Nehemiya 3 - Bhibhiliya Nya Guage

Guvbahedzwa nya makhokhola ya Jerusalema

¹ Khu guralo, Eliyasibhi, muphasi nya khongolo nya mhamba, gumogo ni vandriyaye, vaphasi nya mhamba, va di vbahedza Mwanya nya Dzinvuta; va bwelo khavbo va wu agisa, va vega malimba yaye, va simama gu vbahedza Langwe nya Lizana ni Likhokhola la Hananeli.

² Vbafuvbi ni Eliyasibhi, gu di vbahide vama nya gudugele Jeriko, khu bambe gakone Sakuri, mwamana wa Iniri.

³ Va na Hasenaha va di vbahedza Mwanya wu ranwago gupwani Mwanya nya Dzindzandzi, va emisa madingo ni guthela malimba ni sikhotho saye gumogo ni sikwinyaro.

⁴ Khu bambe gwawe, Meremoti, mwamana wa Uriya, tugulu wa Kozi, vbafuvbi naye, a di vbahedza nuye Mesulami, mwamana wa Bherekiya, mwamana wa Mesezabheli; a landrela Sadhoki, mwamana wa Bhahana.

⁵ Va landrela navo guvbahedza va na Tekowa; aholu dzindruna dzawe dzi di si dzumeli gu thuma thumo wa mune wawe.

⁶ Joyadha, mwamana wa Paseya, ni Mesulamo, mwamana wa Bhesodhiya; va di vbahedza Mwanya wa Gale, va emisa madingo, va thela malimba ni sikhotho saye gumogo ni sikwinyaro.

⁷ Khu wubambe gwawe, va di vbahedza Melatiya, Mugibhiyoni, ni Jadhomi wa Meronoti, vama va Gibheyoni, ni va Misipa, va nga bani va fumwa khu mwamangulu wa tshatugo nya tsongo wa Ewufrate.

⁸ Gumogo naye thumide nuye Uziyeli, mwamana wa Haraya a nga bani nari mupfhuli nya ndralama, a handzamedza Hananiya, a nga bani nari mugiri nya mafura nya gutole. Va di vbahedza Jerusalema kala libhiyoni nya Guaname.

⁹ A handzamedza gu vbahedza nuye Rafaya, mwamana wa Huri, muthangeli nya gipandre gya Jerusalema.

¹⁰ Gu landrela nuye Jedhaya, mwamana wa Harumafi, a vbahedza gipandre gi khedzanago ni nyumba yaye. A landrela nuye khu hwane Hatusi, mwamana wa Hasabhineya.

¹¹ Gimbe gipandre gi di vbahedzwa khu Malikiya, mwamana wa Harimi, ni Hasubhi, mwamana wa Pahati-Mowabhi va vbaha gipandre gi ranwago gupwani likhokhola nya guvawulele.

¹² Khu gu landrela Salumi ni sanana saye nya sagadzyana, mwamana wa Halowesi muthangeli nya gimbe gipandre gya Jerusalema, a di vbahedza nuye.

¹³ Hanuni gumogo ni vavbahi va Zanowa wa kovatunu va di thela malimba gumogo ni sikhotho saye ni sikwinyaro. Va bwelo khavbo va vbaha libhiyo nya pfhuka nya likhumi mazana (1.000) mikono kala mwanya wu ranwago pwani khwa Giturumu.

¹⁴ Malakiya, mwamana wa Rekabi mwamangulu wa tigoni ga Bheti-Hakereyimi a di vbaha Mwanya wu ranwago pwani Mwanya nya Giturumu, a wu wusa a thela malimba yaye gumogo ni sikhotho saye ni sikwinyaro.

¹⁵ Salumi, mwamana wa Kol-Hozi, mufumeli nya gitigwana gya Misipa, a di vbahedza Mwanya wu ranwago pwani, Mwanya nya Nambo, a wu vbedza bwelo khavbo a wu pfhulela, a thela malimba gumogo ni sikhotho saye ni sikwinyaro; a di vbahedza gambe ni ndzari gukhugela lidhamotunu la sela, vbafuvbi ni lithembwe nya senge la mufumeli, kala sigandrotunu si relelago Dhoropani ga Dhavhidhe.

¹⁶ Nehemiya, mwamana wa Azibhuki, muthangeli nya gipandre nya litigo la Bheti-Zuri, a di vbahedza gukhugela vbafuvbi ni lithowo la Dhavhidhe, kala vbalidhamotunu li kembidwego gu relela nyumbani nya dzindrena.

¹⁷ Khu hwane gwaye va landrela gu vbahedza navo va na Levhi, Rewumi, mwamana wa Bhani, a handzamedza Hasabhiya, muthangeli nya gitigwana gya Keyila.

¹⁸ Khu hwane, va di landrela gu vbahedza navo vandriyaye Bhavhayi, mwamana wa Henadhadhi, muthangeli nya gimbe gipandre nya gitigwana gya Keyila.

¹⁹ A landrela nuye guvbahedza, Ezeri mwamana wa Jesuwa, muthangeli wa tigoni ga Misipa, a vbahedza gimbe gipandre nya likhokhola li nga khedzanago ni nyumba nya matshari mahandzakanyani nya likhokhola.

²⁰ Khu hwane gwawe a landrela Bharuki, mwamana wa Zabhayi, uye a nga dzi ningela khu tshivba yaye yatshavbo, a vbahedza gipandre nya gukhugele vbamahandzakanyatunu nya libhiyo, kala vbanyumbatunu ya muphasi nya khongolo nya mhamba Eliyasibhi.

²¹ Khu hwane gwaye, a di landrela Merimoti, mwamana wa Uriya, mwamana wa Hakosi, a vbahedza gipandre nya gukhugele vbamwanyatunu nya nyumba ya Eliyasibhi, kala mahegiso nya nyumba ya Eliyasibhi.

²² Khu hwane gwaye, gu di thuma navo vaphasi nya mhamba va nga bani na va vbahide mapanini.

²³ Khu hwane, va di vbahedza Bhejami ni Hasubhi, va vbahedza gipandre gi nga bani gi khedzanide ni nyumba yawe; va landredwa khu Azariya mwamana wa Mahaseya, mwamana wa Ananiya, a vbahedza nuye gipandre gi khedzanidego ni nyumba yaye.

²⁴ A landrela nuye Bhinuwi, mwamana wa Henadhadhi, a vbahedza nuye gipandre gi khugelago ndrangani ga Azariya, a tsemakanya kala khonatunu.

²⁵ Palali, mwamana wa Uzayi, a di vbahedza gukhugela vbakhonatunu, ni vbalangwetunu yi khugelago vbanyumbatunu nya wufumu, yi guromo vbafuvbi ni mwanya nya lipaso; khu hwane gwaye, a thuma Pedhaya, mwamana wa Parosi.

²⁶ Sithumi sa Nyumbani ga Nungungulu, si nga bani si vbahide Ofeli, si di vbahedza wulanga wu khedzanago ni Mwanya nya Mati, khu Khugadambo kala vbalangwetunu nya gulaphe.

²⁷ Khu hwane, va na Tekowa va di vbahedza gimbe gipandre gi khedzanago ni langwe nya gulaphe, kala Vbalibhiyotunu la Ofeli.

²⁸ Khu vbatshani nya Mwanya nya Dzikavalu, gu di vbahedzwa khu vaphasi nya mhamba, moyo ni moyo a vbaha gipandre gi thonanago nyumba yaye.

²⁹ Khu hwane gwawe, a di vbahedza Sadhoki, mwamana wa Imeri, a vbaha gipandre gi khedzanago ni nyumba yaye; a landredwa khu Semaya, mwamana wa Sekaniya, mukheviseli nya Mwanya wa Khugadambo.

³⁰ Khu hwane a landrela Hananiya, mwamana wa Selemiya, ni Hanumi, gyanana nya livbandre na gimwegyo gya Zalafi, a vbahedza nuye gimbe gipandre, Mesulamo, mwamana wa Bherekiya, a di vbahedza gipandre gi khedzanago ni nyumba yaye.

³¹ Khu hwane gwaye, Malakiya, mwamana wa mupfhuli nya ndralama, a di vbaha kala dzindrangani ga sithumi sa Nyumbani ga Nungungulu, ni dza va nya wugwewo, gu khedzana ni Mwanya wa Mifikadi, kala nyumba ya tshokatunu.

³² Gipandre nya gukhugele nyumba ya khonatunu kala Mwanya nya Dzinvuta, gi di vbahedzwa khu vapfhuli nya ndralama ni va nya wugwewo.