Mithumo 24 - Bhibhiliya Nya Guage

Pawulo a ngu thethiswa khu Felisi

¹ Hwane nya livbandre matshigu, a di relela khongolo nya vaphasi nya mhamba, Ananiya, ni madhota nya gukari gumogo ni moyo nya muemeli nya gupwani khu Teritulo, vaya thela mahungu ya Pawulo ga mwamangulu.

² Na va ranide Pawulo, Teritulo a di phela gu sasamedzela mahungu, khuye: “Felisi nya guzundzege, gurula nya gukhongolo hi gu nago ha gu gu mana kotani yago ni satshavbo sigiro nya sadi si dugelelago tigoni gwathu si gu tsakisa vathu vatshavbo, sa gu girwa khu wugengeli wago.

³ Ethu hi ngu siti satshavbo sesi, gambe hi ngu gu bonga khiso gikhati gyatshavbo ni malangani yatshavbo.

⁴ Gasi hi si gu vbedzeli gikhati, nyi ngu lomba khu wuhindzi wago, u hi yingise gikhatinyana gidugwana.

⁵ Hi wonide gukhethu oyu mwama vivbide. Khuye a wusago pfilupfilu ga Vajudha va mayigo yatshavbo. Khuye khongolo nya tsawa nya Vanazarenu.

⁶ Gambe a di vbweta gu nyenyezisa Nyumba ya Nungungulu, hi na gu mu mola na hi gu pimisa gu mu lamula khu Nayo wathu.

⁷ Aholu ndruna Lisiya a dita a ta mu wandra mandzani gwathu,

⁸ khu tshivba a ruma gukhuye vale va gu na ni mahungu naye vate avbo gwago. Uwe wabune wa gu mu wudzisa, u na siti gwaye satshavbo esi hi mu girelago khiso mahungu.”

⁹ Vajudha navo va di sekela magana yaye khavo khidzo kamwe a ganelago.

Magana ya Pawulo ga mwamangulu wa Roma

¹⁰ Mwamangulu a di ningedza mahungu Pawulo, uye a hakha, khuye: “Khu gu dziti nya gukheni myaga nya gulaphe nuri mulamuli tigoni momu, nya gu dzipwa na nyi tshulegile gu dzi vhikela.

¹¹ Khedza gwadi: Eni nyi mwalo ambari likhumi na mavili matshigu na nyi gwede Jerusalema nyi ya khozela.

¹² Gima kha va nyi mana Nyumbani ga Nungungulu na nyi gu ganedzisana ni muthu, ambari gu kutsedzela pfilupfilu vathu dzinyumbani nya nombelo mwendro dhoropani.

¹³ Kha va dzi kodzi gu tiyisa esi va nyi ningago khiso nandru.

¹⁴ Ambari ulo, nyi ngu dzumela gukheni ha gu khedza khu Ndzila va yi ranago avo khavo tsawa, eni nya gu khozela Nungungulu wa vababe vangu, nyi khodwa ga satshavbo esi si yelanago ni Nayo, nesi si nga lowa khu vaprofeti.

¹⁵ Nyi na ni gutumba ga Nungungulu nga avo navo va gu nago nya gukhethu gomo guwuga ga vale va fudego, va nya gululama ni va nya sighoho.

¹⁶ Khu kharato, eni neni nyi ngu dzi garadza matshigu yatshavbo gu khala nyiri muthu nya monyo nya gululame mbeli gwa Nungungulu ni ga vathu vatshavbo.

¹⁷ Khu hwane nya myaga, nyi dita tigoni gwangu nyi resa siningwa gumogo ni guta luva.

¹⁸ Va nyi mane Nyumbani ga Nungungulu, na nyi gu thuma silo sesi, na nyi dzi agiside khu Nayo, gima kha nya tshanganisa gidzemo ambari gu wusa pfilupfilu.

¹⁹ Va diromo Vajudha nya gute khu Aziya, a diri avo va nga fanela guta avbo gwago va ta thela mahungu nya nandru khu eni, nari gukhwatshi va di wone gilo gwangu.

²⁰ Avo ava, va na ganele gighoho va gi manego gwangu gikhati nyi nga lamudwa phathani khu madhota.

²¹ Mwendro gi nga va gikhunguvanyiso khu kotani nya lito limwedo nyi nga ganelago vbakari gwawe, kheni: Khu kotani nya gutumbe guwuga ga vale va fudego, muhuno nyi ranidwe gu ta lamudwa vbakari gwanu.”

Pawulo a ngu khothedwa Sezareya

²² Kha nga olu Felisi a nga bani a gu ma pima gwadi mahungu nya Ndzila nya Nayo yoyu, a di thindregisa mahungu, khuye: “A gu relela ndruna Lisiya, khavbo nyi na ta matigo mahungu yanu.”

²³ A di ruma muthangeli nya masotshwa gu sayisa gwadi Pawulo pasoni, a si himbedzeli valongo vaye guta mu thumela.

²⁴ Khu hwane nya matshigu, a dita Felisi ni mwangadzi waye Dhrurusila a nga bani ari Mujudha. A di ranisa Pawulo gasi gu mupwa na gu ganela khu gukhodwa ga Jesu Kristo.

²⁵ Kha nga ulo a nga ganela ngudzu khu gululama, ni, gu dzi vegisa ni gulamudwa gu natago, Felisi a di tala khu hwanga, a hakha, khuye: “Olu indra. Nya gu guvbweta gambe nyi na gu rana.”

²⁶ A di gu hingigedza gu ningwa dzitsapawu khu Pawulo, khu guralo a di mu rana dzinyondro nya dzingi a ta bhula naye.

²⁷ Hwane nya myaga mivili, Felisi a di tshikedzwa khu Porisiyo Festo. Felisi, khu gu vbweta gu tsakisa Vajudha a di diga Pawulo pasoni.