Mithumo 28 - Bhibhiliya Nya Guage

Pawulo a ngu gira siliwugiso gidwane ga Malita

¹ Na hi vbulugide hatshavbo, hi di tiviswa gupwani gidwane gile gya gu ranwa pwani Malita. Vathu va gidwane va di hi hakha gwadi.

² Vathu va tigoni mule va di hi hakha khu mandza mavili, kha nga ulo yi nga bani yi guwa ndzadzi gu gira girame, va di vasa nilo, va hi rana hiya wora.

³ Pawulo a di dzega ginyandrana nya mahale a rinya niloni. Nyoga yi nga bani yi gu thava nilo, yi di mu dandramela mandzani.

⁴ Vamune tigo, na va wone nyoga na yi dandramede mandzani ga Pawulo, va di ganela, khavo: “Khu lisine mwama yoyu gighevenga, a dzi kodzide gu vbuluga matini, aholu Nungungulu kha dzini gu mu diga a vbanya.”

⁵ Pawulo a di mitedza nyoga yi thegela niloni, nyamba dugedwa khu mhango.

⁶ Avo va di khevisela gu mu wona a simba, mwendro gu thega vbavbatshi a dzegela gufa. Aholu va di garala khu gu khevisela nyamba wona esi va nga si pimisa va vbindrugedza maalakanyo, va phela gu ganela khavo moyo nya vanungungulu.

⁷ Vbafuvbi vbale ma diromo mahange ma nga bani ma gu lumba Pubhiliyo, mufumeli nya gidwa gile. A di hi hakha gwadi hi khala ndrangani gwaye matshigu mararu.

⁸ Babe wa Pabhiliyo a diri vbadawutunu, na gu dwala khu ndrani ni feveri. Pawulo a diya mu holela. Na giride nombelo, a di mu handzega mandza hungoni, a mu hawulugisa.

⁹ Khavbo avbo, vadwali vatshavbo va gidwane mule va dita gwaye va ta hawulugiswa.

¹⁰ Avo navo va di hi sayisa khu githawo ngudzu. Litshigu hi nga khuga gambe khu ngalava, va di hi dongisela liendro lathu khu satshavbo esi si vbwetegago.

Pawulo a ngu khuga Malita a hongola Roma

¹¹ Hwane nya migima miraru hi khadego gidwane gya Malita, hi di bela ngalavani nya gute khu Alexandriya yi ngata khala gidwane yi virela guvbindra nango nya girame. Thonvutunu, yi diri ni sifananiso nya vanungungulu nya mavbaha: Kasitori ni Polusi.

¹² Na hi vbohide siwoni ga Sirakuza, hi di duga hi vbedza matshigu mararu,

¹³ khavbo avbo, hi di khilela hi landrisela bambe nya litigo, kala hi gu vboha Rejiyo. Khu mindru gakone, gu di furugedza siga, wu nga hi vbohisa siwoni ga Puteyoli khu matshigu mavili.

¹⁴ Avba hi di mana Vakristo nya gukari, va nga hi lomba ngudzu khavo hi khale navo semana rumba, na hi khugide khavbo, hi di vboha Roma.

¹⁵ Vakhodwa va Roma, na va dzitide gukhavo hi ngu hongola iyo, va di hi khinga tandralani wa Apiyo ni eyi gu ranwago pwani “Dzinyumba Dzitharu.” Na va wone Pawulo, va di rungudza Nungungulu, va tiya longo.

Pawulo a ngu hevbudza Roma

¹⁶ Na hi vbohide Roma, Pawulo a di dzumedziswa guvbweta nyumba yaye a khala, a ningwa lisotshwa limwedo li mu ghadha.

¹⁷ Hwane nya matshigu mararu, Pawulo a di rana Vajudha nya guthavisege va khalago Roma, gasi guta tshangana navo. Na va vbohide a di va embela, khuye: “Vandriyangu, eni gimwalo gilo nyi ghohidego ga libandla lathu, kha nyi wugeli tumbunugo nya mavbanyelo ya vababe vathu. Aholu Vajudha va di nyi mola Jerusalema, va nyi ningela mandzani ga Varoma.

¹⁸ Na nyi thethisidwe, va di vbweta gu nyi tshula, kholu kha va mana nandru nya guyele gu songwa.

¹⁹ Aholu Vajudha va di ganedza, nyi nga gu lomba guta lamudwa khu Sezari, ambari nyi gu mwalo ketso nya gugirele va na gyathu.

²⁰ Khiso esi nyi nga mi ranelani, gasi guta mi wona ni gu mi tivisani, kholu dzitshinga dzedzi nyi hungidwe khu kotani nya gitumbo hi gu nagyo ethu va na Israyeli.”

²¹ Avo va di mu hakha, khavo: “Ethu hi si hakhi lidangalila la Judheya nya guganele khu mahungu yago. Gambe mwalo na moyo wa Judheya a ngata a resa mahungu yoyo, mwendro guta hi embela guvivba khu mahungu yago.

²² Aholu ethu hi di gola gu gupwa na wu gu ganela khu likana lago esi u pimisago, kholu hi ngu dziti gukhethu, gikhodwagi gyanu nya gu pambuge, gi ngu ganedzwa ni gu wugedwa malangani gwatshavbo.”

²³ Khavbo avbo, va di vega litshigu. Na li vbohide litshigu lolo, nya vangi va di hongola ndrangani a nga bani a gu vbanyela avbo Pawulo. Gukhugela ni dzimindru kala ni wutshigu, Pawulo a di ganela gwawe khu mahungu nya Mufumo wa Nungungulu. A di zama gukhuye va khodwe ga Jesu, a seketela wufakazi waye avba nya Nayo wa Mosi, ni omu nya milowo ya vaprofeti.

²⁴ Vomo va nga dzumelago magana ya Pawulo, gasi vambe va di ma bomba.

²⁵ Khu gumba pwanana, va di duga va hongola. Va si gu dugi, Pawulo a di va embela, khuye: “Bayi, li ganede Liphuvbo nya Guage, li nga ganela khu likana la muprofeti Isaya,

²⁶ na gu thula vababe vanu, khuye: ‘Indra tivisa silo sesi ga vathu vovo, khuwe: Ambari na mu pwide nya gu wani, gima kha mu na si mana, Ambari na mu wonide nya gu wani, gima kha mu na wona gilo

²⁷ Kholu monyo nya vathu vava wu bangide nga giwindri Va tshikide dzindzeve ni gu sega maho, vafela gumba wona, gu mbapwa ni gumba pima gilo, va si kodzi guwuya eno gwangu gasi nyi va vbanyisa.’ ”

²⁸ “Khalani na mu gu dziti nya gukhenu Mahungu yaya nya guvbanyise hi ningwago khu Nungungulu ma tivisidwe ga va nya mayigo, gambe avo va na ma hakha.”

²⁹ [Na ganede magana yaya, Vajudha va di duga va hongola na va gu ganedzisana khu gyawe.]

³⁰ Pawulo giride myaga mivili na gu khala nyumbani mule a nga bani a gu livbela, khavbo a nga bani a gu hakhela avbo vatshavbo ava va nga bani va gu hongola vaya mu wona.

³¹ A di tivisa Mufumo wa Nungungulu na tshulegile, a hevbudza mahungu ma ganelago khu Pfhumu Jesu Kristo, nyamba himbedzedwa khu muthu.