Nehemiya 8 - Bhibhiliya Nya Guage

Ezira a ngu hevbulela vathu Libhuku nya Nayo

¹ Avbo li nga vbohago litshigu nya livbandre na mavili nya ngima nya livbandre na mina, va na Israyeli na vari madhoropani gwawe. Vathu vatshavbo va di tombana tandralani nya nyangwa yi ranwago gupwani nyangwa nya Mati, va lomba mulovi Ezira gu va resela libhuku nya Nayo wa Mosi, wu lovidwego khu Pfhumu Nungungulu ga va na Israyeli.

² Muphasi nya mhamba Ezira, a dita ni Libhuku nya Nayo mbeli ga gidzemo gi nga bani na gi hengeledzanide nya vama ni vanyamayi, ni vatshavbo avo va nga bani na vari ni tanga nya guyingise iso si hevbudwago. A diri litshigu nya guhegule nya ngima nya livbandre na wuvili.

³ A di ema a li hevbula tendrelani wu nga bani wu romo vbafuvbi ni Mwanya nya Mati, gukhugela dzimindrudzile kala vbakari nya mihani, a di hevbulela vama ni vanyamayi ni vatshavbo avo va nga bani na vari ni tanga nya guyingise, vathu vatshavbo va di yingisa khu githawo Libhuku nya Nayo.

⁴ Mulovi Ezira a di ema khu vbatshani nya wutala nya gugirwe khu mapulango wu nga bani wu giredwe thumo yoyo; vbafuvbi gwaye, khu nyamudye gwaye va di emide: Matitiya, Sema, Uriya, Hilikiya, ni Mahaseya; khu nyambade gwaye, a ema pedhaya, Misayeli, Malikiya, Hasumi, Hasibhadhana, Zakariya, ni Mesulamo.

⁵ Ezira, a di tula Libhuku na gu wonwa khu vathu vatshavbo, kholu a diri khu vbatshani, vathu vatshavbo va di khuga va ema.

⁶ Ezira a di dhumisa Pfhumu Nungungulu, Nungungulu nya khongolo; vathu vatshavbo va hakha, khavo: “Amen! Amen!” Na va gu khusedza mandza; va di nogisa dzithamo va khozela Pfhumu Nungungulu, dzikhovbe dzawe na dzi tsitside vbavbatshi.

⁷ Muthu ni muthu a di ema wulanga waye, na va gu tshamusedwa nayo khu Jesuwa, Bhani, Serebhiya, Jabini, Akube, Sabhetayi, Hodhasi, Mahaseya, Kelita, Azariya, Jozabhadhi, Hanani, Pelaya gumogo ni va na Levhi.

⁸ Va di hevbula umo nya Libhuku nya Nayo wa Nungungulu va pwadzisa gwadi, bwelo khavbo va ninga tshamuselo nya iso si hevbudwego gasi va si pima gwadi.

⁹ Avbo va nga yingisa magana yaya nya milayo, vathu vatshavbo va di lila. Aholu Nehemiya, a nga bani nari mwamangulu, Ezira nari muphasi nya mhamba bwelo khavbo nari mulovi, gumogo ni va na Levhi va nga bani na va gu hevbudza vathu, va di embela gidzemo, khavo: “Litshigu leli li agisedwe Pfhumu Nungungulu wanu, mu nga tshaniseki ambari gulila.”

¹⁰ Nehemiya a di va embela gambe, khuye: “Indrani mu ya hodza dzinyama nya gunone, mu sela ni wadwa nya gutshambe ni gulombela, mu rumela navo guhodza vale va ngamba dzi dongisela; kholu litshigu leli nya likhongolo li agisedwe Pfhumu Nungungulu; mu nga garadzegi kholu; litsako la Pfhumu khilo li gu tshivba yathu.”

¹¹ Va na Levhi va di degudza vathu, va va embela, khavo: “Degulani mu nga saniseki, kholu eli litshigu nya guage.”

¹² Vathu vatshavbo va di hongola magaya gwawe, vaya hodza ni gusela va nengela ngudzu va rumela iso va nga si tshiyago ga vambe, kholu va di manide tshamuselo nya magana va nga embedwego.

Buzo nya Mitshatsha

¹³ Khu litshigu li landrelago, vathangeli nya mahundzu, vaphasi nya mhamba ni va na Levhi, va diya tshangana ga mulovi Ezira, gasi gu yingisa tshamuselo nya Nayo.

¹⁴ Va diya mana na gu lovidwe umo nya Nayo iso Pfhumu Nungungulu a nga bani na leletede Mosi ga sanana sa Israyeli khuye va fanede gu khala mitshatshani, vbakari nya buzo khu ngima nya livbandre na mivili.

¹⁵ Va huwelela ni gu tivisa madhoropani gwawe gwatshavbo gumogo ni Jerusalema, va ganela, khavo: “Khugani mu gwela sigomoni muya pila matamo nya miolivha ya khabini ni ya mahangeni, ni matamo nya migure ni migindru ni mahanvu nya gutale, mu dzi vbahela mitshatsha nga idzo gu lovidwego khidzo.”

¹⁶ Khavbo avbo vathu va diya pila matamo yoyo va ta gira khayo mitshatsha, muthu ni muthu a dita vbaha vbatshani nya langwe yaye ni mitendrelani gwawe, ni dzinyangwani nya Nyumba ya Nungungulu, ni tandralani nya Mwanya nya Mati, ni tandralani nya Mwanya wa Efrayimi.

¹⁷ Tshangano watshavbo nya avo va nga wuyago khu wugumbitunu va di gira mitshatsha va khala umo; kholu va na Israyeli gukhugela matshiguni ya Jesuwa, mwamana wa Numi, kala litshigu lile, va di si gu giri isoso; khu guralo, gu di manega gutsaka nya gukhongolo ngudzu.

¹⁸ Khu litshigu ni litshigu, Ezira, a di hevbula Libhuku nya Nayo wa Nungungulu, gukhugela litshigu nya guphele, kala litshigu nya guhegise, va gira buzo yoyo kala livbandre na mavili matshigu; khu litshigu nya livbandre na mararu, va di tshangana va dhumisa Pfhumu Nungungulu, kha nga idzo gu nga lowago khidzo.