Mavingu 31 - Bhibhiliya Nya Guage

Mahungu ya mufumeli Lemuweli

¹ Aya khu magana ya Lemuweli mufumeli wa Masani, wuprofeti a hevbudzidwego khu mayi waye, khuye:

² Nyi na gu laya kharini, mwanangu? Nyi na kheni ginani ga uwe, gyanana gya mahembeni gwangu? Nyi na gu laya kharini uwe, gyanana nya gitumbiso gyangu?

³ U nga ningeli tshivba yago ga va nyamayana, u nga landriseli avo va thesago ni vafumeli.

⁴ Uwe Lemuweli, isoso kha si faneli vafumeli, gusela wadwa kha si faneli vafumeli, ambari manganagana gudogorela wadwa nya guvave.

⁵ Kholu va nga sela, va divaledwa khu nayo, va si landrisi dzifanelo nya avo va sanisekago.

⁶ Wadwa ningani vale vbwetago gufa, ni vale mihefemulo yawe yipwago wuvi;

⁷ gasi va sela va divaledwa khu wusiwana wawe, va si dundrugi sigaradzo.

⁸ Magana yago ma na vhikele wule a si kodzigo gu ganela khu gu vbweta dzifanelo dza vale va dzipwago vari mwalo wawe.

⁹ Dusa khu kanani gwago, magana ma lamulago khu lisine, u lamula khu fanelo sisiwana ni vahamugi.

Guzundza nyamayi nya wadi Alef

¹⁰ Khu mani saye a kodzago gu mana nyamayi nya wadi, kholu tengo waye wungi guvbindra siwindri nya gukhedzige.

Bet

¹¹ A ngu tumbega monyoni ga mwama waye, avbo a si hamugigo gilo.

Guimel

¹² Guvbanyani gwaye gwatshavbo, a gu mu girela wuwadi, nasiri silo nya guvivbe

Dalet

¹³ A gu mu vbwetela mawoya nya dzinvuta ni wuluva, a lugela khu mandza yaye na tsakide.

He

¹⁴ Uye a gu fanana ni ngalavaya va nya wugwewo, va ghwevhago khiyo hwindzo guhodza gwawe.

Wawu

¹⁵ A phindrulelago guwuga, a dongisela guhodza va ndrangani gwaye, a kavedzela mithumo sithumi saye nya vanyamayi.

Zain

¹⁶ A alakanya gu renga lithembwe, a yala umo simbo nya vhinya khu handro nya bhindzu ya mandzani gwaye.

Heti

¹⁷ A gu hunga keka wu tiya giwununi gwaye, a tiyisa mawogo yaye.

Theti

¹⁸ Uye a ngu dziti gukhuye wugwewo waye wu ngu gimbila gwadi, kandriya yaye ya gu khondra wutshigu ni mihani.

Yod

¹⁹ Mandza yaye ma gu phara ndronga nya guluge mawoya nya dzinvuta, dzinyala dzaye dzi phara gikari nya gudzongeledzele dzikhindra nya seda.

Caf

²⁰ A gu khusedza mawogo ga uye a khuvekidego, a thawuludza gambe mandza ga gisiwana.

Lamed

²¹ Kha thavi khu mahungu nya girame, kholu va ndrangani gwaye vatshavbo va ambade sombo nya gufurumele.

Mem

²² A gu dzi girela abune vholo, a dzi lugela sombo nya seda ni giwunguwungu.

Nuni

²³ Mwama waye a gu ningwa githawo vbakari nya madhota, avbo a khalago ni madhota ya tigoni gwaye.

Samec

²⁴ A gu gira myendra nya seda a rengisa, ni gu ghwevhisela mabhandri va nya wugwewo.

Ain

²⁵ Tshivba ni wudhumo, guambala gwaye, kha thavi sa mindru.

Phe

²⁶ A gu ganela khu guti, a luleka vakwawe khu mapimo nya yadi.

Tsadhe

²⁷ A gu sayisa gwadi ndranga yaye, kha hodzi guhodza nya wugara.

Qof

²⁸ Sanana saye sa gu wuga, sa gu mu zundza, mwama waye nuye, a mu zundza, khuye:

Resi

²⁹ Vanyamayi nya vadi vangi, aholu uwe, u ngu va vbindra vatshavbo.

Ximi

³⁰ Guyedwa gu ngu pfhadza, ni wumburi wu ngu vbela, aholu nyamayi a thavago Pfhumu Nungungulu, khuye a zundzegago.

Tau

³¹ Mu ningeni handro wa mandzani gwaye, a na zundzwe khu vathu khavbo nya mithumo yaye.