Muhevbudzi 8 - Bhibhiliya Nya Guage

Mapimo nya wu wuthu

¹ Khu mani a fananago ni muthu nya guti, a wutigo tshamuselo nya mahungu? Muthu nya guti, khovbeni gwaye gu ngangamela, gu vbindrugedza ni makhalelo yaye.

² Nyi ngu gu embela, kheni: Vegisa nayo wa mufumeli, kha nga idzo u sambanyidego khidzo mbeli ga Nungungulu.

³ U nga vbiredzeli gu khuga mbeli gwaye, u nga kanyisi u simama gu gira ogu gu vivbidego, kholu uye a ngu kodza gu gira iso a si golago.

⁴ Lito la mufumeli li na ni tshivba; khu mani a yelago gu mu kawuka, khuye: “Ginani u girago?”

⁵ Uye a landrisago milayo, gima kha na wona guvivba; muthu nya guti, a ngu giti gikhati ni magirelo.

⁶ Silo satshavbo si na ni nango ni magirelo yaye, aholu guvivba ga muthu gu ngu mu lemela.

⁷ Kholu uye kha giti ginani gi na mu dugelelago. Ni guti gukhuye khu mani a na gu mu tivisago edzi silo si na mu dugelelago khidzo.

⁸ Mwalo muthu a gu ni tshivba nya gufumele womi waye, mwendro a kodzago gu emisa litshigu nya gufe gwaye, mwalo a na gu vbulugago ga nyimbi yoyo, ni gighohi kha gi na vbuluga khu sighoho saye.

⁹ Satshavbo sesi nyi si wone gikhati nyi nga pimisa khu mithumo yatshavbo yi girwago mafuni momu, muthu nya tshivba a gu fumela mumbe muthu gasi gu mu tshanisa.

Silo si garadzago gu si pima

¹⁰ Nyi wonide gambe sighohi na si gu dzingwa gwadi si mana gu hefemula, aholu va nya gululama, vale va nga bani va bela ni gu duga wulangani nya guage, va divadwa dhoropani mule va giridego umo mithumo ya yadi. Isoso niso gu dzi pfhadza.

¹¹ Kholu gulamudwa ga va nya guvivba kha gu vbiredzi gu vboha, khu kharalo, myonyo ya vathu ya gu dogorela silo nyamba sadi.

¹² Gighohi gya gu ghoha lizana dzinyondro, ambari gya gu vbanya matshigu nya gutale mafuni, eni nyi ngu dziti khu lisine gukheni avo va thavago Nungungulu va na dugelela, kholu va ngu mu thumela.

¹³ Gasi gighohi gima kha gi na katega, ambari gu mana matshigu nya gulaphe; gi na mwalalega nga mwedzi, kholu kha gya thava Nungungulu.

¹⁴ Gyomo gambe gimbe gilo gi gumba phasa gilo tigoni momu, a gu egi: Vomo va lulamidego va manago tshatshazelo nya sighohi, ni sighohi si manago tshatshazelo wa va nya gululama. Nyi ngu ganela gukheni esi niso gu dzi pfhadza.

¹⁵ Khu guralo, eni nyi ngukheni, gutshambide vathu va gu mana gutsaka mafuni momu, kholu gi mwalo gimbe gilo gi gu gyadi ga muthu guvbindra gu hodza, u sela, u nengela. Isoso si fanede gu mu bangaladza thumoni gwaye matshiguni yaye a ningidwego guvbanya khu Nungungulu mafuni momu.

Mahegiso nya muthu

¹⁶ Nyi dzi garadzide khu tshivba yangu yatshavbo khu gu vbweta guti, ni gu pima ni gu khevisela satshavbo esi vathu va girago, mafuni momu; kholu vomo va si manigo ligovbe wutshigu ni mihani.

¹⁷ Khu guralo, nyi di wona thumo watshavbo wu giridwego khu Nungungulu mafuni momu gukheni vathu kha va kodzi gu wu pima ambari muthu a dzi garadzago khu gu wu vbwetedzela, kha dzi kodzi gu wu mana, ambari vale va gukhavo va gengede kha va wu mani.