Mitengo 19 - Bhibhiliya Nya Guage

Mati nya guagise

¹ Pfhumu Nungungulu a di engedza a embela Mosi ni Aroni, khuye:

² Egi khu gileletelo nya nayo mu ningwago khu Pfhumu Nungungulu, a gu khuye: Ganela ga va na Israyeli va nyi resela gimombyana nya ngadzi nya gufuvile, nyamba hasa, nyambana mavalavala, gi si gu rwaligo kanga.

³ Mu gi ningelani ga muphasi nya mhamba Eleyazari; a na gi dusa vbavbandze nya lizumbo; gita paywa mbeli gwaye.

⁴ Muphasi nya mhamba Eleyazari, a na dzega novba wakone, a wu mitegedzela khu nyala yaye mbeli nya Tshatsha nya Tshangano, livbandre na dzimbili dzinyondro.

⁵ Khavbo avbo, va na vbisa gimombyana mbeli gwaye; va na vbisa lidowo, nyama, novba ni swanyi wakone.

⁶ Muphasi nya mhamba a na dzega simbo nya sedhari, ni mwasi nya nyagiluve ni mawoya nya gufuvile, a si rinya vbakari nya nilo avbo gu vbiswago gimombyana.

⁷ Khavbo avbo, muphasi nya mhamba a na handza dzingandzu dzaye, a hamba givili gyaye khu mati, khu hwane a bela lizumboni, a na bani na lolede kala gupfolani nya lidambo.

⁸ Uye a nga vbisago nuye, a na handza dzingandzu dzaye khu mati ni gu hamba givili gyaye, uye nuye a na bani a lolede kala gupfolani nya lidambo.

⁹ Mwama moyo a agidego a na wola nguma nya gimombyana, aya wu thela wulangani nya guage, vbavbandze nya lizumbo. Nguma wowu wu na sayiswa gwadi khu tshangano wa va na Israyeli gasi gu gira khuwo mati nya gutsetseledwe sighoho; wu khala phaselo nya sighoho.

¹⁰ Uye a wodego nguma nya gimombyana a na handza dzingandzu dzaye, a na bani na lolede kala gupfolani nya lidambo; owu wu na wuri nari nayo nya gupindruge ga va na Israyeli ni ga muluveli a vbanyago vbakari gwawe.

¹¹ Wule a na kuhago girumbi nya muthu, a na bani na nyenyezide livbandre na mavili matshigu.

¹² A na dzi agisa khu litshigu nya wuraru khu mati nya guagise, bwelo khavbo a dzi agisa khu litshigu nya livbandre na mavili; aholu a gumba dzi agisa khu litshigu nya wuraru, ni litshigu nya livbandre na mavili khu mati yoyo, uye kha na aga.

¹³ Muthu watshavbo a na kuhago girumbi nya muthu nya gu bani na fude, a si dzi agisi, a gu nyenyezisa Tshatsha wa Pfhumu Nungungulu; khu kharato, a na fuviswa vbakari ga va na Israyeli, kholu kha mitegedzedwa mati nya guagise; nyenyezide, gunyenyeza gu ngari vbatshani gwaye.

¹⁴ Owu khuwo nayo, a gu tshuka muthu afa tshatshani nya gukari, vatshavbo va belago tshatshani momo ni vatshavbo va guromo umo, va na bani va nyenyezide livbandre na mavili matshigu.

¹⁵ Ni sombo satshavbo si ngamba fenengedzwa, si gu mwalo gifenengedzo nya guhungwe khigyo, si na bani si nyenyezide.

¹⁶ Muthu watshavbo a na kuhago girumbi nya muthu a nga songwa khu litshari khabini, mwendro a ngafa, mwendro marambo nya muthu, mwendro lithowo, a na bani na nyenyezide livbandre na mavili matshigu.

¹⁷ Gasi gu agisa muthu yoyo a nyenyezidego, va na baga nguma nya miphaso nya sighoho va thela gyomboni, va thela mati vbatshani nya nguma.

¹⁸ Khu guralo, muthu moyo a agidego, a na dzega sase nya nyagiluve a wu nega matini momo, a mitegedzela tshatsha ni sombo satshavbo, ni vatshavbo vathu va guromo tshatshani mule. A na mitegedzela gambe ni muthu yoyo a khuhidego marambo, ambari nari muthu a songidwego, mwendro lithowo.

¹⁹ Oyu a agidego, a na mitegedzela muthu yoyo nya gunyenyeze khu litshigu nya wuraru ni litshigu nya livbandre na mavili, a mu agisa; a na handza dzingandzu dzaye, bwelo khavbo a hamba givili gyaye, gupfolani nya lidambo a na bani na agide.

²⁰ Aholu uye a nyenyezidego a gumba dzi agisa, muthu yoyo a na fuviswa vbakari nya tshangano; kholu a na bani na nyenyeziside Wulanga nya Guage wa Pfhumu Nungungulu, ni mati nya guagise kha ma mitegedzela vbatshani gwaye; khu guralo nyenyezide.

²¹ Owu wu na bani wuri nayo kala gupindruga: Uye a na gu mitegedzelago khu mati nya guagise, a na handza dzingandzu dzaye; ni oyu a na kuhago mati nya guagise, a na bani nasa aga kala gupfolani nya lidambo.

²² Ni satshavbo iso si nga khuhwago khu muthu nya gunyenyeze, si na bani si nyenyezide, ni muthu a na gu si kuhago a na nyenyeza kala gupfolani nya lidambo.