Nehemiya 7 - Bhibhiliya Nya Guage

Guvhikela lidhoropa

¹ Na wu vbede thumo nya guvbahedze libhiyo ni gu vega malimba yakone, nyi vegide vaghadhi nya myanya, nyi hatha vaembeleli, ni va na Levhi.

² Nyi di vega ndriyangu Hanani, ni Hananiya, muthangeli nya likhokhola, gasi gu khala vakheviseli va Jerusalema; kholu Hananiya a diri mwama a tumbegidego guvbindra vathu vatshavbo, nari ni githawo ni Nungungulu;

³ nyi di va embela, kheni: Myanya ya Jerusalema yi nga tudwi kala lidambo li khusega vbatshani, vakheviseli na va ngari avbovbo, gu na segwe malimba ma bwelo khavbo ma kwinyarwi; vavbanyi va Jerusalema va na vegwe kha nga vawoneleli, muthu ni muthu khu ndrangani gwaye ni wulanga waye.

Gilovela nya avo va nga wuyago

⁴ Kha nga ndranga yi nga bani yiri yikhongolo ngudzu khu gulapha ni gu anama, ni vathu va nga bani vari umomo, va di bani vari vadugwana, ni dzinyumba dzi nga bani dzi si guvbahedzwi;

⁵ khu guralo, Nungungulu wangu a di nyi tulela liphuvbo nya gu nyi tombanisa yatshavbo manganagana, ni dzindruna, ni vathu vatshavbo, gasi va ta lovedwa khu sibongo sawe. Nyi di mana libhuku nya sasamedzo nya ava va phedego khavo gu wuya, li nga bani li lovidwe, kharati:

⁶ Ava khu va na Israyeli va modwego khu mufumeli Nabhukodhonosori wa Bhabhiloni; a va vbagela a va yisa wugumbini, va widego khu gipandrengulu nya litigo va nga bani vari umo, muthu ni muthu a di wuyela dhoropani gwaye, Jerusalema ni Judheya.

⁷ Avo va nga wuya ni Zorobhabheli, khu Jesuwa, Nehemiya, Azariya, Rahamiya, Nahamani, Moridhekayi, Bhilisani, Misipereti, Bhigivhayi, Newumi ni Bhahana. Tengo nya vama va na Israyeli khowu:

⁸ Va na Parosi, magumavili na limwedo mazana ni livbandre na mavili magumi na vavili (2172).

⁹ Va na Sefatiya, mazana mararu ni livbandre na mavili magumi na vavili (372).

¹⁰ Va na Ara, livbandre na limwedo mazana ni livbandre magumi na vavili (652).

¹¹ Va na Pahati-Mowabhi, sanana sa Jesuwa ni sa Jowabhi, magumavili na livbandre na mararu mazana ni likhumi na livbandre na vararu (2818).

¹² Va na Elamo, likhumi na mavili mazana ni livbandre magumi na vana (1254).

¹³ Va na Zatu, livbandre na mararu mazana ni magumana na livbandre (845).

¹⁴ Va na Zakayi, livbandre na mavili mazana ni livbandre na limwedo magumi (760).

¹⁵ Va na Bhinuwi, livbandre na limwedo mazana ni magumana na livbandre na vararu (648).

¹⁶ Va na Bhebhayi, livbandre na limwedo mazana ni magumavili na livbandre na vavili (628).

¹⁷ Va na Azigadhi, magumavili na mararu mazana ni magumavili na vavili (2322).

¹⁸ Va na Adhonikamo, livbandre na limwedo mazana ni livbandre na limwedo magumi na livbandre na vavili (667).

¹⁹ Va na Bhigivhayi, magumavili mazana ni livbandre na limwedo magumi na livbandre na vavili (2067).

²⁰ Va na Adhina, livbandre na limwedo mazana ni livbandre magumi na vavili (655),

²¹ Va na Ateri, nya lihundzu la Ezekhiya, livbandre na mana magumi na livbandre na vararu (98).

²² Va na Hasumi, mazana mararu ni magumavili na livbandre na vararu (328).

²³ Va na Bhesayi, mazana mararu ni magumavili na vana (324).

²⁴ Va na Harifi, lizana ni likhumi na vavili (112).

²⁵ Va na Gibheyoni, livbandre na mana magumi na livbandre (95).

²⁶ Vama va Bhetlehema ni va na Netofa, lizana ni livbandre na mararu magumi ni livbandre na vararu (188).

²⁷ Vama va Anatoti, lizana ni magumavili na livbandre na vararu (128).

²⁸ Vama va Bheti-Azamavhethi, magumana na vavili (42).

²⁹ Vama va Kiriyati-Jeyarimi, Kefira ni Bheyeroti, livbandre na mavili mazana ni magumana na vararu (743).

³⁰ Vama va Rama ni Gebha, livbandre na limwedo mazana ni magumavili na moyo (621).

³¹ Vama va Makimasi, lizana ni magumavili na vavili (122).

³² Vama va Bheteti ni Ayi, lizana ni magumavili na vararu (123).

³³ Vama va mumbe Nebhu, livbandre magumi na vavili (52).

³⁴ Va na mumbe Elamo, likhumi na mavili mazana ni livbandre magumi na vana (1254).

³⁵ Va na Harimi, mazana mararu ni magumavili (320).

³⁶ Va na Jeriko, mazana mararu ni magumana na livbandre (345).

³⁷ Va na Lodhi, Hadhidhi ni Ono, livbandre na mavili mazana ni magumavili na moyo (721).

³⁸ Va na Senaha, magumararu na livbandre na mana mazana ni magumararu (3930).

³⁹ Vaphasi nya mhamba: Sanana sa Jedhaya, sa nyumbani ga Jesuwa, livbandre na mana mazana ni livbandre na mavili magumi na vararu (973).

⁴⁰ Va na Imeri, likhumi mazana ni livbandre magumi na vavili (1052).

⁴¹ Va na Pasuri, likhumi na mavili mazana ni magumana na livbandre na vavili (1247).

⁴² Va na Harimi, likhumi mazana ni likhumi na livbandre na vavili (1017).

⁴³ Va na Levhi: Sanana sa Jesuwa, sa Kadimiyeli, nya va na Hodheva, livbandre na mavili magumi na vana (74).

⁴⁴ Vaembeleli: Sanana sa Asafe, lizana ni magumana na livbandre na vararu (148).

⁴⁵ Vaemeledzeli nya dzinyangwa, sanana sa Salumi, sanana sa Ateri, ni sanana sa Talimoni, sanana sa Hakubi, sanana sa Hatita sanana sa Subayi, lizana ni magumararu na livbandre na siraru (138).

⁴⁶ Vasayisi va Nyumbani ga Nungungulu: Sanana sa Ziya, sanana sa Hasufa ni sanana sa Tabhayote,

⁴⁷ sanana sa Kherosi, sanana sa Siya ni sanana sa Padhoni,

⁴⁸ sanana sa Lebana, sanana sa Hagaba, sanana sa Salimayi,

⁴⁹ Sanana sa Hanani, sanana sa Gidheli, sanana sa Gahari,

⁵⁰ sanana sa Reyaya, sanana sa Rezimi, sanana sa Nekodha,

⁵¹ sanana sa Gazini, sanana sa Uza, sanana sa Paseya,

⁵² sanana sa Bhesayi, sanana sa Mewunimi, sanana Nafusimi,

⁵³ sanana sa Bhakibuki, sanana sa Hakufa, sanana sa Haruri,

⁵⁴ sanana sa Bhazileti, sanana sa Meyidha, sanana sa Harisa,

⁵⁵ sanana sa Bharikosi, sanana sa Sisera, sanana sa Tama,

⁵⁶ sanana sa Nesiya, sanana sa Hatifa,

⁵⁷ sanana sa sithumi sa Solomoni, sanana sa Sotofayi, sanana sa Sofireti, sanana sa Perida,

⁵⁸ sanana sa Jahala, sanana sa Dharikomi, sanana sa Ghidheli,

⁵⁹ sanana sa Sefatiya, sanana sa Hatili, sanana sa Pokereti-Hebhayimi ni sanana sa Amoni.

⁶⁰ Vatshavbo va Nyumbani ga Nungungulu, ni sanana sa sithumi sa Solomoni, vatshavbo va diri mazana mararu ni livbandre na mana magumi na vavili (392).

⁶¹ Ava khavo va ngatago khu Teli-Mela, Teli-Harisa, Kerube, Adhomi ni Imeri, aholu kha va kodza guthokozela lihundzu la vababe vawe ambari ni lifumbu lawe, gukhawe mwendro vagulumba va na Israyeli.

⁶² Sanana sa Dhelaya, sanana sa Tobhiya, sanana sa Nekodha, si diri livbandre na limwedo mazana ni magumana na vavili (642).

⁶³ Vaphasi nya mhamba: Sanana sa Habhaya, sanana sa Kosi, ni sanana sa Bharizilayi, oyu a nga dzegago nyamahegyane wa Bharizilayi nya Mugiliyadhi a bwelo khavbo a ranwa khu lina laye.

⁶⁴ Vathu vava va di vbweta sasamedzo nya malina yawe umo nya longoloko nya sibongo sawe, aholu kha va wu mana, khu guralo, va di alakanyedwa gupwani kha va aga, va di duswa umo nya wuphasi nya mhamba.

⁶⁵ Muthangeli nya litigo a di va embela khuye va si hodzi silo si agidego, kala guta muphasi nya mhamba oyu a gu ni solo nya Urimi ni Tumimi.

⁶⁶ Gidzemo gyatshavbo gi widego khu wugumbitunu, gi diri magumana na mavili magumi mazana ni mazana mararu ni livbandre na limwedo magumi (42.360),

⁶⁷ nyamba pata ni dzikhumbi nya vama ni vanyamayi, wu nga bani wuri tengo nya livbandre na mavili magumi mazana ni mazana mararu ni magumararu na livbandre na dzimbili (7337); ni mazana mavili ni magumavili na livbandre (245) vaembeleli nya vama ni vanyamayi.

⁶⁸ Va diri ni livbandre na mavili mazana ni magumararu na livbandre na mweyo (736) dzikavalu, ni mazana mavili ni magumana na livbandre (245) dzimula;

⁶⁹ ni mazana mana ni magumararu na livbandre (435) dzingameriya, ni livbandre na limwedo magumi ni livbandre na mavili mazana ni magumavili (6.720) dziburu.

Mihengo nya gugirele Nyumba ya Nungungulu

⁷⁰ Vambe va nga bani vari vathangeli nya dzinyumba va dzi ningede khu mihengo nya guphasedzele guvbaha khu esi: Mwamangulu a di ningela, likhumi mazana (1.000) dzidrakima nya ndralama, livbandre magumi (50) dzimbiya, livbandre mazana ni magumararu (530) dzingandzu dza vaphasi nya mhamba.

⁷¹ Vambe gambe vathangeli nya dzinyumba, va di ningela umo nya kwama nya wuvbahi, va phasedzela khu magumavili magumi mazana dzidrakima nya ndralama, ni magumavili na mavili mazana (2.200) nya mipimo nya parata.

⁷² Vambe vathu va di ningela magumavili magumi mazana (20.000) dzidrakima nya ndralama, ni magumavili mazana (2.000) mipimo nya parata ni livbandre na limwedo magumi na livbandre na dzimbili (67) dzingandzu dza vaphasi nya mhamba.

⁷³ Vaphasi nya mhamba, va na Levhi, ni vawoneleli nya dzinyangwa, ni sithumi sa Nyumbani ga Nungungulu, ni vambe va na Israyeli, vatshavbo va di khala dzindrangani gwawe.