Mitengo 32 - Bhibhiliya Nya Guage

Gukavedwa nya litigo la Gileyadhi ga va na Rubheni ni va na Gadhi

¹ Sanana sa Rubheni ni esi sa Gadhi, si di fumide mitshambi nya gutale ngudzu. Va di wona litigo la Jazeri ni la Gileyadhi na ma khalegide wulangani nya wadi ngudzu nya gufanele gu havisa umo mitshambi yawe.

² Va dita ga Mosi ni ga muphasi nya mhamba Eleyazari ni ga vathangeli nya tshangano vata ganela, khavo:

³ “Mayigo ya Ataroti, ya Dhibhoni, Jazeri, Nimera, Hesibhoni, Eleyali, Sebami, Nebhu ni Bheyoni

⁴ mayigo yale Pfhumu Nungungulu a ma sasedego mbeli ga tshangano wa na Israyeli, mayigo nya yadi gasi gu havisa umo mitshambi. Ethu sithumi sago hi na ni mitshambi.”

⁵ Va di engedza gambe, khavo: “Ha gu bani hi manide wuhigo mahoni gwago, litigo leli li ningele ga sithumi sago, li khala thomba yathu; u nga hi gurumedzi gu tshatuga tsongo wa Joridhani!”

⁶ Khu guralo, Mosi a di embela va na Gadhi ni va na Rubheni, khuye: “Gasi mwa gu vbweta gu tshalani avba, mu diga vandriyanu va hongola nyimbitunu, gani?

⁷ Khu ginani enu mu vbedzago tshivba va na Israyeli, gasi va si beli ga litigo eli Pfhumu Nungungulu a va ningidego?

⁸ Khidzo va giridego vababe vanu, gikhati nyi va rumedego khu Kadhesi-Bharineya gasi guta sola litigo leli.

⁹ Na va vbohide kovani wa Esikoli, gasi guya sola litigo, va dita vbedza tshivba va na Israyeli, gasi va si beli ga litigo lile va ningidwego khu Pfhumu Nungungulu.

¹⁰ Khavbo avbo, likhulo la Pfhumu Nungungulu li di khondra litshigu lolo, gukala a sambanya, khuye:

¹¹ Khu lisine, vathu vatshavbo va dugidego khu tigoni ga Egipito, gukhugela avo va gu ni tanga nya magumavili myaga guya mbeli, gima kha va na li wona litigo leli nyi sambanyidego gu ninga Abrahama, Isaki ni Jakobe; kholu kha va tumbega va nyi landrela.

¹² Vbavbandze basi ga Kalebi, mwamana wa Jefoni, Mukenasi, ni Josuwa, mwamana wa Nuni, khavo basi va na li wonago, kholu va di simama gu landrela Pfhumu Nungungulu.

¹³ Khu guralo, Pfhumu Nungungulu a di goroga, a wugela va na Israyeli, a va gira va legalega giwulani gipimo nya magumana myaga, kala gu vbela melana watshavbo nya vale va nga gira guvivba mbeli ga Pfhumu Nungungulu.

¹⁴ Olu enu nenu mwa gu vbweta gu dzega wulanga wa vababe vanu mu khala gitugulwana nya sighohi, mu engedzela likhulo la Pfhumu Nungungulu vbakari ga va na Israyeli.

¹⁵ Mwa gu bani mu si dzini gu landrela Pfhumu Nungungulu, Uye nuye a na mi diga giwulani momu, khu guralo, mu na mbembisa vatshavbo vathu vava.”

¹⁶ Khavbo avbo, avo va diya ga Mosi vaya ganela, khavo: “Hi na vbaha avba mavbandro nya guvege umo mitshambi yathu, hi vbaha gambe ni madhoropa nya guvbanye umo sanana sathu.

¹⁷ Gasi ethu, hi na soma matshari, hi vbiredzela guthanga mbeli ga va na Israyeli, kala hi va vbohisa wulanga wawe; aholu, sanana sathu si na tshala, si vbanya madhoropani nya makhokhola, va kodza guvbuluga ga vale va vbahidego tigoni momu.

¹⁸ Ethu kha hi na wuya gambe magaya gwathu, moyo ni moyo wa na Israyeli na si gu hakhi thomba yaye.

¹⁹ Kholu ethu kha hi na kabana navo thomba ya tshatugo ga eyi nya tsongo wa Joridhani, ambari guya mbeli, kholu thomba yathu yomo eno, Khugadambo wa Joridhani.”

²⁰ Khavbo avbo, Mosi a di va hakha, khuye: “Mwa gu girani kharato, mu soma nenu guya dwana mbeli ga Pfhumu Nungungulu,

²¹ moyo ni moyo nya enu a gu phara litshari a tshatuga tsongo wa Joridhani mbeli ga Pfhumu Nungungulu, kala uye a tutumisa valala vaye mbeli gwaye,

²² litigo latshavbo na li rude mandzani ga Pfhumu Nungungulu, avbovbo mu na dzi kodzani gu wuya magaya gwanu na mu tshulegide mahoni ga Pfhumu Nungungulu ni ga vathu va na Israyeli; litigo leli li na bani liri thomba yanu mahoni ga Pfhumu Nungungulu.

²³ Aholu, mwa gumba girani kharalo, mu na bani mu ghohede Pfhumu Nungungulu, gambe dzitini nya gukhenu gighoho gyanu gi na mi resela tsayiso.

²⁴ Vbahelani madhoropa sanana sanu, ni mavbandro nya guvege dzinvuta dzanu; mu landrisa iso mu tumbisidego khu maganani gwanu.”

²⁵ Khavbo avbo, va na Gadhi ni va na Rubheni, va di ganela ga Mosi, khavo: “Kha nga idzo u rumago khidzo uwe, mune wangu, sithumi sago si na gira kharato.

²⁶ Sanana sathu, vagadzi vathu, mitshambi yathu ni sifuyo sathu satshavbo, si na tshala madhoropani ya Gileyadhi,

²⁷ aholu sithumi sago, moyo ni moyo, a na soma matshari guya nyimbitunu, mbeli ga Pfhumu Nungungulu, kha nga idzo u ganedego khidzo uwe, mune wangu.”

²⁸ Khavbo avbo, Mosi a di dzega mahungu yaya a gu leletela ga muphasi nya mhamba Eleyazari, ni ga Josuwa, mwamana wa Nuni, ni ga vathangeli nya dzinyumba dza vababe nya mahundzu nya sanana sa Israyeli;

²⁹ a va embela, khuye: “Va na Gadhi ni va na Rubheni, va gu tshatuga nanu Joridhani, moyo ni moyo wawe na somide matshari guya dwana mbeli ga Pfhumu Nungungulu, litigo li manega na li rude mbeli gwanu, enu mu na ningela gwawe litigo la Gileyadhi li khala thomba yawe.

³⁰ Aholu va gumba tshatuga nanu na va somide matshari, avo thomba yawe va na yi mana gumogo nanu tigoni ga Khanani.”

³¹ Va na Gadhi ni va na Rubheni va di hakha, khavo: “Iso Pfhumu Nungungulu a ganedego ga sithumi sago, ethu hi na gira.

³² Ethu hi na tshatuga na hi somide matshari guya dwana mbeli ga Pfhumu Nungungulu, hi hongola tigoni ga Khanani, aholu giavelo nya thomba yathu gi na manegela eno tshatugo wa Joridhani.”

Gukavedzedwa nya litigo la tshatugo gwa Joridhani

³³ Mosi a di ningela ga va na Gadhi ni va na Rubheni ni ga gipandre nya lihundzu la na Manasi, mwamana wa Josefe, mufumo wa Seyoni, mufumeli wa Vaamori, ni mufumo wa Oge, mufumeli wa Bhasani, litigo ni madhoropa yakone ni mahange yatshavbo ya madhoropani nya litigo latshavbo.

³⁴ Va na Gadhi va di vbaha madhoropa ya Dhibhoni, Ataroti ni Aroweri;

³⁵ Ataroti-Sofani, Jazeri ni Jogibheya;

³⁶ Bheti-Ninira ni Bheti-Harani, madhoropa nya makhokhola ni mavbandro nya dzinvuta.

³⁷ Va na Rubheni va di vbaha madhoropa ya Hesibhoni, Eleyali ni Kiriyatiyimi;

³⁸ Nebho, Bhahali-Meyomi, va li vbindrugedza lina; ni Sibima; mambe madhoropa va nga ma vbahago va di ma riya mambe malina.

³⁹ Va na Makiri ni va na Manasi, va di pwanana ni va na Gileyadhi va lundra Vaamori va nga bani na vari umomo, va dzega litigo lawe.

⁴⁰ Khu guralo, Mosi a di ningela ga Makiri, mwamana wa Manasi, litigo la Gileyadhi, a khala umo.

⁴¹ Jayiri, mwamana wa Manasi, a diya dzega mitalala yawe a yi ninga lina la Havoti-Jayiri.

⁴² Nobha, a diya dzega litigo la Kenati gumogo ni mitalala yaye, a li riya lina laye khuye khu Nobha.