Vahebheru 13 - Bhibhiliya Nya Guage

Mavbanyelo nya gutsakise Nungungulu

¹ Simamani mu haladzana khu gyanu kha nga va na ndruye ni ndruye.

² Mu nga divali gu hakha vapfhumba, kholu, vambe, khu gu hakha vapfhumba, va hakhide dzingilozi nyamba dziti.

³ Alakanyani vale va khothedwego mapasoni: Mu dzipwa nga khwatshi mu womo pasoni gumogo ni avo. Alakanyani vale va tshaniswago nga khwatshi mu ngu tshaniswa gumogo navo.

⁴ Lipango li na ningwe githawo khu vathu vatshavbo. Vama ni vagadzi vawe va na tumbane khu gyawe. Nungungulu a na lamula va nya gugira wuphuphulu ni vale va girago wubhayi.

⁵ Guvbanyani gwanu mu nga dzi digi mu gu fumwa khu makolo nya dzitsapawu; nengelani khu esi mu gu naso, kholu Nungungulu ganede, khuye: “Eni gima kha nyi na mi diga.”

⁶ Khu guralo, hi ngu tiya longo hi ganela, khethu: “Pfhumu khuye muphasedzeli wangu, eni kha nyi thavi gilo. A nga nyi gira ginani muthu?”

⁷ Dundrugani vahevbudzi vanu, ava va nga mi tivisa Mahungu ya Nungungulu. Alakanyani edzi va nga vbanya ni gufa khidzo, mu landrisa gukhodwa gwawe.

⁸ Jesu Kristo khuye wa moyo, wa vbanova, wa muhuno, ni wa gikhati gyatshavbo.

⁹ Mu nga dzi digi mu sengwa khu sihevbudzo nya guhambanehambane, si mi dusago ndzilani nya lisine. Kholu gwadi myonyo yathu yi hakhe tshivba nya wuhigo wa Nungungulu, nasiri khu gu landrisa sihena nya milayo nya guhodze; kholu avo va landrisago milayo yoyo, gimwalo giphaso va gi manago ga iyo.

¹⁰ Hi na ni giluvelo, avbo vale va thumelago Nyumbani ga Nungungulu va gu mwalo fanelo nya guhodze avbo.

¹¹ Kholu muphasi nya khongolo nya mhamba, a gu bela makhuvini nya Wulanga nya Guage Ngudzu, na pharide novba nya sirengo gasi guya ningela mhamba nya guhandze sighoho, aholu sirumbi sakone nya sirengo si vbiswa vbavbandze nya lizumbo.

¹² Khidzo kharato, Kristo nuye, songidwe vbavbandze nya libhiyo nya lidhoropa gasi afela guagisa sighoho nya vathu vatshavbo khu novba waye.

¹³ Khu guralo, hongoleni nethu vbafuvbi ga Jesu Kristo, vbavbandze nya libhiyo hi ya saniseka ni gu poyidwa gumogo ni uye.

¹⁴ Kholu, mafuni momu, hi mwalo lidhoropa nya gutiye kala gupindruga; hongoleni hi vbwete lidhoropa li nga gutago.

¹⁵ Khu guralo, hongoleni hi rungudze Nungungulu khu Jesu. Rungudzo yoyo i mhamba hi ningelago, yi ningedwago khu magana ma rungudzago lina laye.

¹⁶ Mu nga digi gu gira ndruda ni gu phasanani khu gyanu kholu khiyo mhamba yi tsakisago Nungungulu.

¹⁷ Yingelani vathangeli vanu, mu landrisa sileletelo sawe. Kholu avo khavo va khedziselago gikhati gyatshavbo mihefemulo yanu, va na wudziswa khu Nungungulu khu kotani nya isoso. Mwa gu va yingelani, avo va na thuma na va tsakide, kholu, va gu thuma na va gu garadzega kha si na phasa gilo gwanu.

¹⁸ Simamani mu hi lombelela, kholu hi na ni lisine nya gukhethu mapimo yathu ma agide, kholu gikhati gyatshavbo ha gu dwanela gu gira esi nya sadi.

¹⁹ Ngudzungudzu nyi ngu lomba ga enu gukheni mu lombe gasi nyi wuye gambe gwanu khu gu vbiredza.

Nombelo

²⁰ Khu guralo, Nungungulu nya gurule, khu novba nya gidzumeledzwano nya gupindruge wuside khu ga vafudego Pfhumu yathu Jesu Kristo, a khadego Muhavisi nya khongolo nya tshambi.

²¹ Nungungulu nya gurule a na mi ninge satshavbo esi si gu sadi, gasi mu girani guhaladza gwaye. Khu Kristo Jesu, a na thume gwathu satshavbo esi a si golago. A na rungudzwe Kristo kala gupindruga! Amen.

Magana nya guhegise ni malosedzela

²² Vandriyangu, nyi ngu mi lomba gukheni mu yingise khu mapimo yanu yatshavbo ni gutimisela magana yaya nya gu mi tiyisele. Kholu lidangalila leli nyi mi lovedego kha la lapha.

²³ Dzitini gukhenu ndriyathu Thimoti dugide khu pasoni. A gu vbiredza gu vboha nyi nata naye iyo gwanu, gikhati nyi tago nyita mi wona.

²⁴ Losedzelani vathangeli vanu ni vakhodwa vatshavbo nya libandla la Nungungulu. Vandriyathu va Italiya va ngu mi losedzela navo.

²⁵ Wuhigo wa Nungungulu wu na khale ni enu mwatshavbo.