Vahebheru 7 - Bhibhiliya Nya Guage

Melikisedheki, muphasi nya mhamba wa Kristo

¹ Kholu Melikisedheki yoyu a nga bani ari mufumeli wa tigoni ga Salema, a diri muphasi nya mhamba ya Nungungulu a Khusegidego ngudzu. Gikhati Abrahama a nga bani a gu wuya khu litungatunu a nga ya songago vafumeli nya gutale, Melikisedheki a di mu khinga aya mu kategisa.

² Abrahama a di ningela gipandre nya likhumi nya phango watshavbo. Gilo nya guphele, lina gu tshamusela gupwani “Mufumeli nya gululame.” Kha nga a nga bani ari mufumeli wa tigoni ga Salema, lina laye la gu tshamusela gambe gupwani “Mufumeli nya gurule.”

³ Kha tidwi babe waye ni mayi waye, ambari vakokwe vaye, kha gu tidwi gilo khu mahungu nya guvelegwe gwaye ni gufa gwaye. Uye a di khala nga Mwamana wa Nungungulu, a gu simama gu khala muphasi nya mhamba kala gupindruga.

Wuphasi nya mhamba wa Jesu wukhongolo guvbindra owu wa va na Levhi

⁴ Wonani edzi Melikisedheki a nga bani ari khongolo khidzo: Abrahama, nyapandre, a mu ningide gipandre nya likhumi nya phango watshavbo a nga wandrela valala litungatunu.

⁵ Khu Nayo, vaphasi nya mhamba va gu va nyumbani ga Levhi va na ni fanelo nya guhengise gipandre nya likhumi nya silo satshavbo. Avo va gu hengisa ga vandriyawe va gu sanana sa Abrahama navo.

⁶ Melikisedheki a di siri wa nyumbani ga Levhi, aholu, hakhide gipandre nya likhumi nya silo Abrahama a nga phangago litungatunu, a wuya a mu kategisa. A di kategisa uye a nga bani a hakhide situmbiso sa Nungungulu.

⁷ Gu mwalo gukanakana nya gukhethu oyu a kategisago khongolo guvbindra wule a kategiswago.

⁸ Omu nya wuphasi wa na Levhi, gipandre nya likhumi gya gu hakhwa khu vathu va nafago, aholu, avba ga Melikisedheki, kha nga yi ganelago Milowo nya Guage, gipandre nya likhumi gi hakhidwe khu muthu a simamago guvbanya.

⁹ Hi na ganela gukhethu avo va na Levhi va hakhago olu gipandre nya likhumi nya silo nya vathu, va livbide navo gikhati gyogyo gipandre nya likhumi khu mandzani ga Abrahama.

¹⁰ Kholu Levhi a di si gu velegwi, hi na khethu a di nga romo ndrani ga babe waye Abrahama, gikhati a nga mananago ni Melikisedheki.

Wuphasi nya mhamba wa na Levhi wu ngu vbela, aholu wa Jesu khwa gupindruga

¹¹ Nayo va hakhidego va na Israyeli wa gukhugela omu nya wuphasi wa na Levhi, wu pharidwego khu sanana sa Aroni. Aholu, nari gupwani thumo nya wuphasi wa na Levhi wu di vbelede, kha ga nga vbwetega gambe gu manega mumbe muphasi nya nayo wa Melikisedheki a si gu wa nayo wa Aroni.

¹² Kholu, ha gu vbindrugedza maphaselo, nayo nuwo wu na vbweta gu vbindrugedzwa.

¹³ Kholu Jesu Kristo, gu ganedwago satshavbo sesi khu kotani gwaye, a di gu lumba limbe lihundzu, nya gu gima mwalo na moyo nya lihundzu lolo a nga khala muphasi nya mhamba.

¹⁴ Hi ngu dziti gukhethu, khu guvelegwa, Pfhumu yathu a di gu lumba nyumba ya Judha. Aholu, Mosi kha ganela gilo khu lihundzu leli gikhati a nga ganela khu vaphasi nya mhamba.

¹⁵ Satshavbo sesi sa gu wonega gwadi olu, kholu dugelede mumbe muphasi nya mhamba nya gufanane ni Melikisedheki.

¹⁶ Uye kha girwa muphasi nya mhamba khu milowo ni sileletelo nya wuthu, aholu a di girwa muphasi khu tshivba nya guvbanye nya gupindruge.

¹⁷ Kholu, Milowo nya Guage yi ngu mu fakazela, khiyo: “Uwe u na khala muphasi nya mhamba kala gupindruga, khu nayo nya wuphasi wa Melikisedheki.”

¹⁸ Khu guralo, nayo wa gale wu tshipisidwe kholu wu diri mwalo tshivba, wu di si phasi gilo.

¹⁹ Nayo wa Mosi gimwalo ni gimwegyo nya guvbelele wu giridego. Wu diri nyangwa nya gu hi yise ga gitumbo nya gyadi hi dzi kodzago khigyo gu hidzimela vbafuvbi gwa Nungungulu.

²⁰ Gambe gu diromo gusambanya ga Nungungulu. Vambe va khade vaphasi nya mhamba nyambana gisambanyo gegi;

²¹ gasi oyu a di khala muphasi nya mhamba khu gisambanyo, gikhati Nungungulu a nga khuye: “Pfhumu yi sambanyide, kha yi bweleli hwane, khiyo: Uwe u muphasi kala gupindruga.”

²² Khu guralo, Jesu khuye a khadego mutiyisi nya gidzumeledzwano nya gyadi guvbindra egi gya gale.

²³ Gomo gambe guhambana: Vaphasi va gale va diri vangi kholu va di gufa. Va di si dzi kodzi gu simamisa thumoni gwawe.

²⁴ Aholu, Jesu a ngu vbanya kala gupindruga. Wuphasi waye kha wu vbindri wuya ga mumbe muthu.

²⁵ Khu guralo, uye a ngu dzi kodza gu vbanyisa, olu ni gikhati gyatshavbo, vale va hidzimelago ga Nungungulu khu uye, kholu a ngu vbanya kala gupindruga gasi gu lombelela khu avo ga Nungungulu.

²⁶ Jesu khuye Muphasi nya Khongolo nya mhamba hi mu vbwetago. Uye agide, uye mwalo gihoso ambari gighoho, uye hambanisidwe ni sighohi, a gu khusedzwa guvbindra vbatshani ndzadzini.

²⁷ Uye kha giri idzosaye ni vambe vaphasi nya vakhongolo nya mhamba: Kha gu vbwetegi ga uye, khu litshigu ni litshigu, gu ningela mhamba nya guhandze sighoho saye guhegula, a wuya khavbo a ningela mhamba nya guagise sighoho nya vathu. Kholu Uye ningede mhamba gumogo basi, gu vbela, khu gu dzi ningela uye wurumba waye.

²⁸ Nayo wu di hatha vathu nyamba vbelela gu khala vaphasi nya vakhongolo nya mhamba. Aholu, gisambanyo gya Nungungulu gi dzudego khu hwane nya Nayo wa Mosi, gya gu hatha gu khala muphasi nya khongolo nya mhamba, Mwamana a giridwego muthu nya guvbelele kala gupindruga.