Vahebheru 9 - Bhibhiliya Nya Guage

Dzimhamba nya tumbunugo ni mhamba ya Nungungulu

¹ Gidzumeledzwano nya guhegule gi diri ni milayo nya maphaselo yaye, ni nyumba nya miphaso nya gugirwe khu mandza nya vathu, umo a nga bani a gu khozedwa umo Nungungulu.

² Va di vbahide nyumba nya miphaso yi nga kabaniswa khu sipandre sivili. Makhuvini nya guhegule gu di ranwa gupwani “Wulanga nya Guage.” Gu di vegwa umo kandriya nya ndralama ni meza nya sibaba nya guphasedwe Nungungulu.

³ Aholu makhuvini nya wuvili, wu diromo wulanga nya miphaso wu ranwago pwani “Wulanga nya Guage Ngudzu.”

⁴ Khumo gu nga bani guromo giluvelo nya ndralama, va nga bani va gu vbisela avbo libani. Gu di khala umo ngasa nya gidzumeledzwano nya gugirwe khu ndralama. Ndrani nya ngasa gu diromo gikhalyana nya ndralama ni manaha ni ndronga ya Aroni, eyi yi nga thungago senge, ni siwindri sivili gu nga bani gu lovidwe avbo milayo nya gidzumeledzwano.

⁵ Khu vbatshani nya ngasa gu di vegidwe sifananiso nya dzikerubhimi dzi yeyedzago wudhumo wa Nungungulu ni mambapi yawe ma thawulugedego vbagiluvelotunu nya miphaso nya guhandze sighoho. Aholu khandrigyo egi gikhati nya gusasamedzele gimwegyo khu gimwegyo silo sesi.

⁶ Na gu dongisedwe satshavbo sesi, vaphasi nya mhamba va di bela matshigu yatshavbo makhuvini nya guhegule, Wulanga nya Guage, gasi gu thuma thumo wawe.

⁷ Aholu, makhuvini nya wuvili, gu ranwago Wulanga nya Guage Ngudzu, gu di bela basi muphasi nya khongolo nya mhamba, gumogo khu mwaga. Uye a di ningela ga Nungungulu novba nya sirengo khu sighoho saye ni esi si nga girwa khu vathu khu wuhangi.

⁸ Khu kharato, Liphuvbo nya Guage li ngu hi hevbudza gukhilo na gu nga gu thuma makhuvini nya guhegule gu ranwago “Wulanga nya Guage,” yi nga segidwe ndzila nya gubele makhuvini nya wuvili gu ranwago “Wulanga nya Guage Ngudzu.”

⁹ Egi giyeyedzo ga gikhati gegi, gu yeyedza gupwani miphaso ni dzimhamba nya sirengo hi ningelago ga Nungungulu kha si vbelelisi guaga myonyo ya vale va khozelago.

¹⁰ Miningelo ni dzimhamba dzodzo, a diri guhodza ni gusela ni yimbe mikhuwo nya gu dzi agise, yi nga bani yiri ni giphaso basi gikhati Nungungulu a nga bani a si gu vbindrugedzi silo satshavbo si gu khala siphya.

¹¹ Aholu Kristo dzude kha nga Muphasi nya Khongolo nya mhamba nya silo nya sadi si nga gutago. Nyumba nya miphaso a thumelago umo yikhongolo, yi vbelede guvbindra eyi ya gale; khandri yi di vbahwa khu vathu, gambe kha yi lumbi litigo leli.

¹² Kristo kha bela Wulangani nya Guage Ngudzu na pharide novba nya dziphongo ni dzimombe, aholu, a di ningela Novba waye, a hi resela kharato guvbanya nya gupindruge.

¹³ Kholu milovba nya dziphongo ni dzikuzi ni nguma nya mombe nya ngadzi wu nga bani wu gu thedwa vbatshani ga ava va nyenyezidego, wu diri ni tshivba nya gu va handze khu vbavbandze basi.

¹⁴ A gu bani ari guralo, nga pimisani edzi novba wa Kristo wu gu wukhongolo khidzo! Uye, khu tshivba nya Liphuvbo nya gupindruge, a dzi ningede ga Nungungulu kha nga mhamba yi vbeledego. Novba waye wa gu hi handza khu ndrani, wu dusa mithumo yathu nya gufe. Gasi hi kodza gu thumela Nungungulu a vbanyago.

¹⁵ Khu kotani nya isoso, Kristo khuye mutshanganisi nya gidzumeledzwano nya giphya, gasi vale va nga ranwa khu Nungungulu va hakhe makategwa nya gupindruge, aya Nungungulu a nga tumbisago. Esi si ngu girega khu kotani nya gufe gwaye gu nga vbulugisago vathu mugighohoni va giridego na gi nga gu thuma gidzumeledzwano nya guhegule.

¹⁶ Kholu sa gu kala sileletelo si duga, gu yeyedza gupwani fude mune wakone a nga si girago.

¹⁷ Kholu, sileletelo kha si thumi na nga gu vbanya oyu a nga si girago. Aholu, sa gu thuma hwane nya gu bani a fude muthu yoyo.

¹⁸ Khu kharato, gidzumeledzwano nya guhegule, kha gya phela gu thuma nyamba vbaladzwa novba nya sirengo.

¹⁹ Guhegula, Mosi a di tivisa ga vathu vatshavbo sileletelo satshavbo nya Nayo. Khu gu handzamedza, a di dzega novba nya dzikuzi ni dziphongo a wu pata ni mati a mitegedzela libhuku nya Nayo ni vathu vatshavbo, khu mawoya nya guthedwe nyewu nya gufuvile, ni sasi,

²⁰ a ganela, khuye: “Owu khu novba wu tiyisago gidzumeledzwano Nungungulu a mi rumidego gu gi landrisa.”

²¹ Khu magirelo ya mamowo, Mosi a di mitegedzela novba nyumba nya miphaso ni sombo satshavbo si thumelago miphaso.

²² Khu Nayo, silo satshavbo sa gu agiswa khu novba. Ni sighoho niso sa gu tsetseledwa basi khu gu vbaladzwa nya novba.

Mhamba ya Kristo yi ngu handza sighoho

²³ Silo sesi si nga bani siri gupimedzela nya silo nya lisine sa ndzadzini si yede gu agiswa khu maagiselo yoyo; aholu, silo nya lisine sa ndzadzini wurumba waye, sa gu lomba gu agiswa khu dzimhamba nya lisine guvbindra edzi dza gale.

²⁴ Kholu Kristo kha bela Makhuvini nya Wulanga nya Guage Ngudzu nya gugirwe khu mandza nya vathu a gu giyeyedzo nya Wulanga nya Guage nya lisine. Uye bede ndzadzini gwabune, umo a guromo olu a lombelela khu ethu mbeli ga Nungungulu.

²⁵ Muphasi nya khongolo nya mhamba nya Vajudha a gu bela khu mwaga ni mwaga makhuvini nya Wulanga nya Guage Ngudzu na pharide novba nya sirengo. Aholu, Kristo kha bela aya dzi ningela dzinyondro nya dzingi.

²⁶ Nari pwani a di gira kharato, a di vbweta gusaniseka dzinyondro nya dzingi, gukhugela guvangwa nya litigo. Olu gikhati gi yago guhegisani, uye a dzi wonegiside gumogo basi guvbela, afela gu fuvisa gighoho khu mhamba nya gufe gwaye.

²⁷ Muthu ni muthu emede gufa gumogo basi, khu hwane nya ugo, a lamudwa khu Nungungulu.

²⁸ Khu magirelo ya mamowo, Kristo nuye, ningedwe gumogo basi a gu khala mhamba nya guhandze sighoho nya vathu nya vangi. A na wuya nya wuvili, nasiri guta handza gambe sighoho, aholu, guta vbanyisa ava va virelago uye.