a na tshatshazedwa khu guvivba a giridego. Avba kha gu na hathwa khu khovbe nya muthu.