Vahebheru 1 - Bhibhiliya Nya Guage

Nungungulu ganede gwathu khu Mwanaye

¹ Gale Nungungulu ganede dzinyondro nya dzingi ga vababe vathu khu maganelelo nya guhambanelane khu magana ya vaprofeti.

² Gasi olu, ga gikhati gegi nya guhegise, Nungungulu ganede gwathu khu Mwanaye, oyu a vangidego khuye litigo latshavbo, a gu mu ninga tshivba nya gufumele silo satshavbo.

³ Mwamana khuye gungangamela nya wudhumo wa Nungungulu, khuye gambe giwonelo nya guvbelele gya Nungungulu. Khuye a pharago silo satshavbo khu tshivba nya magana yaye. Hwane nya gu na agiside vathu vatshavbo, a diya khala wulanga waye ndzadzini, nyamudye ga Nungungulu nya Tshivba Yatshavbo.

Mwamana khongolo guvbindra sirumwa sa Nungungulu

⁴ Mwamana khongolo guvbindra dzingilozi kholu hakhide khu ga Babe lina nya guvbindre malina nya dzingilozi.

⁵ Khu lisine, khu yevbini yimbe ngilozi Nungungulu a yi embedego, khuye: “Uwe u gyanana gyangu, muhuno nyi gu velegide?” Gambe ni gukhuye: “Eni nyi na khala Babe wago, uwe u na khala gyanana gyangu?”

⁶ Gikhati Nungungulu a nga rumelago Mwamana waye wa moyo, a di ganela gambe, khuye: “Dzingilozi dzatshavbo dza Nungungulu dzi na mu khozele.”

⁷ Nungungulu, a ngu ganela mayelano khu dzingilozi dzaye, khuye: “Nungungulu a gu rumela dzingilozi dzaye dzi khale maphuvbo, ni sithumi saye si khale malavbelavbe nya nilo.”

⁸ Aholu, na gu thula Mwamana, a di khuye: “Uwe u Nungungulu, mufumo wago wu na simama kala gupindruga. U ngu fumela litigo lago khu gululama.

⁹ U ngu gola gululama, u nyenya guvivba. Khu guralo, Nungungulu, a gu Nungungulu wago, a gu todzide khu mafura nya gunengele, a gu khusedza vbatshani ga dzipari dzago.”

¹⁰ A engedza gambe, khuye: Uwe Pfhumu, guphela u di vanga litigo, ni dzindzadzi sigiro nya mandza yago,

¹¹ aholu sigiro satshavbo nya mandza yago si na vbela, gasi uwe u na simama kala gupindruga; si na kuwuluga kha nga guambala.

¹² U na si fumba kha nga gifenengelo, u si vbindrugedza kha nga guambala; aholu, uwe u na simama gu khala idzosaye, gima khu na nga gumba.

¹³ Nungungulu gima a si gu ganeli ga ngilozi gukhuye: “Khala khu nyamudye gwangu, kala nyi vega valala vago vbavbatshi nya migondro yago.”

¹⁴ Ina maphuvbo yatshavbo ya Nungungulu, khandri ma di rumedwa guya phasedzela basi vale va hakhidego thomba nya guvbanyiswe, gani?