Mitengo 12 - Bhibhiliya Nya Guage

Gupoyidwa ga Miriyamu ni Aroni

¹ Miriyamu ni Aroni, va di lemba Mosi, khu kotani nya nyamayi nya Mukhusi a nga bani a mu dzegide; kholu uye a di dzegide nyamayi nya Mukhusi.

² Va di ganela, khavo: “Ina kamwe Pfhumu a di ganela basi ga Mosi, gani? Ina kha ganela gwathu gambe, gani? Pfhumu Nungungulu a di si yingisa.

³ Aholu Mosi a diri muthu nya gurule ngudzu, guvbindra vathu vatshavbo va mafuni.

⁴ Khu guralo, Pfhumu Nungungulu a di dzegela gu ganela ga Mosi, ga Aroni ni Miriyamu, khuye: “Enu mwa vararu nga dugani khu Tshatshani nya Tshangano.” Avo va di duga khu wuraru wawe.

⁵ Khavbo avbo, Pfhumu Nungungulu a di tshiga khu vbalipfhitunu a ta khala khu vbamwanya nya Tshatsha. Khu hwane a di rana Aroni ni Miriyamu, avo va di duga khu wuvili wawe.

⁶ A va embela, khuye: “Olu yingisani magana yangu; vbakari gwanu a gu bani na romo muprofeti, Eni Pfhumu Nungungulu, nyi na dzi wonegisa gwaye khu giwoniso, nyi ganela naye khu ndroro.

⁷ Aholu kha nyi giri kharato ga Mosi, githumi gyangu; uye tumbegide nyumbani gwangu gwatshavbo.

⁸ Uye nya gu ganela naye likana khu likana, khovbe ni khovbe, nasiri khu sipimaniso; kholu uye a ngu wona mufananiso wa Pfhumu Nungungulu. Olu, khu ginani mu ngamba thava gu lemba githumi gyangu Mosi, na?”

⁹ Khu guralo, Pfhumu Nungungulu a di khondra khu likhulo; a khuga a hongola.

¹⁰ Avbo lipfhi li nga khugago khu vbatshani nya Tshatsha; Miriyamu a di phorola khu sokono, gu wonega kha nga thondrwane; Aroni a di thendregedza a wona Miriyamu nari ni sokono.

¹¹ Aroni a di embela Mosi, khuye: “Ama mune wangu, nyi ngu gu lomba u nga theli vbakari gwathu giwono gegi hi nga gi girago khu wupumbu wathu.

¹² Miriyamu, a nga giri kha nga muthu nya gufe ndrani ga mayi waye, a dugago mili waye na wu hinide!”

¹³ Khu guralo, Mosi a di lila ga Pfhumu Nungungulu, khuye: “Ama Nungungulu nyi ngu gu lomba gukheni, u mu vbanyise!”

¹⁴ Pfhumu Nungungulu a di embela Mosi, khuye: “Nari pwani babe waye a di mu hetshela khovbeni, ina na sa vbedza livbandre na mavili matshigu na tade khu dzitshoni, gani? A na segedwe vbavbandze nya lizumbo livbandre na mavili matshigu, khu hwane, mu na mu wuyisa gambe.”

¹⁵ Khu guralo, Miriyamu a di segedwa vbavbandze nya lizumbo, livbandre na mavili matshigu. Va na Israyeli kha va nga khuga na va si gu wuyisi Miriyamu.

¹⁶ Khu hwane va na Israyeli va di khuga Hazeroti, vaya ghova giwulani ga Parani.