Mavingu 24 - Bhibhiliya Nya Guage

¹ U nga dogoreli vathu nya guvivbedwe khu monyo, ambari gu dogorela gu khala navo.

² Kholu makungo nya myonyo yawe khya wughevenga, khu maganani gwawe gu duga magana nya wuwugeli.

³ Nyumba ya gu vbahwa khu guti, yi tiyiswa khu mapimo.

⁴ Khu guti, va gu tadza makhuvini gwawe khu sombo nya lisima nya gutsakise.

⁵ Muthu nya guti a na ni tshivba, ni uye nya mapimo a ngu dzi engedzela tshivba;

⁶ kholu u na wusa nyimbi khu wugengeli nya wusingalagadzi, u mana hure khu gu bani nuri ni vasingalagadzi nya vangi.

⁷ Gipumbu kha gi maneli avbo gu guromo guti litshigu nya gulamudwe gi na tandrega ni gutula likana.

⁸ Uye a lugago gikungo nya silo nya guvivbe, a na ranwa gupwani muvangi nya matshoho.

⁹ Maalakanyo nya gipumbu, khu gu gira gighoho, muthu nya matshoho nyenyezide ga vatshavbo.

¹⁰ Wa gu dugedwa khu mhango u vbela tshivba, gu yeyedza gupwani khwa tiya.

¹¹ Vbulugisa vale va konedwego gu songwa, ni gu vhikela avo va yiswago gusongwani.

¹² Wa gu ganela, khuwe: “Ethu kha hi siti iso si nga bani na si gu dugelela!” Ina wule atigo mapimo nya vathu, kha na siti, gani? Uye a sayisago womi wago, kha na siti, gani? Ina Uye kha na bweledzela muthu mayelano ni mithumo yaye, gani?

¹³ Hodza wulombe mwanangu, kholu wu ngu tshamba, gipapu nya wulombe gya gu lombela kanani gwago.

¹⁴ Dziti nya gukhuwe guti gu na gira nga wulombe guvbanyani gwago, wa gu gu mana, khu na kanakana khiso si na gu dugelago khu matshigu ma nga gutago, ni gitumbo gyago, gi na bani nari gya lisine.

¹⁵ U nga dembeli muthu nya gululame na khade ndrangani gwaye, kha nga idzo a girago muthu nya guvivbedwe khu monyo, ambari gu sasela ni wulanga waye a hefemulago avbo;

¹⁶ kholu muthu nya gululame, ambari a thega livbandre na dzimbili dzinyondro, uye a na wuga, aholu vathu nya guvivbedwe khu monyo, litshigu nya mhango, va na thegela muphelo.

¹⁷ U nga ghiyi khu guthega ga nala wago, gambe u nga nengeli khu gutshunganela gwaye;

¹⁸ kholu Pfhumu Nungungulu a na si wona a si si tsakeli, a ndreyisa likhulo laye avbo gwaye.

¹⁹ U nga vbisi hungo khu vathu nya sighohi, ambari gu dogorela vathu nya guvivbedwe khu monyo.

²⁰ Kholu va nya guvivbedwa khu myonyo kha va na wona matshigu nya yadi, ni mwenge nya sighohi, wu na tshimega.

²¹ Mwanangu, thava Pfhumu Nungungulu, gumogo ni mufumeli, u nga dzi tshanganisi ni vale va golago pfilupfilu.

²² Kholu mhango yawe yi na vboha khu githugedza, khu mani a litigo litshigu nya gumbembiswe ga vathu vava?

IV. Mambe mavingu ya vathu nya guti

²³ Aya gambe mambe mavingu ya vathu nya guti; gulamula khu gukhedza khovbe nya muthu, si vivbide.

²⁴ Uye a na gu embelago gighohi, khuye: “Gimwalo nandru,” a na vadwa khu vathu nya vangi, a na nyenywa khu mayigo nya mangi.

²⁵ Aholu uye a na tsayisago gighohi, a na tsakedwa ngudzu, bwelo khavbo a ningwa makategwa nya gutale.

²⁶ Uye a ningago phindrulo nya yadi, a gu fanana ni wule a ningago besu sigundruni.

²⁷ Phela khu gu lulamedza mithumo yago ya vbavbandze, u sayisa mahange yago, khavbo u na wumbago lipango.

²⁸ U nga khali fakazi nya malipha u lumbedza muakelane wago vbavbandze nya nandru, ambari gu mu kanganyisa khu magana yago.

²⁹ U nga ganeli gambe, khuwe: “Nyi na mu bweledzela kha nga idzo, a nyi giredego; a na livba khiso a nyi giredego.”

³⁰ Nyi vbindride khu thembweni ga ngara, ni bambe nya lithembwe la muthu nyambana mapimo;

³¹ nyi di mana lithembwe na li khumide khu miba mwasi na wu fenengedzide dzimbewu, ndzari nya libhiyo na yi thegide, siwindri na si mbambamede vbavbatshi.

³² Avbo nyi nga si wonago nyi di ema nyi pimisa, khavbo avbo nyi di mana gihevbulo.

³³ Wa gukhuwe: “Nyi nga gu gha-ghaa! Nyi lala vbadugwana,” nyi gumbarana mawogo nyi hefemula.

³⁴ Khu guralo, wusiwana wu na vboha kha nga mbafa, ni ndzala yi nata kha nga gighevenga.