Nehemiya 1 - Bhibhiliya Nya Guage

Nehemiya a ngu lombelela khu Jerusalema

¹ Aya khu magana ya Nehemiya mwamana wa Hakaliya. Si giregidego khu ngima nya Kisilewu, khu mwaga nya magumavili, eni na nyiri likhokholani ga Suza.

² A ngatago Hanani, moyo nya vandriyangu ni vambe vama va na Judha, nyita va wudzisa khu mahungu nya Vajudha va nga vbulugago, va ngamba yiswa wugumbitunu, gumogo ni mahungu ya Jerusalema.

³ Avo va di nyi embela, khavo: Vambe vakone va nga vbulugago gu yiswa wugumbitunu, vomo iyoyo ga gipandrengulu gile, va gu vbanya muwusiwanani ni wumbwa nya wukhongolo ngudzu, gumogo ni gu hembuludwa, mabhiyo ya Jerusalema ma khungumudwe ni malimba yaye ma vbisidwe khu nilo.

⁴ Na nyi pwide magana yaya, nyi di khala vbavbatshi nyi lila nyi vbedza matshigu nya gutale na nyi guhala nyi si hodzi gilo, na nyi gu lombelela ga Nungungulu wa ndzadzini.

⁵ Nyi ganela, kheni: Nyi ngu lomba ga uwe Pfhumu Nungungulu wa ndzadzini, uwe u gu khongolo u thavisegago, uwe u sayisago pwanano ni gu girela wuhindzi vale va gu golago ni gu vegedza milayo yago!

⁶ Demba ndzeve yago, u tula maho yago, u yingisa nombelo wa eni githumi gyago nyi lombago avbo gwago wutshigu ni mihani nyi lombelela sithumi sago va na Israyeli; ni gu dzi laya khu sighoho sa va na Israyeli, hi gu ghohedego; eni neni ni ndranga ya vababe vangu, hi gu ghohede.

⁷ Hi gu hosede ngudzu khu gumba landrisa sileletelo, milayo ni sirumo u nga leletelago githumi gyago Mosi.

⁸ Dundruga magana u leletedego githumi gyago Mosi u nga khuwe: Mwa gumba ma landrisa, nyi na mi phalalegisa mu legalega ni mayigo.

⁹ Aholu mwa gu vbindrugedza mu khodwa gwangu mu landrisa milayo yangu ni gu yi sayisa, ambari nya bani nyi mi phalalegiside kala mi vboha mahegiso nya litigo, khiyoyo nyi na mi wuyisani nyita mi tombanisa danga mwedo avbo nyi gu hathidego gu khala avbo Lina langu.

¹⁰ Esi khu sithumi sago, ni vathu vago, ava u va tshudzisidego khu tshivba yago nya yikhongolo, ni mandza yago nya tshivba.

¹¹ Olu Pfhumu! Nyi ngu gu lomba, u demba ndzeve, u yingisa nombelo wa eni githumi gyago, gumogo ni milombelo yatshavbo ya sithumi sago si golago gu rungudza Lina lago; nyi ngu gu lomba gukheni u kategisa eni githumi gyago, nyi kodze gu mana wuhigo muhuno mbeli ga mwama yoyu. “Kholu khu gikhati gyogyo eni nyi diri mu emeledzi nya meza ya mufumeli.”