Mitengo 15 - Bhibhiliya Nya Guage

Milayo khu miningelo nya miphaso

¹ Pfhumu Nungungulu a di embela Mosi, khuye:

² Embela va na Israyeli, khuwe: Mwa gu belani ga litigo eli nyi mi ningidego gasi guvbaha umo,

³ mwa gu girani ningelo ga Pfhumu Nungungulu, nya phaso nya guvbiswe mwendro phaso nya gudzise gifungo, mwendro nya guye khu gugola, mwendro nya mibuzo mu yi vegidego; na mu gu vbweta gu ningela mahema nya gunungele gwadi ga Pfhumu Nungungulu, khu mombe mwendro nvuta,

⁴ uye a ningelago phaso waye ga Pfhumu Nungungulu, a na ningela ni phaso nya gipandre nya likhumi nya wuguvbi nya wadi ni deva nya mafura;

⁵ u na thela gipandre nya wu na nya deva nya vbinyu, khu nvuta u na songago nya phaselo nya guvbiswe mwendro nya guhodzwe.

⁶ Khu nvuta ni nvuta, u na dongisela ningelo nya guhodzwe sipandre sivili nya wuguvbi nya wadi nya gusugwe khu gipandre nya wuraru nya deva nya mafura,

⁷ ni gipandre nya wuraru nya deva nya vbinyu wu khala ningelo nya mahena nya gutsakise Pfhumu Nungungulu.

⁸ Wa gu ningela gimombyana gasi gu gira phaso nya guvbiswe, mwendro phaso nya gu tadzise gifungo ni phaso nya gurule ga Pfhumu Nungungulu,

⁹ gumogo ni gimombyana, u na resa ningelo nya guhodzwe nya sipandre siraru nya likhumi nya wuguvbi nya wadi wu sugidwego khu gipandre nya deva nya mafura,

¹⁰ ni gipandre nya deva nya wadwa gasi wu khala ningelo nya guhodze; phaselo yoyu nya guvbiswe, mahema nya gunungele gwadi ga Pfhumu Nungungulu.

¹¹ U na gira kharato khu mombe ni mombe mwendro khu hamba ni hamba, nvutana mwendro phongo.

¹² Mipimo yeyi u na gu yi thumisago, yi fanede gu gimbilelana ni tengo nya sifuyo si na gu paywago.

¹³ Watshavbo wule a gu givelegwa gya tigoni a na gira kharato a gu vbweta gu ningela ningelo nya mahema nya gunungele gwadi ga Pfhumu Nungungulu.

¹⁴ Ni muluveli a vbanyago vbakari gwanu, mwendro uye a khadego nanu gikhati nya gulaphe ngudzu, a gu vbweta nuye gu gira ningelo nya mahema nya gu tsakise Pfhumu Nungungulu, a na gira kha nga idzo enu mu girago khidzo.

¹⁵ Wu na manega nayo moyo basi ga enu ni ga muluveli a vbanyago vbakari gwanu; uwowo wu na bani ari Nayo nya kala gupindruga ni ga situgulwana sanu; kha nga enu, gu na girega gambe kharato ga muluveli mbeli ga Pfhumu Nungungulu.

¹⁶ “Gu na manega nayo moyo basi ni gileletelo gimwegyo basi, gwanu ni ga muluveli a vbanyago vbakari gwanu.”

Miningelo nya sibaba nya guhegule

¹⁷ Pfhumu Nungungulu a di ganela gambe ga Mosi, khuye:

¹⁸ “Ganela ga sanana sa Israyeli, u va embela, khuwe: Avbo mu na vbohago tigoni nyi mi yisago umo,

¹⁹ gikhati mu na hodzani sibaba sa tigoni mule, mu na dusani sibaba nya ningelo wa Pfhumu Nungungulu.

²⁰ Kha nga handro nya guhegule nya wuguvbi wanu nya wadi, mu na girani gibaba gimwegyo; gibaba gegi, mu na nyi ningani gukhwatshi mwa gu dusani esi mu si vbudego vbagithalatunu.

²¹ Khu mihandro nya guphele nya wuguvbi wanu nya wadi mu na ningela ga Pfhumu Nungungulu, enu gumogo ni situgulwana sanu kala gupindruga.”

Miphaso nya sighoho nya gugirwe khu wuhangi

²² Aholu ga gu tshuka mu ndreya mu si landrisi gimwegyo nya sileletelo sesi mu ningidwego khu Pfhumu Nungungulu khu ga Mosi,

²³ a gu sileletelo a vegidego gwanu khu kanani ga Mosi, gukhugela litshigu a emisedego sileletelo sesi kala ga situgulwana sanu satshavbo;

²⁴ khu guralo, mwa gu bani mu ghohide khu wuhangi, tshangano wu si dziti, tshangano watshavbo wu na dusa ningelo nya guvbiswe khu gimombyana gasi gu khala mahema nya gunungele nya gu tsakise Pfhumu Nungungulu, ni ningelo nya iso nya guhodzwe, ni ningelo nya wadwa, kha nga nayo wakone; tshangano wu na ningela nyamabhongwe gasi gu khala phaselo nya gu ditshedzwe sighoho.

²⁵ Muphasi nya mhamba a na gira phaselo nya guditshedzwe sighoho ga tshangano watshavbo wa na Israyeli, avo va na tsetseledwa, kholu va giride sighoho khu wuhangi; ni gu avo va reside ningelo wawe, a gu phaselo nya guvbisele Pfhumu Nungungulu ni phaso wawe nya gulivbe sighoho mbeli ga Pfhumu Nungungulu, va si giridego khu guphazama.

²⁶ Wu na tsetseledwa tshangano watshavbo wa na Israyeli gumogo ni muluveli a vbanyago vbakari gwanu, kholu vathu vatshavbo va ghohide khu guphazama.

²⁷ Aholu a gu bani nari muthu moyo basi a ghohidego khu wuhangi, uye a na ningela giphongwana nya nyamayi nya mwaga moyo nya guvelegwe, gasi gu khala phaselo nya gulivbe sighoho.

²⁸ Muphasi nya mhamba a na girela muthu yoyo a ghohedego Pfhumu Nungungulu khu wuhangi, phaso nya gulivbe sighoho, uye a na tsetseledwa.

²⁹ Ambari nari givelegwa gya va na Israyeli mwendro muluveli a vbanyago vbakari gwanu, a gu gira gighoho khu wuhangi, mu na bani muri ni nayo moyo basi.

³⁰ Aholu wule a na gu ghohago kha gwenye, nari givelegwa gya tigoni mwendro muluveli, a gu ghoha khu gu kanyisa Pfhumu Nungungulu, uyoyo a na songwa vbakari ga va na gyawe,

³¹ kholu kanyiside magana ya Pfhumu Nungungulu a ndreyisa sileletelo saye. Uye a na fuviswa; ni nandru waye wu na thegela vbatshani gwaye.”

Tsayiso khu gundraga nayo nya Sabhadho

³² Avbo va na Israyeli va nga bani vari giwulani, va di mana mwama moyo na gu vbweta dzikhuni khu litshigu nya Sabhadho.

³³ Avo va nga mu manago na gu vbweta dzikhuni va di mu yisa ga Mosi ni Aroni gumogo ni ga tshangano watshavbo.

³⁴ Va diya mu vega a ghadhwa, kholu gu di bani gu si gu hungwi igyo nya guyele gu a girwa.

³⁵ Khavbo avbo, Pfhumu Nungungulu a di embela Mosi, khuye: “Muthu yoyo a ngu yela gu songwa. Tshangano watshavbo va na duge naye vbavbandze nya lizumbo, va ya mu pfara khu siwindri.”

³⁶ Khu guralo, tshangano watshavbo wu di mu dusa vbavbandze nya lizumbo, va ya mu pfara khu siwindri kala afa, kha nga idzo Pfhumu Nungungulu a nga leletelago khidzo Mosi.

Nayo nya mikeka nya guambala

³⁷ Pfhumu Nungungulu a di embela Mosi, khuye:

³⁸ “Ganela ga sanana sa Israyeli, u va embela va dzi girela matshakafula dzitshokani nya dzingandzu dzawe, ga situgulwana sawe satshavbo va na hungelela dzitshokani nya dzingandzu dzawe dzikhindra nya livala la damboni.

³⁹ Matshakafula yaya, momo avbovbo gasi gikhati mu ma wonago, mu na alakanya milayo ya Pfhumu Nungungulu. Mu na yi landrisa; gambe kha mu na dzumela gu ndreyiswa khu gudogorela nya myonyo ni maho yanu, yi mi yisa muguvivbani.

⁴⁰ Khu guralo, mu na alakanyani gu landrisa sileletelo sangu satshavbo, mu na agani mbeli ga Nungungulu wanu!

⁴¹ Eni kheni Pfhumu Nungungulu wanu nyi mi dusidego khu tigoni ga Egipito gasi nyi khala Nungungulu wanu! Eni kheni Pfhumu Nungungulu wanu!”