Mikeya 2 - Bhibhiliya Nya Guage

Libango nya vatshanisi

¹ Libango, ga vale va na gu bani va lade malawuni gwawe, va luga makungo nya wuvivbi, gikhati gugyago va tadzisa esi va hungidego, kholu somo tshivbani nya mandza yawe.

² Va gu dogorela marembwe va gu ma wandra, va gu dogorela dzinyumba, va gu dzega khu kanu; kharato va gu gira dzihanyi ga mwama nya gukari gumogo ni ndranga yaye, ga muthu nya gukari gumogo ni thomba yaye.

³ Khu guralo, Pfhumu Nungungulu a ngu ganela kharati, khuye: “Wonani nya gukhenu nyi ngu luga makungo, gasi gu resa libango ga vathu vovo, ilo mu na gumba dzi kodza gu vbuluga ga ilo; gambe kha mu na gimbila khu matshandza, kholu gikhati gyogyo gi na bani gi vivbide.

⁴ Khu litshigu lolo va na embelela ndzimo nya gu mu hege khiyo, va emba ndzimo yeyi nya gililo, khavo: Hi mbembisidwe muphelo! A dzega thomba ya tigoni gwathu a ninga vambe vathu! Uye a di hi wandrela! A dzega marembwe yathu a ningela avo va hi tshanisago.”

⁵ Khu guralo, kha mu na mana wa tshanganoni ga Pfhumu Nungungulu, a na gu gu pimelago khu ngodzi, wulime wu lumbago vathu vaye.

Tsayiso wa vaprofeti nya malipha

⁶ Vaprofeti va di ganela, khavo: “Mu nga profeti;” avo va profetago, va nga profeti khu magirelo yoyo, kholu hi nga thegedwa khu libango.

⁷ Enu mu gu situgulwana sa Jakobe, ina Liphuvbo la Pfhumu Nungungulu li ngu vbiredza gu goroga, gani? Ina khayo aya mathumelo yaye, gani? Ina magana yangu ma ngu gira wuwadi ga wule a gimbilago khu ndzila nya gululame, gani?

⁸ Aholu, khu gikhati nya gidugwane, enu mu vbindrugedzide mu wugela vathu vangu gukhwatshi valala vanu. Mu wandrela gifenengelo vale va dzi vbindrelago khu gurula va si khathaligo khu gu dwana nyimbi.

⁹ Mu tutumisa vagadzi va vathu vangu mapangoni gwawe va ma golago, mu luziside muphelo wuzundzo wangu ga sanana sawe.

¹⁰ Khugani mu hongole, kholu avba khandri wulanga nya guhefemule. Khu kotani nya wudambane wanu mu pfhungumulago khuwo, mu engedzela gu pfhungumula.

¹¹ A gu manega muthu nya malipha ni wukanganyisi, a ta ganela, khuye: Nyi na mi profetela khu vbinyu ni wadwa nya guvave; muprofeti yoyo a na khala muprofeti wa tigoni momo.

Pfhumu Nungungulu a ngu tombanisa mitshaledwa ya Israyeli

¹² Gasi olu, nyi na bwelo khavbo nyi tombanisa vathu vago vatshavbo uwe Jakobe, nyi tshanganisa ni mitshaledwa ya Israyeli; nyi na va pata dangamwedo nga dzinvuta dza Bhozira, nga tshambi wu guromo phandroni, gu na pwala ligwaha nya likhongolo, khu kotani nya gutale nya vathu.

¹³ Moyo a na thanga mbeli a tula ndzila; avo va na ya bela khu mwanya va bwelo khavbo va duga khuwo gambe; mufumeli wawe a na thanga mbeli; ni Pfhumu Nungungulu, a na va gimbidzisa.