Mavingu 21 - Bhibhiliya Nya Guage

¹ Monyo wa mufumeli, wa gu fanana ni gitsongwana nya mati gi gimbidziswago khu Pfhumu Nungungulu, uye a gu mu rumela ni evbini a gunago.

² Dzindzila dzatshavbo muthu a gimbilago khidzo, guwonani gwaye wari khuye dzi lulamide, aholu Pfhumu Nungungulu khuye a khedzago monyo waye.

³ Gugira ugo gu gu gwadi khu gululama ni nongameto silo si godwago khu Pfhumu Nungungulu, guvbindra gu mu girela dzimhamba.

⁴ Maho nya gu dzi khusedze ni monyo nya matshandza, mwenge wa va nya guvivbedwa khu monyo, gambe si ngu va ghohisa.

⁵ Makungo ya muthu a gu ma pimisa gwadi, ma na mu ninga mihandro, aholu ayo nya gu ma dongisele khu guvbiredza, kha ma bhindzuli gilo.

⁶ Thomba nya gu yi mane khu gu kanganyisa, ya gu tshatshega gu fanana ni thondrwane, i naphwi wu gu vangelago lufu.

⁷ Va nya guvivbedwa khu myonyo va gumbembiswa khu mithumo yawe nya dzihanyi, kholu kha va dzumeli gulandra mithumo ya yadi.

⁸ Muthu nya guvivbedwe khu monyo ndzila yaye yi wegede, gasi ya uye nya monyo wu agidego yi lulamide.

⁹ I tshukhwana gu khala vbalangwetunu nya nyumba, guvbindra gu khala khu ndrani gakone ni nyamayi nya liwondrisa.

¹⁰ Muthu nya guvivbedwe khu monyo a gu alakanyela guvivba; ambari ni muakelane waye khapwi khuye gisiro.

¹¹ Wa gutsayiswa gindragamilayo, gipumbu gya gu mana guti; gasi wa gu laya muthu nya guti, uye a gu engedzela gu mana mapimo.

¹² Muthu a lulamidego a gu khedzisa gwadi ndranga nya sighohi, a gu thesa mhangoni va nya guvivbedwa khu monyo.

¹³ Uye a si yingisigo huwa nya gisiwana gya gulila, uye nuye kha na yingiswa litshigu a na gu lombago giphaso.

¹⁴ Ningelo nya gisihaledza wa gu bosisa likhulo, ni sihiwa si ningedwago khu misihalo, si ngu bosisa likhulo nya likhongolo.

¹⁵ Malamulelo nya gululame, ma gu tsakisa avo valulamidego, aholu ma swihadzisa va nya guvivbedwa khu myonyo.

¹⁶ Muthu a ndreyago ndzilani nya mapimo, a naya tshanganiswa gumogo ni vale va guromo phalani nya lufu.

¹⁷ Uye a golago gu dzi tsakisa a na khala gisiwana, ni wule a golago vbinyu ni mafura, gima kha na fuma.

¹⁸ Muthu nya guvivbedwe khu monyo a na bani nari mudzegisi nya milandru ya valulamidego, va tsayiswa khu kotani nya sighoho sa va nya gululama.

¹⁹ Tshukwana gu khala giwulani, guvbindra guvbanya ni nyamayi nya gihafane ni gu dwanisa.

²⁰ Thomba ni mafura nya lisima sa gu manega nyumbani ga muthu nya mapimo, aholu gipumbu gya gu mwaladzela satshavbo gi gu naso.

²¹ Uye a landrisago ndzila nya gululame ni wuhindzi, a na mana guvbanya, gululama ni wuzundzo.

²² Muthu nya gugengele a ngu kodza gu dhumela madhoropa nya dzindrena, a pfhungumula ni makhokhola yawe va ma tumbago.

²³ Uye a vegedzago likana ni lidimi laye, a gu sayisa womi waye sigaradzoni.

²⁴ Muthu nya matshandza ni lunya; khu wule a dzi khusedzago ni gu vega vbavbatshi vakwawe.

²⁵ Ngara a gufa khu gunavela, kholu mawogo yaye kha ma dzini guthuma.

²⁶ Muthu nya wudogodogo a gu khala khu gunavela litshigu latshavbo, aholu muthu nya gululame, a gu thawuludza mandza a ningela nyamba hegisa.

²⁷ Mhamba ya muthu nya guvivbedwe khu monyo yi nyenyezide mahoni ga Pfhumu, ngudzungudzu a gu yi ningela khu maalakanyo nya guvivbe.

²⁸ Fakazi nya malipha yi na mbembiswa, aholu muthu a yingisago gwadi, magana yaye khya lisine.

²⁹ Muthu nya guvivbedwe khu monyo, a gu khala na hungide giwombo, gasi muthu nya gululame a gu tiya mavbanyeloni gwaye.

³⁰ Mwalo muthu a gengedego ni mapimo ambari wusingalagadzi, a vbindrago Pfhumu Nungungulu.

³¹ Khu litshigu nya litunga, va gu dongisela kavalu, aholu Pfhumu Nungungulu khuye a ningago tshivba nya gupale.