Mithumo 25 - Bhibhiliya Nya Guage

Pawulo a ngu lomba guya lamudwa khu Sezari

¹ Festo, na pharisidwe ndronga nya wufumu, a di vbedza matshigu mararu dhoropani ga Sezareya, a khuga khavbo a gwela Jerusalema.

² Vakhongolo nya vaphasi nya mhamba ni manganagana nya Vajudha va dita thela mahungu nya nandru wa Pawulo,

³ Va lomba wuhindzi ga Festo gukhavo a ranisa Pawulo ata Jerusalema; Va di hungide gikungo nya gu mu songe ndzilani.

⁴ Aholu, Festo a di va hakha, khuye: “Pawulo khothedwe pasoni ga Sezareya. Eni nugunugu nyi na bwelela iyo.

⁵ Ava va gu ni dzifanelo vbakari gwanu va na relela gumogo ni eni, gasi guya thela ketso mwama yoyo a gu bani a ghohide a rwegwe nandru.”

⁶ Festo a di khala Jerusalema gipimo nya livbandre na mararu mwendro likhumi matshigu. Khavbo avbo, a di bwelela Sezareya. Khu mindru gakone a diya khala phathani vbagikhalotunu nya gulamule, a ranisa Pawulo.

⁷ Na bede Pawulo, a di randredwa khu Vajudha va ngata khu Jerusalema, va phela gu mu singedza silo nya singi nya guthise. Aholu gima kha va dzi kodza gu tiyisa wufakazi wawe.

⁸ Khavbo avbo, Pawulo a di hakha, khuye: “Eni kha nya ghoha gilo khu Nayo wa Mosi ambari gu ghohela Nyumba ya Nungungulu, mwendro gu ghohela mufumeli Sezari.”

⁹ Khavbo avbo, Festo khu gufela gu tsakisa Vajudha, a di wudzisa Pawulo, khuye: “U ngu dzina gu hongola Jerusalema uya lamuledwa iyo khu eni mahungu yaya, gani?”

¹⁰ Pawulo a di hakha, khuye: “Eni nyi womo phathani ga mufumeli wa Roma. Khavbo avba nyi gu na ni fanelo nya gulamuledwe avbo. Kha nya wusa nandru ga Vajudha kha nga u dzitigo gwadi.

¹¹ Aholu, nya gu bani nyiri ni nandru, nya gu bani nyi ghohide gilo nya guyele gu songwa, eni kha nyi bombi gufa. Aholu a gu bani a siri lisine esi va nyi singedzago, mwalo muthu a na nyi ningelago mandzani gwawe. Nya gu lomba guya lamudwa khu Sezari.”

¹² Khavbo avbo, Festo a di duga gihundla ni manganagana yaye, a vbedza a ganela, khuye: “U lombide gu hongola ga Sezari, u na hongola ga Sezari.”

Pawulo a ngu wonana ni mufumeli Agiripa

¹³ Na ma vbindride matshigu nya gukari, mufumeli Agiripa ni Bherenise va di hongola Sezareya vaya losa ni gu wuyisa Festo.

¹⁴ Va di vbedza iyo matshigu nya gukari. Festo a di embela mufumeli mahungu ya Pawulo, khuye: “Avba nyi na ni mwama moyo a nga tshidwa khu Felisi na khothedwe pasoni.

¹⁵ Gikhati nyi nga hongola Jerusalema, vakhongolo nya vaphasi nya mhamba ni manganagana nya Vajudha va dita thela ketso gwangu, va lomba gukhavo nyi mu lamulela gufa.

¹⁶ Eni nyi di va hakha kheni, vafumeli va Roma kha va oloveli gu lamulela gufa muthu, nyamba hegula khu gu rana vathuledzi vaye va ta mu thuledza na gupwa, gasi a mane nuye wulanga nya gu dzi vhikele.

¹⁷ Na va dzude eno, nyi di vindrugela gu khala phathani nya mahungu, nyi gu ranisa mwama yoyo.

¹⁸ Aholu vathuledzi vaye, na va emide va sasamedzela mahungu, kha nya mana nandru nya khongolo, nya nga owu nyi nga bani nyi gu wu pimisa.

¹⁹ Avo va gu mu thuledza khu mahungu nya wukhozeli wawe, ni kotani ya mwama moyo nya gupwani khu Jesu a fudego, aholu Pawulo a tiyisago gukhuye a ngu vbanya.

²⁰ Khu gumba dziti gukheni nyi na ma lamudzisa gu wani mahungu yaya, nyi di wudzisa Pawulo gukheni mwendro a ngu dzina gu hongola Jerusalema aya lamuledwa iyo.

²¹ Aholu, Pawulo a di lomba guya lamudwa khu Sezari. Khavbo avbo, nyi di ruma gu mu khothela kala nyi gu mana mano nya gu mu rumele ga Sezari.”

²² Khavbo avbo, mufumeli Agiripa a di embela Festo, khuye: “Eni neni nyi di gu gola gu mupwa muthu yoyo.” Festo a di hakha, khuye: “Mindru avba gu gyago, u na mupwa.”

²³ Na gugide, Agiripa ni Bherenise va di vboha na va panide gwadi. Va di bela phathani nya mahungu ni vathangeli nya dzinyimbi ni manganagana ya dhoropani. Khavbo avbo, Festo a di ranisa Pawulo,

²⁴ a ganela, khuye: “Mufumeli Agiripa, ni enu mwatshavbo manganagana mu tshanganidego avba! Mu ngu mu wonani oyu mwama! Khuye oyu Vajudha vatshavbo, gukhugela omu kala Jerusalema va mu wugelago va ta thela ketso avba gwangu. Va sambanyide gukhavo oyu mwama mwalo fanelo nya guvbanye.

²⁵ Aholu, eni kha nyi woni gwaye nandru nya guyele gu songwa. Kha nga a lombago guya lamudwa khu Sezari, nyi na mu yisa ga Sezari.

²⁶ Gani olu, nyi si gu mani gilo nya gulovele Sezari khu mahungu yaya. Nyi ngu mu resa avba mbeli gwanu mwatshavbo, ngudzungudzu avba gwago uwe mufumeli Agiripa, gasi khu vbasiwudzisotunu hi na mu girago, mwendro nyi na mana matshangu nya gulove lidangalila khu mahungu yaye.

²⁷ Nya gu wona gukheni kha si yeli gu rumela gibotshwa nyambana lidangalila nya gu gi bikele khilo ni gu sasamedzela nandru waye.”