Tito 2 - Bhibhiliya Nya Guage

Gihevbudzo nya lisine

¹ Uwe hevbudza esi si longolokago ni sihevbudzo nya lisine.

² Embela madhota ma khale vathu nya gu dzi pimele, nya giruti, nya mapimo, va lulama gukhodwani ni lihaladzo ni gutimisela.

³ Embela nayo vasingalagadzi nya vanyamayi va vbanye nga vathu va agidego, va nga khali va nya milembo, ambari gu dzi gira dzikhumbi nya wadwa, aholu va na hevbudze esi si gu sadi,

⁴ gasi vanyamayi nya vaphya va kodze gu dzi vegisa, va haladza vama vawe ni sanana sawe;

⁵ va kodze gu dzi phara ni gurula, ni gu sayisa dzindranga dzawe, va yingela vama vawe, gasi vathu va si ganeli guvivba khu Mahungu ya Nungungulu.

⁶ Laya madzaha ma dzi vegisa nayo.

⁷ Uwe nuwe gu vbwetega u khale giwonelo nya mithumo ya yadi ga satshavbo; guhevbudzani yeyedza lisine, u yeyedza gululama khu mavbanyelo yago.

⁸ Ganela silo nya lisine, gasi a si manegi muthu nya gu gu kawuke, va fela gu khala dzitshoni valala vathu khu gu hamuga gilo nya guganele khu mahungu yathu.

⁹ Dzikhumbi dzi na ninge githawo ga vamune vawe, dzi gire silo nya sadi nya gu va tsakise, dzi si phikhizani navo,

¹⁰ ambari gu va bela. Aholu, dzi na yeyedze gukhidzo dzi tumbegide ga satshavbo dzi girago, gasi gu rungudzwa sihevbudzo hi hakhidego khu ga Nungungulu, Muvbanyisi wathu.

Kristo khuye litshina nya guvbanyiswe gwathu

¹¹ Kholu, Nungungulu a hi tulede guti wuhigo waye, afela gu vbanyisa vathu vatshavbo.

¹² Wuhigo wowo wa gu hi hevbudza gu diga mavbanyelo nyamba khodwa, ni gu navela silo nya mafu yaya, gasi hi vbanye tigoni momu khu gu dzi phara, ni gululama, ni gutumbega ga Nungungulu.

¹³ Gu ngu hi hevbudza gambe guvbanya na hi gu tumba litshigu nya gunengele gu na gu wonegiswago khilo wudhumo wa Nungungulu wathu nya khongolo ni wa Muvbanyisi wathu, Jesu Kristo.

¹⁴ Uye a di dzi ningela wurumba waye kotani gwathu, afela gu hi vbulugisa guvivbani gwatshavbo, a hi gira vathu nya guage va lumbago uye basi, va dzi vegisedego gu gira esi nya sadi.

¹⁵ Hevbudza silo sesi satshavbo, u laya ni gu kawuka khu tshivba yatshavbo u ningidwego. U nga dzumeli ni moyo a gu yeyisa.