Muhevbudzi 6 - Bhibhiliya Nya Guage

Makhalelo ma si ningigo gutsaka tigoni momu

¹ Nyi wonide gimbe gigaradzo gi lemelago ngudzu vathu mafuni momu:

² Muthu nya gukari, a ningidwego khu Nungungulu thomba nya gutale, bwelo khavbo a mu ninga guzundzega, a ningidwe satshavbo a nga bani a gu si dilela. Aholu Nungungulu kha gola gukhuye a si hodza ni gu si thumisa, si di ta hodzwa khu nombo, muthu wa mambe mayigo a vbedza satshavbo. Ogu nugo gu dzi pfhadza gu vbisago ngudzu.

³ Gwa gu phasa ginani muthu a gu velega lizana (100) sanana, a vbanya myaga nya gutale, matshigu yaye ma lapha ngudzu, aholu hefemulo waye wu si khuri khu gunengela, a gu hamuga ni muthu nya gu mu dzinge; eni nyi ngu tiya nyi ganela gukheni, gyanana gi velegidwego na gi fude gi kategide guvbindra muthu yoyo.

⁴ Kholu egi gi dzude mahala mafuni, gambe gi na bwelela gidemani, lina laye li na simama mugidemani;

⁵ ambari gi ngamba wona lidambo, gumogo ni gu liti, igyo gi ngu hefemula gurulani guvbindra uye.

⁶ Ina, ambari na vbanyide magumavili mazana (2.000) myaga, aholu na sapwa gutshamba khu thumo waye, uye gumogo ni gyanana, vatshavbo kha va hongoli dangamwedo, gani?

⁷ Thumo watshavbo nya muthu wa gu hodzwa khu likana laye, ambari khu isoso kha eneledwi.

⁸ Gasi muthu nya gugengele a gu pala gipumbu khu ginani? Khu levbini lisima nya gisiwana gi dzi kodzago gu vbanyisana ni vathu?

⁹ Nya sadi khu gu wona silo khu maho, guvbindra gu si dogorela khu monyo. Aholu esi niso gu dzi pfhadza, kha si phasi gilo, gututuma hwane nya phuvbo yi vbindrago.

¹⁰ Satshavbo si dugelelago si diri ni malina khu gale; hi ngu dziti gukhethu muthu ginani ni gukhethu muthu nya nyalidade kha dzi kodzi gu ganedzisana ni wule a gu na ni tshivba guvbindra uye.

¹¹ Avbo gu guromo guganedzisana, gomo gambe gu dzi pfhadza, gasi muthu a gu phasega khu ginani khu isoso?

¹² Gasi khu mani atigo iso si tsakisago muthu guvbanyani gwaye, matshiguni nya guvbanye gwaye nyamba phasa gilo, ayo ma vbindrago nga mwedzi? Mwendro khu mani a na gu embelago iso si na gu dugelela muthu hwane nya guvbanye gwaye mafuni momu.