Nehemiya 12 - Bhibhiliya Nya Guage

Sasamedzo nya vaphasi nya mhamba va ngata Jerusalema

¹ Khavo ava vaphasi nya mhamba ni va na Levhi va widego ni Zorobhabheli, mwamana wa Salatiyeli ni Jesuwa; Seraya, Jeremiya ni Ezira,

² Amariya, Maluki, Hatusi,

³ Sekaniya, Rehumi, Meremoti,

⁴ Idho, Genetoyi, Abhiya,

⁵ Miyamimi, Mahadiya, Bhiliga,

⁶ Semaya, Joyaribi, Jedhaya,

⁷ Salu, Amoki, Hilikiya ni Jedhaya; ava khavo va nga bani vari vathangeli nya vaphasi nya mhamba gumogo ni gu thangela vandriyawe matshiguni ya Jesuwa.

⁸ Va na Levhi va nga bani va gu thangela mithumo nya guembelele dzindzimo nya gubonge khava: Jesuwa, Bhinuwi, Kadimiyeli, Serebhiya, Judha ni Mataniya gumogo ni vandriyawe.

⁹ Bhakibukiya ni Uni, ni vandriyawe va di khedzanide navo muthu ni muthu ni wulanga waye.

¹⁰ Jesuwa a di velega Joyakimi, Joyakimi, a velega Eliyasibhi, Eliyasibhi, a velega Joyadha,

¹¹ Joyadha, a velega Jonatane ni Jonatane, a di velega Jadhuwa.

¹² Matshiguni ya Joyakimi, vaphasi nya mhamba va nga bani vari vathangeli nya dzinyumba, va diri ava: Nyumba ya Seraya, Meraya; nyumba ya Jeremiya, Hananiya;

¹³ nyumba ya Ezira, Mesulami; nyumba ya Amariya, Jowanani;

¹⁴ nyumba Maluki Jonatane; ya Sebhaniya, Josefe;

¹⁵ nyumba ya Horimi, Hadhina; ya Merayote, Helikayi;

¹⁶ nyumba ya Idho, Zakariya; ya Ginetomi, Mesulami;

¹⁷ nyumba ya Abhiya, Zikiri; ya Mini, Yamini ni ya Mohadhiya, Pilitayi;

¹⁸ nyumba ya Bhiliga, Samuwa; ya Semaya, Jonatane;

¹⁹ nyumba ya Joyaribi, Matenayi; ya Jodhaya; Uzi;

²⁰ nyumba ya Salayi, Kalayi; ya Amoki, Hebheri;

²¹ nyumba ya Hilikiya, Hasabhiya; ya Jedhaya, Natanayel.

²² Matshiguni ya Eliyasibhi gu di lowa malina ya avo va nga bani vari vathangeli nya dzinyumba, a gu ava: Joyadha, Jowanani ni Jadhuwa, gumogo gambe ni vaphasi nya mhamba, kala matshiguni a nga fumago Dhariyo nya Muperesi.

²³ Va na Levhi va di lovedwe kha nga vathangeli nya dzinyumba umo nya Libhuku nya Matimo, kala matshiguni ya Jowanani, mwamana wa Eliyasibhi.

²⁴ Thumoni nya gudhumise Nungungulu ni gubonga, va na Levhi va di kabanisedwe khu mitsawa, na va gu thangedwa khu Hasabhiya ni Serebhiya, ni Jesuwa, mwamana wa Kadimiyeli ni vandriyaye, mitsawa ya mivili yi di pingulelana, tsawa ni tsawa ni lito laye, kha nga guruma nya sileletelo sa Dhavhidhe, muthu wa Nungungulu.

²⁵ Vaembeleli va nga bani va guwonelela mwanya nya guvegedzele gyuma, a diri: Mataniya, Bhakibukiya, Obhadhiya, Mesulami, Talimoni ni Akubi.

²⁶ Vathu vava va vbanyide matshiguni ya Joyakimi, mwamana wa Jesuwa, wa Jozadhaki, ni matshiguni ya mwamangulu Nehemiya ni Ezira muphasi nya mhamba eno mulovi.

Guphasela libhiyo la Jerusalema

²⁷ Gikhatini nya gukhangudwe libhiyo la Jerusalema, gu di ranwa khu malangani nya guhambanelane, va na Levhi vatshavbo gasi vata khangula libhiyo khu gutsaka, na va gu embelela khu dzindzimo, ni gudhumisa khu dzingoma, sitendre, dzimbila ni mitandrandra.

²⁸ Sanana sa vaembeleli si di ta tshangana tendrelani nya lidhoropa la Jerusalema ni umo nya sidhoropana sa vasayisi va Nyumbani ga Nungungulu,

²⁹ gumogo ni Bheti-Giligali ni malangani ya Gebha ni Azimavheti. Vaembeleli va di dzi vbahede mitalala wubambe nya lidhoropa la Jerusalema.

³⁰ Vaphasi nya mhamba gumogo ni va na Levhi, va di phela khavo gu dzi agisa, va agisa navo vathu vatshavbo, gumogo ni myanya nya libhiyo.

³¹ Nyi di litisa vbatshani nya ndzari nya libhiyo, vathangeli va na Judha nyi wumba mitsawa mivili nya yikhongolo nya vaembeleli yi landrelana, moyo khu phuvbo ga nyamudye wu thonona Mwanya nya Litala.

³² Khu hwane gwawe, a di landrela Hosaya ni gimbe gipandre nya vathangeli va na Judha;

³³ Azariya, Ezira, Mesulami,

³⁴ Judha, Bhejami, Semaya ni Jeremiya;

³⁵ ni vambe nya sanana sa vaphasi nya mhamba na vari ni mipundru, a gu ava: Zakariya, mwamana wa Jonatane, mwamana wa Semaya, mwamana wa Mataniya, mwamana Mikeya, mwamana wa Sakuri, mwamamana wa Asafe,

³⁶ ni vandriyaye, Semaya, Azareli, Milalayi, Gilalayi, Mahayi, Netaneli, Judha ni Hanani na vari ni siwombawomba nya wutsendze sa Dhavhidhe, muthu wa Nungungulu; mulovi Ezira, a di thanga mbeli gwawe.

³⁷ Avbo va nga vbohago nyangwani gu ranwago gupwani Nyangwa nya Nambo, va di lita khu sigandro nya Didhoropa la Dhavhidhe, va thonona guya vbatshani nya ndzari nya libhiyo, vbatshani nya nyumba ya Dhavhidhe, kala vbanyangwatunu nya Mati, khu phuvbo ga Khugadambo.

³⁸ Tsawa nya wuvili nya vaembeleli wu di thangide mbeli, eni nyi landrela khu hwane gwaye; gimbe gipandre nya vathu va diri khu vbatshani nya ndzari nya libhiyo, gukhugela likhokholatunu nya nilo na hi thonona ndzari nya guaname;

³⁹ gukhugela nyangwani ga Efrayimi, hi vbindra khu vbatshani nya Lidimba la Gale ni Lidimba nya Ndzandzi, ni likhokhola la Hananeli, ni likhokhola nya Lizana, kala mwanyatunu nya tshambi; vaya ema Mwanyani nya Lipaso.

⁴⁰ Mitsawa yatshavbo nya vaembeleli yi di ya ema Nyumbani gwa Nungungulu, eni neni nyi di ya ema vbale ni gimbe gipandre nya vathangeli.

⁴¹ Vaphasi vava nya mhamba: Eliyakimi, Mahaseya, Miniyamini, Mikeya, Eliyowenayi, Zakariya ni Hananiya va di pharide mipundru,

⁴² Maseya, Semaya, Eliyazari, Uzi, Jowanani, Malikiya, Elamo ni Ezeri, avo navo va di pharide mipundru; vaembeleli va di embelela na va gu thangedwa khu Jeziraya.

⁴³ Litshigu lolo, gu ningedwe miphaselo nya dzimhamba nya dzikhongolo gu bwelo khavbo gu nengedwa; kholu Nungungulu a di va ningide litsako nya likhongolo. Vanyamayi ni sanana, avo navo va di gu tsakide ngudzu. Huwa nya litsako lolo yi di pwala Jerusalema gwatshavbo, kala hwindzo.

Guwusedzwa nya phaso

⁴⁴ Khu litshigu lolo, va hathidwe vama nya guthumele musisangalani nya guvegedzele mihengo, nya miningelo, dzimbewu nya guhegule ni iso nya gipandre nya likhumi, gasi va si vegedzela umo, mayelano ni marembwe nya vathu ni sipandre si vegisidwego khu nayo, gasi si lumba vaphasi nya mhamba ni va na Levhi; iso si nga gira vathu va Judha va tsaka, kholu vaphasi nya mhamba ni va na Levhi va di guthumela mule.

⁴⁵ Va thumela Pfhumu Nungungulu ni gu agisa vathu: Vaembeleli ni vakheviseli nya myanya, va di thuma navo kha nga guleletela ga Dhavhidhe ni mwanaye Solomoni.

⁴⁶ Kholu gukhugela matshiguni ya Dhavhidhe ni Asafe, khu gale gu diri ni vathangeli nya dzindzimo nya gurungudze ni gubonga Nungungulu.

⁴⁷ Matshiguni ya Zorobhabheli ni Nehemiya, vatshavbo va diri ni fanelo nya gugire mihengo nya guphasedzele vaembeleli ni vakheviseli nya myanya khu litshigu ni litshigu; va si agisela va na Levhi, avo navo va si agisela va na Aroni.