Mithumo 2 - Bhibhiliya Nya Guage

Gutshiga nya Liphuvbo nya Guage

¹ Na li vbohide litshigu nya Pentekosta, vatshavbo va di tshanganide wulanga wumowo.

² Khu githugedza, gu di gira ligwaha na li gu tshiga khu Ndzadzini, gu di pwala gufurugedza liphuvbo nya tshivba li gu tadza nyumba va nga bani vari umo.

³ Khavbo avbo, gu di tumbuluga kha nga malimi nya malavbelavbe nya nilo ma gu dzi kabanisela, gu mbaka limwedo vbatshani ga moyo ni moyo.

⁴ Vatshavbo va di tala khu Liphuvbo nya Guage, va gu phela gu ganela mambe malimi, kha nga idzo Liphuvbo li nga bani li va ruma gu ganela khidzo.

⁵ Va di tshanganide Jerusalema Vajudha nya ndruda, nya gute khu mayigoni yatshavbo.

⁶ Gikhati gu nga gira ligwaha, mwandra nya vathu wu di tshangana, wu tala khu gu liwuga, kholu muthu ni muthu a di vapwa na va gu ganela khu lidimi laye.

⁷ Va di thuruga gumogo ni gu liwuga, va gu ganela, khavo: “Ina vatshavbo ava va ganelago khandri Vagalileya, gani?

⁸ Sa gu kodzega kharini gu muthu ni muthu a vapwa na va gu ganela khu lidimi laye nya mavelego?

⁹ Vapariti, Vamedhi, Vaelemi ni vathu va vbanyago Mesopotamiya ni Judheya ni Kapadhokiya ni Pontu, ni Aziya,

¹⁰ ni Firijiya ni Panfiliya, ni Egipito ni va gipandre gya Libhiya, vbinganoni ni Sirene, ni vathu nya gute khu Roma;

¹¹ Vajudha nya mavelego ni vale va nga dzi vbindrugedza va dzi gira Vajudha, vathu va Kereta ni va Arabhiya, hatshavbo hi ngu vapwa na va gu huwelela siliwugiso sa Nungungulu khu malimi yathu.”

¹² Vathu vatshavbo va di liwuga, khavo: “Nari silo muni esi hi si wonago?”

¹³ Gasi vambe va di gu hembulula, khavo: “Ava vathu va di leva khu wadwa.”

Tshumayelo wa Pedro vbakari nya mwandra

¹⁴ Pedro, na emide gumogo ni vale nya likhumi na moyo, a di khusedza lito a gu ganela kharati, khuye: “Enu vathu va Judheya ni enu mwatshavbo mu vbanyago Jerusalema, khalani na mu gu dziti, gambe tulani gwadi dzindzeve mu yingisa magana yangu.

¹⁵ Vama vava kha va leva nga idzo mu pimisago khidzo: Kha nga mu wonago, gu ngari dzimindru, gikhati nya wuraru nya litshigu (9 wora nya dzimindru).

¹⁶ Aholu, ma gu tadzisega magana ya muprofeti Joyeli a nga khuye:

¹⁷ ‘Si na dugelela matshiguni nya guhegise, khu Pfhumu a ganelago, nyi na tshisa Liphuvbo langu vbatshani nya vathu vatshavbo, sanana sanu nya sikhwathana niso nya sagadzyana si profeta madzaha yanu ma na wona siwonegiso ni sikhosane sanu si na lora dzindroro.

¹⁸ Khu lisine nyi na tshisa Liphuvbo langu vbatshani ga sithumi sangu nya vama ni esi nya vanyamayi, va na profeta.

¹⁹ Nyi na wonegisa siliwugiso vbatshani, Ndzadzini, ni siwonegiso vbavbatshi, mafuni; Novba, nilo ni hunguva nya wutshi.

²⁰ Lidambo li na vbindrugedza li khala gidema gasi ngima wu na fuvila wu khala nga novba. Na li si gu vbohi litshigu la Pfhumu: Litshigu likhongolo, litshigu nya gidhumo.

²¹ Muthu watshavbo a gu lombelela khu lina la Pfhumu a na vbanyiswa.’

²² “Vama va na Israyeli, yingisani gwadi magana yaya. Jesu wa Nazareta dandrisidwe vbakari gwanu khu mithumo ya tshivba, ni siliwugiso, ni siwonegiso esi Nungungulu a giridego khu uye vbakari gwanu, kha nga mu dzitigo gwadi.

²³ Mwama yoyu ningedwe khu gu dzina ni sihalo wa Nungungulu, gasi enu mu di mu ningela a khokhothedwa vbagihambanotunu khu mandza nya vathu nyambana nayo, mu mu songa.

²⁴ Aholu Nungungulu a mu wuside khu ga vafudego, a mu vbulugisa gusanisekani nya lufu, kholu a di si yedwi khu gu fumedwa khu tshivba nya lufu.

²⁵ Dhavhidhe ganede khu mahungu yaye, khuye: ‘Nyi di gu wona Pfhumu mbeli gwangu gikhati gyatshavbo Uye womo nyamudye gwangu gasi nyi si kanakani.

²⁶ Khavbo avbo, monyo wangu wu di tsaka ni lidimi langu li di nengela givili gyangu gi na hefemula khu gutumba

²⁷ Kholu khu na nga diga hefemulo wangu kovani nya lufu gambe khu na nga dzumedzisa gihathwa gyago gi wona guhina.

²⁸ U nyi tulede guti dzindzila nya guvbanye. U na nyi tadzisa khu gutsaka nya guwone khovbe yago.’

²⁹ Vandruye, dzumelani nyi mi embelani khu lisine langu latshavbo: Kokwe wathu Dhavhidhe fude a gu dzingwa. Lithowo laye gambe li nga romo vbakari gwathu kala na muhuno.

³⁰ Kha nga a nga bani ari muprofeti a di gu dziti nya gukhuye Nungungulu a di Mu tumbiside khu gusambanya, gu vega vbagikhalotunu gwaye nya wufumu gyanana nya melego waye.

³¹ Khu kharato, kokwe Dhavhidhe a di hegulela gu wona ni gu tivisa guwuga ga Kristo khu ga vafudego na gu ngari hwindzo. Khu lisine Kristo gima kha digwa kovani nya lufu, ni givili gyaye gambe gima kha gya wona guhina.

³² Wonani gwadi, Nungungulu wuside Jesu khu ga vafudego, ethu avba mu hi wonago, hi dzifakazi nya mahungu yaya.

³³ Olu na khusedzidwe nyamudye ga Nungungulu hakhide Liphuvbo nya Guage a nga tumbiswago khu Babe, a li rumela. Khiso esi mu si wonago ni gu sipwa.

³⁴ Kholu Dhavhidhe gima kha gwela Ndzadzini gambe a ngu fakaza, khuye: ‘Pfhumu a di embela Pfhumu yangu, khuye: Khala khu nyamudye gwangu

³⁵ kala nyi gu vega valala vago vbavbatshi nya migondro yago.’

³⁶ Nyumba yatshavbo ya Israyeli yi na khale na yi gu dziti khu lisine latshavbo nya gu khiyo Jesu yoyu mu nga mu khokhothela vbagihambanotunu, Nungungulu a mu dandrisile a khala Pfhumu ni Kristo.”

Vathu nya guhegule va nga vbindrugedza va khodwa ga Jesu

³⁷ Na va pwide magana yaya va di garadzega myonyoni gwawe, va wudzisa Pedro ni vambe vapostoli, khavo: “Vandruye, ginani hi fanelago gu gira?”

³⁸ Pedro a di va hakha, khuye: “Dzi layeni, moyo ni moyo a bhapatiswa Linani ga Jesu gasi a tsetseledwa sighoho. Khavbovbo mu na hakha giningwa nya Liphuvbo nya Guage.

³⁹ Kholu khu lisine gitumbiso gya gu lumba enu ni sanana sanu ni vatshavbo vale va guromo hwindzo; vatshavbo ava Nungungulu Pfhumu yathu a va ranago gwaye.”

⁴⁰ Khu magana yaya ni mambe nya mangi, Pedro a di gu fakaza ni gu va tiyisa, khuye: “Dzi vbanyiseni ga melana yoyu nya guwegele.”

⁴¹ Vale va nga hakhago magana yaye va di bhapatiswa. Litshigu lile va di bela tsawani nya vakhodwa gipimo nya magumi mararu mazana vathu.

⁴² Avo va di gu khathala khu gu hengela gikhati gyatshavbo umo nya sihevbudzo nya Vapostoli ni umo nya pwanano nya wundruye, ni gukabana gibaba, ni milombelo.

⁴³ Githawo gi diri gingi myonyoni ga vatshavbo, kholu a diri singi sisamadziso ni siwonegiso si nga bani si gu girwa khu Vapostoli.

⁴⁴ Vakhodwa vatshavbo, va di khala dangamwedo ma gu hengela silo satshavbo;

⁴⁵ va di rengisa sipeto ni dzithomba dzawe va gu kabanisela tengo wakone gu khedza khu sigaradzo nya muthu ni muthu.

⁴⁶ Khu litshigu ni litshigu va di hengela monyo moyo, va hongola Nyumbani ga Nungungulu, va kabana gibaba, va hodza guhodza gwawe khu gutsaka ni gu nengela, myonyo yawe na yi tangade.

⁴⁷ Va di rungudza Nungungulu, va godwa khu vathu vatshavbo. Khu litshigu ni litshigu, Pfhumu a di engedzela tsawani gwawe tengo nya vale va na gu vbanyiswago.