Vafilipi 3 - Bhibhiliya Nya Guage

Kristo khuye ndzila nya guvbanyise

¹ Khu guhegisa, vandruye, nya gu gola gu mi embela, kheni: Nengelani ga Pfhumu! Eni kha nyi garali khu gu mi lovela khu mahungu yaya kholu ma ngu mi phasani.

² Dzi woneleni ga ava va girago guvivba, dzi woneleni ga dzimbwa dzodzo, dzi woneleni ga ava va vbwetago wugwera nya malipha.

³ Kholu ethu khethu hi hakhidego wugwera nya lisine, ethu hi khozelago khu Liphuvbo la Nungungulu, hi vegago wuzundzo wathu ga Jesu Kristo, ethu hi si vegigo gitumbo gyathu avba nya tumbunugo nya wuthu.

⁴ Gasi eni nyi diri ni fanelo nya gutumbe sihena nya giwuthu. Kholu, a gu bani a romo nya guyele gu tumba tumbunugo nya wuthu, eni kheni wakone nya guvbindre vatshavbo:

⁵ Kholu eni nyi hanide wugwera khu litshigu nya livbandre na mararu nya guvelegwe gwangu; nyi Mujudha nya mavelego nya lihundzu la Bhejami; nyi gyanana nya Vahebheru. Ha gu khedza khu gulandra Nayo, eni nyi diri Mufarisi;

⁶ nyi di phara Nayo khu tshivba ni tshivba, nyi gu sanisa Libandla la Kristo. Nyi di gu vbanya nyambana gihoso nayoni.

⁷ Aholu, satshavbo nyi nga bani nyi si wona kha nga silo nya giphaso gwangu, nyi si digide khu kotani ya Kristo.

⁸ Khu lisine, satshavbo soso nya gu si wona nga silo nya ndzilo nya gu si pimanisa ni wuhigo wukhongolo nya guti Kristo Jesu, Pfhumu yangu. Eni nyi nyenyide silo satshavbo khu kotani gwaye.

⁹ Satshavbo nya gu si wona nga ndzilo khu gufela gu mana Kristo nyi hengela naye guvbanya. Eni nya gu vbanya wulongoni gwa Nungungulu, khandri khu kota nya gulandrise Nayo, kholu wulongo nya wadi ni Nungungulu wa gu hungwa khu gukhodwa.

¹⁰ Egi nyi gi vbwetago basi khu guti Kristo, nyipwa tshivba nya guwuge gwaye, nyi hengela naye gusanisekani, kala nyi gufa kha nga uye,

¹¹ ni gitumbo nya gumane guwuga khu ga vafudego.

Pawulo a gu tutumela guya koka givango

¹² Kha nyi ganeli gukheni eni nyi vbohide mahegiso, mwendro gukheni nyi vbelede, aholu nya gu simama guya mbeli nyi zama gu si mana, kha nga eni neni nyi manidwego khu Kristo Jesu.

¹³ Vandruye, kha nyi dzi pembi nyi alakanya gukheni nyi gu mane guvbelela, aholu gyomo gilo nyi girago, khegi: Nya gu divala esi si tshadego hwane, nyi zama gu manela esi si guromo mbeli gwangu.

¹⁴ Khu magirelo yoyo, nya gu simama gu hongola mbeli kala mahegiso, gasi guya mana tshatshazelo Nungungulu a tumbisidego guya hi ninga Ndzadzini khu ga Kristo Jesu.

¹⁵ Ethu hatshavbo hi dandridego gukhodwani, gu vbwetega na hiri ni gupima nya nga ogu. Aholu vambe va gu mana mapimo nya guhambane ni aya, Nungungulu a na va tulela guti lisine nya silo.

¹⁶ Aholu, ni ga mevbini magirelo, hongoleni hi simame gulandra khu ndzila yeyi hi tago na hi gu yi landra khu gale.

¹⁷ Vandriyangu, landrani mavbanyelo yangu mu wuya mu gu pimedzela gambe vale va vbanyago khu mavbanyelo nyi va yeyedzidego.

¹⁸ Nyi mi embedeni dzinyondro dzingi, ni olu gambe nyi ngu engedza gu ganela khu gulila kheni, vbakari gwanu vomo nya vangi va dzi girago valala nya gihambano gya Kristo.

¹⁹ Mahegiso yawe khu gumbemba, kholu Nungungulu wawe khu girumbu. Va gu dzi zundza khu esi va nga yela gu thedwa khiso ndzitshoni, mapimo yawe ma gu alakanya basi sa mafuni momu.

²⁰ Gasi ethu, hi sivelegwa sa Ndzadzini, gambe khiyo hi lindrelago gukhethu a nata khiyo Muvbanyisi wathu, Pfhumu Jesu Kristo.

²¹ Uye a na vbindrugedza givili gyathu nya gusolege a gi gira gi fanana ni givili gyaye nya gungangamele, khu tshivba a fumago khiyo siloni satshavbo.