Mitengo 18 - Bhibhiliya Nya Guage

Dzifanelo ni siguruvedzo sa vaphasi nya mhamba va na Levhi

¹ Pfhumu Nungungulu a di embela Aroni, khuye: Uwe ni sanana sago, ni linyumba la vababe vago, mu na rwala nandru wa Wulangani nya Guage. Uwe ni sanana sago, mu na rwala nandru nya wuphasi wanu nya mhamba.

² Hidzimela gumogo ni vandriyago nya lihundzu la na Levhi, lihundzu la babe wago, avo va na gu phasedzela va gu thumela, uwe ni sanana sago, na mu gu mu khozela Tshatshani nya Gidzumeledzwano.

³ Avo va na khala vawoneleli vago ni gu wonelela tshatsha watshavbo; aholu va nga tshuki va kuha sombo si agidego ambari sa vbagiluvelotunu gasi va sifi.

⁴ Va na gu phasedzela, va wonelela Tshatsha nya Tshangano ni gu sayisa thumo watshavbo wa Tshatshani gasi gu si manegi ni moyo wa va nya mayigo a hidzimelago gwanu.

⁵ Mu na sayisa Wulangani nya Guage ni vbagiluvelotunu; gasi gu si manegi gambe likhulo nya guwugedwe va na Israyeli.

⁶ Wonani gukhenu Nyi dzegide vandriyanu va na Levhi, vbakari ga va na Israyeli va ningedwa avbo gwanu khu Pfhumu Nungungulu, gasi va gira thumo wa Tshatshani nya Tshangano.

⁷ Aholu uwe gumogo ni sanana sago mu na thuma thumo wanu nya wuphasi nya mhamba, ga satshavbo sa vbagiluvelotunu, niso si na gu bani na siri makhuvini; uwowo a na bani ari thumo wanu. Nyi mi ningide thumo nya wuphasi nya mhamba kha nga giningwa nya thumo wanu; muthu wa vbavbandze a na hidzimelago avbovbo, a nafa.

Iso va na vbanyago khiso vaphasi nya mhamba

⁸ Pfhumu Nungungulu a di engedza gambe a embela Aroni, khuye: Wona nya gukhuwe, Eni kamwe nyi gu ningide gu sayisa miningelo yangu, ni satshavbo silo nya guage sa na Israyeli, sa gu ningwa uwe ni sanana sago, kholu u todzidwego mafura, nyi si ningede gwago kha nga nayo kala gupindruga.

⁹ Vbakari nya silo satshavbo si agiswago, vbavbandze nya sile si vbiswago khu nilo, iso si lumbago uwe khesi: Miningelo yawe yatshavbo, ni miningelo yawe nya guhodze, miphaselo yawe nya sighoho ni miphaselo yawe yatshavbo nya milandru va na gu yi girago gasi gu tsetseledwa khiyo sighoho avbo gwangu; isoso si na bani si agide, si na lumba uwe gumogo ni sanana sago.

¹⁰ U na si hodzela wulangani nya guage ngudzu; vama vatshavbo va na hodze. Si agide avbo gwago.

¹¹ Iso si na gu lumbago gambe khesi: “Miningelo nya gu yi mane khu siningwa sawe, miningelo nya gundziwitedwe, ya sanana sa Israyeli; isoso nyi si ningede gwago, ga sanana sago nya madzaha ni ga vanyamahegyane vago kha nga nayo nya gukala gupindruga; muthu watshavbo wa ndrangani gwago a na gu bani a dzi agiside a na si hodza.”

¹² Satshavbo iso nya mihandro nya guhegule nya mafura niso nya wadwa ni wuguvbi nya tirigu nya wadi, va na ningelago ga Pfhumu Nungungulu, nyi ngu gu ninga si lumba uwe.

¹³ Yatshavbo mihandro nya guphele yi manegago mafuni va na resago ga Pfhumu Nungungulu, yi na lumba uwe; muthu watshavbo wa ndrangani gwago a na manegago na dzi agiside, a ngu dzi kodza gu yi hodza.

¹⁴ Satshavbo si agidego sa tigoni ga Israyeli sa gu lumba uwe.

¹⁵ Matiwula yatshavbo nya vathu mwendro nya sirengo, va na gu resago ga Pfhumu Nungungulu, ma na lumba uwe; aholu matiwula nya vathu ni matiwula nya sirengo nyamba aga u na rumela ma dzegiswa.

¹⁶ Avo va lumbago gu dzegiswa, u na va dzegisa na vari ni tanga nya ngima moyo nya guvelegwe, mayelano khidzo u na gu dzi wona khidzo, khu tengo nya livbandre singerengere nya parata, gukhedza khu pimo wa Wulangani nya Guage, gingerengere ni gingerengere gi pimago likhumi dzigera.

¹⁷ Aholu matiwula nya mombe, matiwula nya nvuta mwendro matiwula nya phongo, esi kha si dzegiswi, kholu si agide; novba waye u na wu mitegedzela vbagiluvelotunu, mafura yakone u gira khayo ningelo nya guvbiswe, ma khala mahema nya gunungele ga Pfhumu Nungungulu.

¹⁸ Nyama yakone yi na lumba uwe; gumogo ni khana nya gundziwitedwe ni litundru la nyamudye.

¹⁹ Miningelo yatshavbo nya guage yi ningedwago khu va na Israyeli ga Pfhumu Nungungulu, Nyi ngu yi ningela gwago, ga sanana sago nya madzaha ni ga sanana sago nya vanyamahegyane, kha nga nayo nya gukala gupindruga, gidzumeledzwano nya munyu, kala gupindruga mbeli ga Pfhumu Nungungulu, avbo gwago ni ga livelego lago.

Miningelo nya gipandre nya likhumi nya gu dusedwe va na Levhi

²⁰ Pfhumu Nungungulu a di embela Aroni, khuye: “Uwe khu na mana thomba tigoni gwawe, ambari gu mana giavelo vbakari gwawe. Eni nyi na bani Nyiri thomba ni giavelo gyago vbakari ga va na Israyeli.

²¹ Wona nya gukhuwe sanana sa Levhi, nyi si ningide mihengo yatshavbo nya likhumi yi duswago khu va na Israyeli yi khala thomba yawe, khu tshatshazelo nya mithumo yatshavbo va thumago ndrani nya Tshatsha nya Tshangano.

²² Gasi olu va na Israyeli, va nga hidzimeli gambe vbafuvbi nya Tshatsha nya Tshangano, gasi va si dzi vangeli lufu khu gu bani va ghohide.

²³ Va na Levhi, khavo va na girago thumo wa ndrani nya Tshatsha nya Tshangano, avo khavo va na gu rwalago nandru wawe; owu wu na bani wuri nayo ni ga situgulwana sanu kala gupindruga; gasi avo kha va na mana thomba vbakari ga va na Israyeli.

²⁴ Kholu miningelo nya gipandre nya likhumi yi ningedwago khu sanana sa Israyeli ga Pfhumu Nungungulu, nyi ningide va na Levhi, gasi yi khala thomba yawe; khu guralo, Eni nyi va embede, kheni: Vbakari ga va na Israyeli enu mu mwalo thomba yi mu lumbago.”

²⁵ Pfhumu Nungungulu a di embela Mosi, khuye:

²⁶ “U na ganela gambe ga va na Levhi, u va embela, khuwe; avbo mu hakhago gipandre nya likhumi ga sanana sa Israyeli, egi nyi mi ningago gasi gi khala thomba yanu, mu na dusa gipandre nya likhumi ga iso mu gira khigyo ningelo ga Pfhumu Nungungulu.”

²⁷ Ningelo wanu wu na sayedwa kha nga ningelo nya tirigu ya githalani ni ningelo nya singi sa mugighowoloni nya vbinyu.

²⁸ Khu guralo, gambe, mu na ningela ga Pfhumu Nungungulu, ningelo nya satshavbo nya gipandre nya likhumi mu na gu hakhago khu ga sanana sa Israyeli, mu na ningela khiso ningelo wa Pfhumu Nungungulu ga muphasi nya mhamba Aroni.

²⁹ Ga silo satshavbo mu na gu ningwago, mu na dusa gipandre nya iso mu si wonago nasiri sadi mu ningela Pfhumu Nungungulu.

³⁰ Khu guralo, u na va embela, khuwe: Mwa gu ningelani iso nya sadi ngudzu, iso si tshalago, si na lumba enu va na Levhi, gu fanana ni tirigu ya vbagithalatunu ni wadwa wa gighowoloni va tshalago naso vathu hwane nya ningelo.

³¹ Mu na si hodzani malangani gwatshavbo, enu ni mapango yanu; kholu iyoyo tshatshazelo yanu nya mithumo yatshavbo mu yi thumago ndrani nya Tshatsha nya Tshangano.

³² Mwa gu girani ningelo khiso nya sadi ngudzu, gima kha mwa na rwalani nandru; kha mu na nyenyezisa silo nya guage sa sanana sa Israyeli, kholu mwa gu si nyenyezisa, mu na dzi vangela lufu.