Nahume 2 - Bhibhiliya Nya Guage

Gurandredwa ni guwandrwa gwa Ninivha

¹ Olu mupfhungumuli womo mbeli gwago uwe Ninivha! Sayisa likhokhola lago! U wonelela ndzila! Hunga giwunu gyago u tiyisa ngudzu tshivba yago.

² Kholu Pfhumu Nungungulu a na resa nyaluphye wugulu wa Jakobe ni wudhumo wa Israyeli. Kholu vaphangi va phangide ni gu ghohetela marembwe nya miuvha yago.

³ Sitshangu nya dzindrena dzawe khya gufuvila, ni dzingandzu nya dzingwazi dzawe khya siwunguwungu, dzikareta dzawe dza gu khondra nga nilo nya myenge avbo dzi folago guya litungatunu; va kutsunga sighalala.

⁴ Dzikareta nya nyimbi dzi na dzundrulugela mitendrelani; dzi na ghumulana dzindzilani, makhalelo yawe ma gu fanana ni myenge nya nilo, dzi na tutuma kha nga gulasa.

⁵ Uye a na alakanya dzithomba dzaye; aholu va na tshunganela gu gimbilani gwawe, va na tutumela libhiyotunu nya lidhoropa, gikhati gu na dongisedwago wulanga nya gu dzi vhikele.

⁶ Malimba nya tsongo ma na tulega, ni dzinyumba nya wufumu, dzi na nyiviliga.

⁷ Gu tivisidwe gupwani: Lidhoropa li funungudwe; li vbagedwa li yiswa wugumbitunu, sithumi saye nya vanyamayi si na mu bangaladza na si gu dilela kha nga sipomba, va veta dzikhana dzawe.

⁸ Gukhugela gale Ninivha a di gu fanana ni litsiva nya mati. Gasi olu va gututuma pwani: “Emani, emani!” Ambari va gu ranwa, gambe mwalo a na khedzago hwane.

⁹ Phangani parata, phangani ndralama! Kholu thomba yaye kha yi vbeli; yi tade khu sombo nya lisima.

¹⁰ Lidhoropa la Ninivha liphanga! Li mwalo gambe, li mbembisidwe, li khade marumbi; monyo wu rerekide, dzikhungumudzi dza gu khuyugela ni siwunu sawe satshavbo sa gu ndrendremela ni dzikhovbe dzawe dzatshavbo dzi thuvigide.

¹¹ Olu momo hayi mavbala nya dzinghala numo dzi nga bani dzi hodzisela umo sanana sawe, khu hayi yi nga bani yi haganela avbo nghala nya gugumbe ni ngadzi waye, nyambana ni moyo nya gu yi thusedzele?

¹² Nghala yi di gu sota iso si ninganago sanana saye, gambe yi di gu mola girengo gasi guya ninga vagadzi vaye, yi di gu tadza mavbala ni dziphago dzaye khu nyama.

¹³ Wona nya gukhuwe nyi gu wugede, a ngu ganela Pfhumu Nungungulu nya Tshivba Yatshavbo; nyi na vbisa khu nilo dzikareta dzago nya nyimbi, singhalana sago si na songetedwa khu matshari, nyi na wandra mafuni sirengo u nga molago, ma si pwali gambe malito nya sirumwa sago.