Mavingu 27 - Bhibhiliya Nya Guage

¹ U nga dzi zundzi khu litshigu la mindru, kholu litshigu la muhuno khu siti iso si na gu dugelela.

² Zundzwa khu vambe vathu guvbindra gu dzi zundza wabune, zundzwa khu muthu wa mambe mayigo, guvbindra gu dzi zundza wabune.

³ Mafu ni siwindri si ngu lemela ngudzu, aholu gu zangaredwa khu gipumbu, gu lemede ngudzu guvbindra iso.

⁴ Likhulo li vivbide, ni gugoroga i talo nya mati, aholu khu mani a tiyelago lidiwo?

⁵ I tshukwana wule a kawukago guwonegelani, guvbindra lihaladzo nya gusengedzele.

⁶ I tshukwana gu thedwa dzimbanga khu pari, guvbindra gu ningwa besu khu nala.

⁷ Uye a khuridego, a ngu nyenya ambari ni wulombe, aholu uye a gu ni ndzala ambari nya guvave, satshavbo gutshamba.

⁸ Kha nga ginyoni gi vbuvbelago hwindzo ni gihaga gyaye, kharato nugo mwama, a digago ndranga yaye.

⁹ Mafura ni libani sa gu resa gutsaka monyoni, kharato nugo pari ya gupwa gutshamba, khu wupari nya wadi.

¹⁰ U nga hambani ni pari yago, ambari ni pari ya babe wago; ambari guya ndrangani ga ndriyago, khu litshigu nya sigaradzo; i tshukwana guya ga muakelane a gu romo vbafuvbi, guvbindra ga ndriyago a guromo hwindzo.

¹¹ Mwanangu, tala khu wugengeli nya mapimo u tsakisa monyo wangu, gasi nyi na kodza gu ninga phindrulo uye a nyi hembululago.

¹² Muthu nya mapimo a ngu wona mhango na yi ngari hwindzo a sihala, aholu gipumbu gya gu yi thonona gi ya mana gutshaniseka.

¹³ Uye a khalago fakazi nya nandru wa muthu a si mu mutigo, a na dzegedwe guambala gwaye. Mu livbiseni khu kota nya nyamayi nya liphuphulu.

¹⁴ Uye a losago muthu khu gu mu laledza gu ngari dzimindru, gu fanana ni gu mu yuyutela.

¹⁵ Gu bani nuri ni nyamayi nya siregerege, gu fanana ni gu khala nyumbani nya gurute litshigu nya guwe ndzadzi.

¹⁶ Uye a mu degudzago, gu fanana ni gu degudza phuvbo, mwendro gufumbaredza mafura mandzani.

¹⁷ Kha nga simbi ni simbi dzi lodzanago, kharato muthu nuye, a ngu gorogisa muthu kwawe.

¹⁸ Muthu a sayisago dimwa, a na hodza mihandro yaye, kharato gambe uye a sayisago mune waye, a na zundzega.

¹⁹ Gukhwatshi khu khovbe yi wonegago matini yi fanana ni mune, kharato nuye muthu a hingegedzago khu monyoni gwaye a ngu dzi pima gukhuye, khuye mani.

²⁰ Gumbembiswa nya guhegise gumogo ni lithowo, gima kha si khuri, kharato nayo maho nya muthu, gima kha ma eneledwi.

²¹ Ndralama ni parata sa gu nyiviligiswa khu nilo kharato nuye muthu a gu lingwa khu wuzundzo waye.

²² Gipumbu ambari gya hindzwa kununi nga mavbila, gima kha gi hambani ni wupumbu waye.

²³ Dzi garadze khu gu vbweta guti makhalelo nya dzinvuta dzago sayisa gwadi mitshambi yago,

²⁴ kholu dzithomba kha dzi simami, dzi ngu vbela, ni gihugu nya wufumu kha gi lumbi livelego latshavbo.

²⁵ Avbo gu duswago mwasi nya gubange, gu buga nyenvu, gu wungedzedwa mwasi musigomoni,

²⁶ mawoya nya dzinvuta ma na gu ninga guambala, dziphongo dzi na gu rengela lithembwe.

²⁷ Dziphongo dzi na gu ninga mahwe nya mangi, u hodza u khura, u hodzisa ndranga yago, bwelo khavbo u hodzisa sithumi sago nya vanyamayi.