Sofoniya 3 - Bhibhiliya Nya Guage

III. GULAMUDWA GWA JERUSALEMA Wundzundzwane wa vathangeli

¹ Libango ga lidhoropa nya wuwugeli, nya gutale khu manyala ni dzihanyi!

² Kha li yingisi lito, ambari gu yingisa gululekwa. Kha li vegi gitumbo ga Pfhumu Nungungulu, ambari gu hidzimela ga Nungungulu waye.

³ Vathangeli vaye va gu fanana ni dzinghala dzi ngurangurago vbakari gwaye. Valamuli vaye gu fanana ni masolwa vbasilambotunu, ma hodzago nyamba tshiya sirambo nya gute hodza mindru.

⁴ Vaprofeti vawe kha va phasi gilo, va mwalo githawo, vathu nya wundzundzwane; vaphasi vawe nya mhamba, va nyenyeziside wulanga nya miphaso, va wegedza nayo.

⁵ Pfhumu Nungungulu a gu romo vbakari nya lidhoropa leli, lulamide, kha giri gilo nya guvivbe. Gugya ni gugya uye a gu thuma gulamula gwaye guwonegelani; kha phazami, aholu va nya guvivbedwa khu monyo kha vapwi dzitshoni.

Jerusalema kha kodza gu mana gihevbulo umo nya matimo

⁶ Nyi mbembiside mayigo, nyi thesela vbavbatshi makhokhola yawe, nyi vbindrugedzide dzindzila dzawe dzi khala giwula. Avbo nya gu, ni muthu a si vbindri khumo; madhoropa yawe ma khungumuledwe, kala a si manegi ni muthu a vbanyago umo.

⁷ Eni nyi di, kheni: Khu lisine, olu mu na nyi ninga githawo; mu dzumela gulaywa; khu kharato ndranga yanu ya sa mbembiswa, kha nga idzo nyi nga bani nyi na hungide khidzo, aholu avo va di vindrugela guwuga ni dzimindru va gu ghohetela sigiro sawe.

⁸ Khu kharato, Pfhumu Nungungulu wari, khuye: “Nyi lindreleni, kala litshigu nyi na wugago nyita mi phanga. Kholu gikungo gyangu khegi nya gute tombanisa mayigo, nyi tshanganisa mifumo; gasi nyi kodza guta guhula giviti gyangu, ni guvbisega nya likhulo langu latshavbo vbatshani gwawe. Kholu litigo leli latshavbo li na dagarela khu nilo nya guvbenye gwangu.”

IV. GITUMBISO NYA GUWUSEDZWE Va nya mayigo va na vbindrugedza mavbanyelo

⁹ Khu kharato, nyi na agisa magana nya mayigo, gasi vathu vatshavbo va kodze gu rana lina la Pfhumu Nungungulu, ni gu mu thumela khu monyo moyo.

¹⁰ Gukhugela khisikheyi nya mitsongo ya Etiyopiya, vakhozeli vangu, a gu vathu vangu va phalalegidego, va na nyi resela miphaso.

Mitshaledwa ya Israyeli

¹¹ Litshigu lolo, uwe khu na ngapwa gambe dzitshoni khu sigiro u nyi giredego, kholu nyi na fuvisa vbakari gwago, vatshavbo va nya matshandza ni gu dzi khusedza, uwe gima khu na dzi gugumugisa gambe mugigomoni gwangu nya Gukatege.

¹² Aholu nyi na tshiya vbakari gwago vathu nya sisiwana ni va nya gusolega; va na gu vegago gitumbo gyawe linani la Pfhumu Nungungulu.

¹³ Mitshaledwa ya Israyeli kha yi na gira gambe guvivba, mwendro gu ganela malipha; kanani gwawe kha gu na manega gambe lidimi nya wudambane. Kholu va na hodza va khura va lala ligovbe nya ladi na va rude nyamba thusedzedwa khu muthu.

Gukhusedzwa ga Jerusalema

¹⁴ Embelela khu gutsaka uwe nyamahegyane wa Siyoni, kulungelani khu gutsaka enu vathu va Israyeli, nengela u womba kulungwane khu monyo wago watshavbo, uwe nyamahegyane wa Jerusalema!

¹⁵ Pfhumu Nungungulu ndreyiside sitsayiso a nga bani a dongisede guta gu tsayisa khiso, a tutumiside hwindzo valala vago, Pfhumu Nungungulu, Mufumeli wa Israyeli, womo vbakari gwago. Gima khu na nga wona gambe guvivba.

¹⁶ Litshigu lolo, va na ganela va embela Jerusalema, khavo: U nga thavi uwe Siyoni! Mandza yago ma nga vbeli tshivba!

¹⁷ Pfhumu Nungungulu wago, womo vbakari gwago, kha nga muvbanyisi nya tshivba; Uye a ngu nengela khu gutsaka khu kotani gwago, khu lihaladzo laye, a na gu wusedza u khala muphya, khu kotani yago, uye a na hana ni guwomba mikulungwane nya litsako.

¹⁸ Nyi na tombanisa avo va gu wugedego khu gu hamuga mitshangano nya mibuzo, avo va nga bani va khade hwindzo ni uwe, na va rwade rwalo nya gihegiso.

Guwuya ga avo va phalalegidego

¹⁹ Wona nya gukhuwe, khu gikhati gyogyo nyi na mbembisa valala vago vatshavbo; nyi vbanyisa silima ni gu wuyisela vatshavbo va nga bani va tutumisidwe; dzitshoni dzawe dzi na vbindrugedza dzi khala litsako, guzundzega ni ndruma yanu yi na phalalega ni mayigo yatshavbo ma nga bani ma mi poyila.

²⁰ Khu gikhati gyogyo, avbo nyi na gu bani nyi mi tshanganiside nyaluphye, nyi na mi thangela mbeli, nyi mi ningani lina nya wudhumo vbakari ga mafumbu yatshavbo ya tigoni, avbo nyi na gu wuyisago dzikhumbi dzanu dzatshavbo dzi nga bani dzi vbagedwe na mu gu dzi wona khu maho yanu, a ngu ganela Pfhumu Nungungulu.