Mithumo 6 - Bhibhiliya Nya Guage

Guhathwa nya livbandre na vavili vaphasedzeli va vapostoli

¹ Khu matshigu yale, tengo nya vathu va nga dzumela gu khodwa, wu di gu engedzelana litshigu ni litshigu. Gu di manega gisolo tsawani nya Vagreki va gu phela gu wugela tsawa nya Vahebheru. Kholu sifurugadzi nya tsawa nya Vagreki si di gu divadwa gikhatini nya gukabaniswe silo nya siphasedzelo.

² Khavbo avbo, vale nya likhumi na vavili, na va rambile libandla nya vapizane va di va embela, khavo: “Kha hi faneli ethu gu diga thumo nya gutshumayele mahungu ya Nungungulu hi phara thumo nya gukavedzele guhodza.

³ Khu kharato, vandruye, hathani vbakari gwanu livbandre na vavili vama nya ndruda nya gutale khu Liphuvbo ni guti, hi na va ninga avo thumo yoyo,

⁴ gasi ethu hi na simama ni nombelo ni thumo nya gutshumayele Mahungu ya Nungungulu.”

⁵ Mawonelo yoyo ma di tsakisa vathu vatshavbo. Va di hatha Sitefane, mwama nya gutale khu gukhodwa ni Liphuvbo nya Guage; Filipi, Prokoro, ni Nakonori, Timoni, Parmenasi ni Nikolawu, mukhodwa wa Antiyokiya.

⁶ Na va va reside ga Vapostoli, avo, na va giride nombelo, va di va handzega mandza.

⁷ Magana ya Nungungulu ma di phalalega. Tengo nya vapizane wu di gu engedzelana khu tshivba Jerusalema. Vathu nya vangi ngudzu nya tsawa nya vaphasi nya mhamba va di dzumela gukhodwa.

Gumodwa ni gulamudwa ga Sitefane

⁸ Sitefane, na tade khu gukhodwa ni tshivba ya Nungungulu a di gu gira siliwugiso ni siwonegiso vbakari nya vathu.

⁹ Va dita vathu nya gukari khu Nyumbani nya nombelo yi ranwago pwani khya va nya gutshulega, ni va nya guta khu Kirene, Alexandriya, ni Silisiya ni Aziya, va dita ganedzisana ni Sitefane.

¹⁰ Aholu, va di si dugeleli khu kotani nya guti gwaye ni Liphuvbo nya Guage li nga mu ninga tshivba nya guganele.

¹¹ Va di renga vathu nya gukari va gu va livba dzitsapawu, va va ruma gu mu singedza khavo va di mupwa na gu hembulula Mosi ni Nungungulu.

¹² Va di kutsedzela vathu, madhota ni vahevbudzi nya Nayo, va ta mu mola va mu yisa Phathani.

¹³ Va di mu singedza malipha, khavo: “Oyu mwama kha garali khu gu hembulula Nyumba ya Nungungulu ni Nayo.

¹⁴ Kholu hi mu pwide na gu ganela khuye Jesu wule wa Nazareta a na fuvisa wulanga wowu, a vbindrugedza tumbunugo hi nga tshiyedwago khu Mosi.”

¹⁵ Na va mu khedziside gwadi, vatshavbo va di wona khovbe yaye na yi gu ngangamela nga ngilozi ya Nungungulu.