Mithumo 11 - Bhibhiliya Nya Guage

¹ Vapostoli ni vandruye va Judheya va dipwa nya gupwani va nya mayigo navo va hakhide mahungu ya Nungungulu.

² Gikhati Pedro a nga bwelela Jerusalema, vakhodwa vale nya gute khu nayoni nya wugwera ma di mu kawuka khayo:

³ “Uwe u bede nyumbani nya vathu nyamba hana wugwera u gu hodza navo.”

⁴ Khavbo avbo, Pedro a di tshamusela satshavbo, gukhugela mahegiso kala mahegiso, khuye:

⁵ “Eni nyi diromo dhoropani ga Jope na nyi gu gira nombelo, nyi di wona giwoniso: Gilo nya gukhwatshi mwendra nya khongolo, na wu gu tshiga khu Ndzadzini, na wu hungidwe dzitshokani dza dzina, wu gu relela kala vbafuvbi gwangu.

⁶ Nyi di khedzisa ndrani nya giwoniso gile, nyi wona sirengo nya mawundru mana, sirengo nya likhabi ni sirengo nya gukhwirire ni sinyoni.

⁷ Khavbo avbo, nyi dipwa lito na li gu, khilo: ‘Khuga, Pedro! Songa u hodze.’

⁸ Aholu, eni nyi di hakha, kheni: ‘Ahihi, Pfhumu, kha nyi giri isoso; gima nyi si gu hodzi silo nya gunyenyeze ni silo nyamba agiswa.’

⁹ Lito li di nyi embela, khilo: ‘U nga yi khuwe gi nyenyezide egi gi agisidwego khu Nungungulu.’

¹⁰ Silo sesi si wonegide nyondro tharu kala mwendra wu gu khusedzwa wu bwelela Ndzadzini.

¹¹ Khavbo avbo, va di vboha ndrangani nyi nga bani nyi endrede avbo, vama vararu nya gute khu Sezareya va ta nyi vbweta.

¹² Liphuvbo la Nungungulu li di nyi ruma guhongola navo nyamba kanakana. Ava vandruye nya livbandre na moyo nyi hongode navo, hi diya bela nyumbani ga Korineliyo.

¹³ Uye a di hi embela edzi a nga wonisa idzo ngilozi ya Nungungulu nyumbani gwaye. Yi mu embela, khiyo: ‘Rumela mwango dhoropani ga Jope u ya rana Simoni, limbe lina a gu Pedro.

¹⁴ Uye a na ta gu embela mahungu u na gu vbanyiswago khayo uwe ni ndranga yago yatshavbo.’

¹⁵ Aholu, gikhati nyi nga phela gu ganela, Liphuvbo nya Guage li di va tshigela kha nga edzi li nga hi tshigelago khidzo guhegulani.

¹⁶ Khavbo avbo, nyi di dundruga magana ya Pfhumu a nga khuye: ‘Johane, khu lisine bhapatiside khu mati, gasi enu mu na bhapatiswa khu Liphuvbo nya Guage.’

¹⁷ Olu Nungungulu a va ningidego giningwa nya nga egi a nga hi ningago ethu gikhati hi nga khodwa ga Pfhumu Jesu, na nyi yi mane hayi eni tshivba nya guganedze Nungungulu?”

¹⁸ Na va pwide magana yaya va di rula myonyoni gwawe va gu rungudza Nungungulu, khavo: “Khu kharato, gu yeyedza gupwani Nungungulu ningide navo va nya mayigo wuhigo nya gu dzi laye va vbindrugedza mavbanyelo, gasi va mane guvbanya.”

Libandla nya vakhodwa va Antiyokiya

¹⁹ Ga gikhati gyogyo, vakhodwa va di phalalegide khu kotani nya tshanisa yi nga dugelela hwane nya gusongwe Sitefane. Va di vboha kala Fenisiya, Kipre ni Antiyokiya, va gu hevbudza mahungu ya Nungungulu ga Vajudha basi.

²⁰ Gasi vambe, va nga bani va guta khu Kipre ni Sirene, va di hongola kala Antiyokiya vaya hevbudza Ivhangeli ya Pfhumu Jesu ga Vagreki.

²¹ Tshivba ya Pfhumu yi diri navo. Vathu nya vangi va di khodwa, va gu vbindrugedza mavbanyelo, va wuya ga Pfhumu.

²² Mahungu yawe ma di pwala ga libandla la Jerusalema. Khavbo avbo, va di rumela Bharinabha gu hongola kala Antiyokiya.

²³ Na vbohide, a di wona wuhigo wa Nungungulu a tsaka, a va embela vatshavbo va simama gu khala ni Pfhumu khu monyo moyo vatshavbo.

²⁴ Kholu a diri muthu nya ndruda nya gutale khu Liphuvbo nya Guage ni gukhodwa; vathu nya vangi va di dzi ningela ga Pfhumu.

²⁵ Khavbo avbo, Bharinabha a di phara ndzila a hongola Tarisu aya vbweta Sawule;

²⁶ na mu mane, a di mu dzega a gu hongola naye Antiyokiya. Va khade vatshavbo gipimo nya mwaga rumba, va hengela ni libandla, va gu hevbudza gidzemo nya gikhongolo. Khiyo Antiyokiya vapizane va Jesu va nga phela guranwa pwani Vakristo.

Agabo a ngu tivisa ndzala nya yikhongolo

²⁷ Khu matshigu yale, Vaprofeti nya gukari va di relela khu Jerusalema va guta Antiyokiya.

²⁸ Moyo wawe nya gupwani khu Agabo a di khuga a ema a tivisa khu Liphuvbo nya Guage khuye yi na manega ndzala nya yikhongolo tigoni gatshavbo; khiyo yi nga manega matshiguni ya Klawudiyo.

²⁹ Vapizane va di pwanana gu rumela silo nya guphasedzele vandruye va nga bani va gu khala Judheya, muthu ni muthu a di ninga kha nga gu manela gwaye.

³⁰ Va di gira kharato va si rumela ga madhota khu mandzani ga Bharinabha ni Sawule.